ગુજરાત યુનિવર્સીટી સેનેટ-વેલ્ફેરની ચૂંટણીનું પરિણામ જાહેર થયું છે. જેમાં સેનેટ-વેલ્ફેર ચૂંટણીમાં NSUI-ABVP વચ્ચે સીધો જંગ જામ્યો હતો. સેનેટની 8 બેઠક પર થયેલી ચૂંટણીમાં 6 બેઠક પર કોંગ્રેસની વિદ્યાર્થી પાંખ NSUIનો વિજય થયો છે. જ્યારે ભાજપની વિદ્યાર્થી પાંખ ABVPને માત્ર 2 બેઠક પર જીત મળી છે. તેમજ વેલ્ફેરની 7 બેઠકમાંથી NSUIનો 6 પર અને ABVPનો 1 બેઠક પર વિજય થયો છે.
સેનેટ-વેલ્ફેરની ચૂંટણીનું પરિણામ જાહેર
NSUIનો ભવ્ય વિજય
ABVP અને પોલીસ વચ્ચે ઘર્ષણ
સેનેટ-વેલ્ફેરની ચૂંટણીના પરિણામો આવ્યા છે ત્યારે ABVP અને NSUIના કાર્યકરોએ ઉજવણી કરી હતી. ABVPનો કારમો પરાજય થવા છતાં કેમ્પસમાં વર્ચસ્વ જાળવવા ભવ્ય ઉજવણી કરી વિજય સરઘસ કાઢ્યું હતું. આ સરઘસ દરમિયાન ABVP અને NSUIના કાર્યકરો વચ્ચે બોલાચાલી થઈ હતી. જ્યારે ડીજે બંધ કરાવવા મામલે ABVP અને પોલીસ વચ્ચે ઘર્ષણ પણ સર્જાયું હતું. આ દરમિયાન ABVPના કાર્યકરોએ પોલીસ કર્મીને લાફા માર્યાં અને ગાળાગાળી કરી હતી. જેને પગલે પોલીસે ટોળા પર કાબૂ મેળવવા હળવો લાઠીચાર્જ કર્યો હતો.
NSUIમાં ઉત્સાહનો માહોલ
ગુજરાત યુનિવર્સિટીની સેનેટની ચૂંટણીમાં NSUIનો ભવ્ય વિજય થયો છે. જેને લઈને NSUIમાં ઉત્સાહનો માહોલ જોવા મળી રહ્યો છે. નારેબાજી કરીને NSUIના કાર્યકર્તાઓ જીતની ખુશી વ્યક્ત કરી રહ્યા છે. તો આતસબાજીથી પણ NSUIના કાર્યકર્તાઓએ જીતને વધાવી લીધી છે.
મારી નહિં પણ ABVPની જીત છેઃ ઉમેદવાર
ગુજરાત યુનિવર્સીટી સેનેટ-વેલ્ફેરની ચૂંટણીનું પરિણામ જાહેર થયું છે. જેમાં સેનેટ-વેલફેર ચૂંટણીમાં NSUI-ABVP વચ્ચે સીધો જંગ જામ્યો હતો. જેમાં ABVPના વિજેતા ઉમેદવારે જણાવ્યુ હતું કે આ મારી નહિં પણ ABVPની જીત છે.
વેલ્ફેરની ચૂંટણીમાં પણ NSUIનો દબદબો
ગુજરાત યુનિવર્સિટી વિદ્યાર્થી સંઘની ચૂંટણીમાં વર્ષ 2012થી NSUIનો દબદબો છે. વર્ષ 2012માં સેનેટની 10માંથી 7 બેઠક NSUIએ મેળવી હતી. વર્ષ 2013માં પણ 10માંથી 7 બેઠકો NSUIના ફાળે ગઈ હતી. વર્ષ 2014માં 10માંથી 8 અને વર્ષ 2015માં 6 બેઠકો મેળવી હતી. વેલ્ફેરની ચૂંટણીમાં પણ NSUIનો દબદબો છે. વર્ષ 2012થી ઇન્દ્રવિજયસિંહ ગોહિલમાં NSUI ચૂંટણી લડે છે. વિદ્યાર્થી સંઘની ચૂંટણીમાં ઇન્દ્રવિજયસિંહનો દબદબો યથાવત છે.