ગુજરાત યુનિવર્સિટી સેનેટ વેલફેર ચૂંટણીનું આજે બપોરે 1 વાગ્યા સુધીમાં પરિણામ આવશે. યુનિવર્સિટીના ભાષા ભવનમાં મતગણતરી હાથ ધરવામાં આવશે. પોલીસના ચૂસ્ત બંદોબસ્ત વચ્ચે મતગણતરી થશે.
ગુજરાત યુનિવર્સિટી સેનેટ વેલફેર ચૂંટણીનું આજે પરિણામ
ગુજરાત યુનિવર્સિટીના ભાષા ભવનમાં મતગણતરી
ABVP-NSUIના 24થી વધુ ઉમેદવારો વચ્ચે જંગ
ઉલ્લેખનીય છે કે ગઇકાલે ગુજરાત યુનિવર્સિટી સેનેટ વેલફેર ચૂંટણી યોજાઇ હતી. જેને લઇને આજે મતગણતરી હાથ ધરાશે. એક અનુમાન મુજબ બપોરેના 1 વાગ્યા સુધીમાં ચૂંટણીના પરિણામ જાહેર થશે.
ગુજરાત યુનિવર્સિટીની સેનેટ વેલફેરની ચૂંટણીમાં ABVP-NSUIના 24 વધુ ઉમેદવારો વચ્ચે જંગ જોવા મળી રહ્યો છે. અમદાવાદ સહિતના 25 સેન્ટર પર મતદાન યોજાયું હતું.
જો કે ગઇકાલે યોજાયેલી ચૂંટણીમાં અમદાવાદ શહેરમાં આવેલી રાષ્ટ્રભાષા કોલેજમાં ચૂંટણી દરમિયાન NSUI અને ABVP ના કાર્યકરો સામ-સામે આવી ગયેલા જોવા મળ્યાં હતા. બંન્ને સંગઠનના કાર્યકરોએ સામ-સામે પત્રિકાઓ ઉડાવી હતી. જ્યારે રાષ્ટ્રભાષા કોલેજના મતદાર કેન્દ્રની બહાર જ નારેબાજી પણ કરાઇ હતી.
ઉલ્લેખનીય છે કે ગુજરાત યુનિવર્સિટીની વેલફેરની ચૂંટણી 4 વર્ષ બાદ યોજાઇ છે ત્યારે કોણ જીતશે તેને લઇને રસાકસી જોવા મળી રહી છે. મતદારોને મતદાન કરાવવા માટે બંને પક્ષો દ્વારા એડીચોટીનું જોર લગાવામાં આવ્યું હતું.