પ્રજાનું ગૌરવ / જે કામ સરકાર ના કરી શકી તે મોરબીના એક કોન્સ્ટેબલે કરી બતાવ્યું

• ટ્રાફિક પોલીસ જ મોરબીમાં રોડ રીપેર કરે છે
• ટ્રાફિક નિયમો સાથે સાથે સવલતો પણ જરુરી છે
• વરસાદમાં સૌથી વધુ અકસ્માત થાય છે જેને કારણે ટ્રાફિક વધે છે

એક બાજુ કેન્દ્રથી લઈને રાજ્ય સુધીમાં ટ્રાફિક રુલ્સ કસોકસ થઈ ગયા છે પરંતુ રસ્તાઓની બિસ્માર હાલત ઠેરની ઠેર છે. જો કે આ સમસ્યાઓની વચ્ચે મોરબીમાં છેલ્લાં બે વર્ષથી ટ્રાફિક પોલીસના હેડ કોન્સ્ટેબલ દેવજીભાઈ એક ભગીરથ કામ કરી રહ્યા છે. સામાન્ય રીતે ટ્રાફિક પોલીસનું કામ ટ્રાફિક સંભાળવાનું હોય પણ મોરબીના દેવજી ભાઈ દામજીભાઈ બાવરવા રોડ રસ્તાના ખાડા પૂરીને તેમના પોઈન્ટ પાસેના રસ્તા પણ ચકાચક રાખે છે. તેમનું કહેવું છે કે, રસ્તામાં ખાડા કે ગાબડાં હોય તો કોઈ પડેને એક્સિડેન્ટ થાય અને વળી  ટ્રાફિક જામ થાય. એના કરતાં સારુ છે ને કે આપણે જ ખાડા પૂરી દઈએ.

મોરબીનું સૌથી વધુ ટ્રાફિક ધરાવતો પોઈન્ટ છે રવાપર

સામાન્ય રીતે વાર-તહેવારે લોકો પરિવાર સાથે રજાની મજા માણતા હોય, શહેરમાં રોજ કરતા વધુ ટ્રાફિકની અવરજવર હોય ત્યારે પોલીસકર્મી ઘર-પરિવાર-બાળકોથી દૂર રહી નાગરિકોની સેવામાં રત રહેતા હોય છે. રવાપર રોડ સ્થિત સ્વાગત ચોંકડીએ પાછલા 2 વર્ષથી ટ્રાફિક પોલીસમાં હેડ કોન્સ્ટેબલ તરીકે કાર્યરત દેવજીભાઈ દામજીભાઈ બાવરવા ફરજ બજાવે છે. આ ચોકડી ટ્રાફિકથી વ્યસ્ત ચોકડી માંહેની એક છે. મોરબીમાં કદાચ આ ચોકડી પર સહુથી વધુ ટ્રાફિક રહે છે અને આથી જ અહીં ટ્રાફિક કંટ્રોલ કરવો સહુથી મુશ્કેલ છે.

થોડો વરસાદ આવે ને ચોકડી આસપાસ ઠેર-ઠેર ખાડા પડી જાય છે

વિસ્તારમાં ચોકડી પર વરસાદની ઋતુમાં ઠેર ઠેર મોટા ખાડા પડી જવાથી વાહન ચાલકોને પારાવાર હાલાકી ભોગવવી પડતી હોય છે. ત્યારે તંત્રની મદદ વગર હેડ.કોન્સ. દેવજીભાઈ જાતે મોરમ કે ઝીણી કપચી પાથરી એ ખાડાઓને સમથળ કરે છે. પોતે જે સ્થળે ફરજ બજાવે છે એ સ્થળનો ટ્રાફિક સરળતાથી ચાલે અને વાહન ચાલકોને કોઈ મુશ્કેલી ન પડે એ માટે તેઓ યેનકેન પ્રકારે સતત કાર્યરત રહે છે. 

હું નહીં મારી આખી ટીમ મારી પડખે છેઃ દેવજીભાઈ

vtvgujarati.com સાથે વાત કરતાં તેમણે જણાવ્યું કે, ' ટ્રાફિક પોલીસ એ પબ્લિકની સહાય માટે છે અને સારા રસ્તા હોય તો ટ્રાફિક ન થાય એ પણ એક હકીકત છે. એટલે જ હું અમારા પોઈન્ટની ચોકડી પાસેના રસ્તા જાતે જ સુધારવા માંડું છું. મારી સાથે જયેશ મકવાણા, મેહૂલભાઈ, કલ્પેશભાઈ, ચાવડાભાઈ, રોહિતભાઈ મને આ તમામ સાથીદારો મારા કામમાં મદદ કરે છે. અમારો આશય ફક્ત એટલો જ હોય છે કે, કોઈને તકલીફ ન પડે. રોડ રસ્તા ઉપરથી સામાન્ય લોકો જ નહીં પરંતુ અમારા પરિવારજનો પણ પસાર થાય છે. 

હું ટ્રાફિક પોઈન્ટ પર હોઉં ત્યારે પણ હડબડીમાં કોઈ સિગ્નલ તોડે તો તેને શાંતિથી જ કહું છું કે મોટાભાઈ ઉભા રહો. ઘરે તમારી કોઈ રાહ જુએ છે. લોકો ગમે તેટલા ખારા(ગુસ્સે) થયા હોય તોય તેમનો ગુસ્સો પીગળી જાય છે. 

આવામાં આ પોતાની જવાબદારી સાથે માનવતાનું પણ કામ કરીને દેવજીભાઈ ખરેખર પ્રજા માટે તંત્રએ કરવાનું કામ પોતે કરી રહ્યાં છે તે બિરાદવવા લાયક છે.