ગુજરાત / અનલોક-1માં સરકારે છૂટછાટ આપતાં આ શહેરોમાં બજારો થયાં ધમધમતાં, જોવા મળી લોકોની ભીડ

• ગુજરાતમાં અનલોક-1માં ચાર મહાનગરમાં બજારો શરૂ
• અમદાવાદ, સુરતમાં બજાર થયા ધમધમતા
• વડોદરા, રાજકોટમાં વેપારીઓએ ખોલી દુકાન
• બજાર ખુલતાં રસ્તા પર જોવા મળ્યાં લોકો

સુરતમાં આજથી ટેક્સટાઈલ માર્કેટ શરૂ કરવાની પરવાનગી

સુરતમાં ટેક્સટાઈલ માર્કેટને આજથી શરૂ કરવાની પરવાનગી આપવામાં આવી છે. મનપાએ શહેરની 164 માર્કેટને શરૂ કરવા માટેની છૂટ આપી છે. છેલ્લા 70થી વધુ દિવસોથી માર્કેટ બંધ છે. ત્યારે આજે માર્કેટમાં વેપારીઓએ દુકાનો ખોલી છે. ફેડરેશન ઓફ સુરત ટેક્સટાઈલ ટ્રેડર્સ એસોસિએશન દ્વારા  માર્કેટને ખોલના માટેની ગાઈડલાઈન જાહેર કરાઈ છે. ઓડ ઈવન પદ્ધતિથી વેપારીઓ દુકાન ખોલી શકે છે. સોશિયલ ડિસ્ટન્સનું પાલન અને માસ્ક પહેરવું ફરજિયાત છે.

અમદાવાદમાં રિલીફ રોડ ફરી ધમધમતો થયો

અમદાવાદમાં હવે માર્કેટો શરૂ થયા છે. અમદાવાદમાં રિલીફ રોડ ફરી ધમધમતો થયો છે. લાંબા સમયથી બંધ રિલીફ રોડ શરૂ થયો છે. રિલીફ રોડના માર્કેટ ચાલુ થયા છે. કાપડ, મોબાઈલ, ઈલેકટ્રોનિક દુકાનો શરૂ થઇ ગઇ છે.

રાજકોટની બજારો થઈ ધમધમતી

અનલોક-1માં સરકાર દ્વારા છૂટછાટ અપાતા રાજકોટ આજ ફરીથી ધમધમતુ થયું છે.  રાજકોટ શહેરની મુખ્ય બજારો શરૂ થતા લોકો ઘરની બહાર નિકળ્યા છે. ઘણા સમયથી સુમસામ રહેલા રસ્તા પર લોકો જોવા મળ્યા છે. લોકડાઉન હોવાના કારણે છેલ્લા ઘણા સમયથી રસ્તા પર લોકોની ભીડ ઘટી હતી. જોકે હવે સરકારે છૂટ આપતા રસ્તા ધમધમતા થયા છે.

વડોદરામાં અનલોક પાર્ટ-1માં ખુલ્યાં બજારો 

વડોદરામાં અનલોક પાર્ટ-1માં બજારો ખુલ્યાં છે. લાંબા સમય બાદ ધંધા રોજગાર શરૂ થઇ ગયા છે. વડોદરામાં વેપારીઓએ ધંધા રોજગાર શરૂ કર્યા છે. ચાર દરવાજા વિસ્તાર, રાવપુરા વિસ્તારમાં દુકાનો ખુલી ગઇ છે.  સરકારની ગાઈડલાઈન મુજબ વ્યવસ્થા કરાઈ છે.