આગાહી / આગામી 4થી 10 જુલાઇ ગુજરાતમાં 10 ઇંચ સુધી વરસાદ ખાબકશે, ઉત્તર ગુજરાતમાં પૂરની શક્યતા!

• ગુજરાતમાં 4 જુલાઇથી 10 જુલાઇ સુધી વરસાદની આગાહી
• અઠવાડિયા દરમિયાન રાજ્યમાં હળવાથી ભારે વરસાદની આગાહી
• સૌરાષ્ટ્ર, મધ્ય, ઉત્તર અને દક્ષિણ ગુજરાતમાં ભારે વરસાદની આગાહી

4 જુલાઇથી 10 જુલાઇ સુધી સૌરાષ્ટ્ર, મધ્ય, ઉત્તર અને દક્ષિણ ગુજરાતમાં ભારે વરસાદ વરસશે. હવામાન વિભાગની આગાહી અનુસાર, આગામી તારીખ 5-6 જુલાઇએ ઉત્તર-મધ્ય અને દ. ગુજરાતમાં ભારે વરસાદ વરસશે. તો 6-7 જુલાઇએ ગુજરાતનાં ઉપરવાસ અને રાજસ્થાનમાં ભારે વરસાદ વરસવાની હવામાન વિભાગે આગાહી કરી છે. બીજી બાજુ 8-9-10 જુલાઇએ સૌરાષ્ટ્ર અને દક્ષિણ ગુજરાતમાં પણ ભારે વરસાદની હવામાન વિભાગે આગાહી કરી છે.

દ્વારકાના દરિયામાં ભારે કરંટના કારણે ગોમતીઘાટના કિનારે ઉંચા મોજા ઉછળ્યા

મહત્વનું છે કે, આજ રોજ રાજ્યમાં દ્વારકાના દરિયામાં ભારે કરંટના કારણે ગોમતીઘાટના કિનારે ઉંચા મોજા ઉછળ્યા છે. ભારે પવન સાથે દરિયો ગાંડોતુર બન્યો છે. ગોમતી ઘાટ અને ભડકેશ્વર સહિતના વિસ્તારમાં ઉંચા મોજા ઉછળતા જોવા મળ્યા છે.

બીજી બાજુ આજ રોજ રાજ્યમાં વડોદરાના સમા વિસ્તારમાં વરસાદ વરસતા વરસાદી પાણી ભરાઇ ગયા છે. શહેરના સ્પોર્ટ્સ કોમ્પલેક્ષમાં ઢીંચણ સુધી પાણી ભરાઇ ગયા છે. અનેક વાહનો પાણીમાં પલળવાથી ખોટકાયા. રોડ ઉપર પાણી ભરાતા વાહનચાલકોએ ભારે મુશ્કેલીનો સામનો કરવો પડી રહ્યો છે.

ગીર સોમનાથ અને દીવના દરિયામાં પણ આજે કરંટ જોવા મળ્યો

તો ગીર સોમનાથ અને દીવના દરિયામાં પણ આજે કરંટ જોવા મળ્યો. 2 દિવસના વરસાદ બાદ દરિયાકાંઠે ભારે પવન જોવા મળી રહ્યો છે. અરબી સમુદ્રમાં ઊંચા મોજા ઉછળ્યા છે. 5થી 7 ફૂટ ઊંચા મોજા ઉછળતા તંત્ર એલર્ટ થઇ ગયું છે. માછીમારોને દરિયા ખેડવા પર પણ પ્રતિબંધ મૂકી દેવાયો છે. દરિયામાં ભારે કરંટ હોવા છતાં સહેલાણીઓનો ભારે જમાવડો જોવા મળ્યો છે. ભાવનગરમાં પણ આજે પવન સાથે વરસાદનું આગમન થયું છે. ત્યારે ભરબપોરે વાદળછાયા વાતાવરણ બાદ વરસાદ શરૂ થઇ ગયો. વરસાદમાં નાચતા કૂદતા બાળકો નજરે પડ્યા. 
મહત્વનું છે કે, ગુજરાતમાં ભારે વરસાદની આગાહી વચ્ચે તંત્ર એલર્ટ થઇ જતા વડોદરાના જરોદ NDRFની 6 ટીમો રાજ્યના વિવિધ વિસ્તારમાં રવાના થઇ ગઇ છે. ગુજરાત રિલીફ કમિશનરે NDRFની 6 ટીમો સ્ટેન્ડબાય કરી દીધી છે.

Vadodara, Gujarat | NDRF 6th battalion deployed at Jarod near Vadodara to deal with the flood situation pic.twitter.com/ihsGF5TLhy

— ANI (@ANI) July 3, 2022

જરોદ NDRFની 6 ટીમો રાજ્યના વિવિધ વિસ્તારમાં રવાના
 
ભારે વરસાદની આગાહીના પગલે NDRFની ટીમો રાજ્યના વિવિધ વિસ્તારમાં રવાના કરી દેવાઇ છે. વડોદરાના જરોદ NDRFની 6 ટીમો રાજ્યના વિવિધ વિસ્તારમાં રવાના થઇ ગઇ છે. જેમાં રાજકોટમાં 2, બનાસકાંઠામાં એક અને ભુજમાં એક ટીમ મોકલવામાં આવી છે. સંભવિત બચાવ-રાહત કાર્ય ઝડપથી થાય તે માટેની તંત્ર દ્વારા વ્યવસ્થા કરાઈ છે.