જાહેરાત / ગુજરાત યુનિવર્સિટીએ પરીક્ષાની સંભવિત તારીખો કરી જાહેર, ઓનલાઇન અને ઓફલાઇન પરીક્ષાનો આ પ્રમાણે રહેશે કાર્યક્રમ

• ઓફલાઈન પરીક્ષા આપવા ન માગતા હોય તેના ઓનલાઈન પરીક્ષા યોજાશે
• ઓનલાઇન પરીક્ષા માટે વિદ્યાર્થીઓએ અલગથી સંમતિ આપવી પડશે
• ગુણભાર ઓફલાઈન પરીક્ષા જેટલો જ રહેશે

ગુજરાત યુનિવર્સિટીની અન્ડર ગ્રેજ્યુએટ્સ અને પોસ્ટ ગ્રેજ્યુએટ્સ વિદ્યાશાખાની પરીક્ષાઓ બે તબક્કામાં 21મી ઓગસ્ટ અને 31મી ઓગસ્ટથી શરૂ કરવામાં આવશે. સવારે 10થી 12 અને બપોરે ત્રણથી પાંચ આમ બે તબક્કામાં પરીક્ષા યોજાશે. પરીક્ષાનો સમયગાળો બે કલાકનો રહેશે. કોઇ વિભાગનાં વડા કોર્સ કે વિષયમાં પોતાની રીતે ઓનલાઇન, ઓફલાઇન કે બ્લેન્ડેડ મોડમાં પરીક્ષા લેવા માંગતા હોય તો તે અંગેની મંજુરી લેવી જરૂરી છે.

સ્થાનિક, રાજ્ય બહાર કે વિદેશમાં રહેતા કોઇપણ વિદ્યાર્થીઓએ ઓફલાઇન પરીક્ષા આપવા ન હોય તો તેમના માટે ઓનલાઇન પરીક્ષાનું આયોજન કરવામાં આવશે. જોકે આ અંગે વિદ્યાર્થીઓ અલગથી સંમતિ આપવી પડશે. આ અંગે ચોઇસ ફીલિંગનો અને પરીક્ષાનો વિષયવાર કાર્યક્રમ હવે પછી જાહેર થશે. ઓનલાઇન પરીક્ષા યુનિવર્સિટીના સોફ્ટવેરના માધ્યમથી MCQ દ્વારા લેવામાં આવશે. જેનો ગુણભાર ઓફલાઇન પરીક્ષા જેટલો જ રહેશે.

વિદ્યાર્થીઓને કોઈ પણ જાતનો ભય ન રહે તે જવાબદારી યુનિવર્સિટીની રહેશે: હાઈકોર્ટ

મહત્વનું છે કે, આ અગાઉ યુનિવર્સિટીઓમાં પરીક્ષાને લઇ ગુજરાત હાઇકોર્ટે નિર્દેશ કર્યો હતો. હાઇકોર્ટે જરૂરી દિશાનિર્દેશો સાથે અરજીનો નિકાલ કર્યો હતો. આ અંગે હાઇકોર્ટે જણાવ્યુ હતું કે વિદ્યાર્થીઓની સલામતી સાથે કોઇ સમાધાન કરવામાં આવશે નહીં. પરીક્ષા અંગે અંતિમ નિર્ણય યુનિવર્સીટી કરશે. વિદ્યાર્થીઓને કોઇ ભય ન રહે એ જવાબદારી યુનિવર્સીટીની છે.