ગુજરાત ટાઇટન્સની ટીમે CM ભૂપેન્દ્ર પટેલ સાથે કરી શુભેચ્છા મુલાકાત, 5.30 વાગ્યે ભવ્ય રોડ શોનું આયોજન
ગુજરાત ટાઇટન્સની ટીમે CM હાઉસ ખાતે ભૂપેન્દ્ર પટેલ સાથે કરી મુલાકાત
IPL 2022માં ગુજરાત ટાઈટન ટીમની જીત
હાર્દિક પંડ્યાની કેપ્ટન્સીમાં ટીમે જીત્યું ટાઇટલ
ગઇ કાલે રવિવારના રોજ અમદાવાદના નરેન્દ્ર મોદી સ્ટેડિયમમાં IPL 2022ની ફાઇનલમાં ગુજરાત ટાઇટન્સ્સનો ભવ્ય વિજય થયો હતો. ગુજરાત ટાઇટન્સ્સે રાજસ્થાન રોયલ્સને 7 વિકેટથી હરાવ્યું હતું. ત્યારે આ ભવ્ય વિજય બાદ આજે ગુજરાત ટાઇટન્સ્સની ટીમે સીએમ ભૂપેન્દ્ર પટેલની શુભેચ્છા મુલાકાત કરી છે. CM હાઉસ ખાતે આખીય ગુજરાત ટાઈટન્સની ટીમ પહોંચી છે. સીએમ પટેલે પણ ભવ્ય જીત બદલ તમામ ખેલાડીઑને શુભકામના પાઠવી હતી. આ મુલાકાત દરમિયાન ગૃહરાજ્યમંત્રી હર્ષ સંઘવી પણ હાજર રહ્યા હતા.
Live: IPL-2022 માં વિજેતા ગુજરાત ટાઈટન્સની ટીમને મળીને શુભેચ્છા પાઠવતા માનનીય મુખ્યમંત્રી શ્રી ભૂપેન્દ્રભાઈ પટેલ. https://t.co/ozkOF4MRJK
ખેલાડીઓને પરંપરાગત પટોળા ભેટ આપ્યા
મુખ્યમંત્રી ભૂપેન્દ્ર પટેલે IPL-૨૦૨૨ ક્રિકેટ ટુર્નામેન્ટની વિજેતા ટીમ 'ગુજરાત ટાઇટન્સ'ના ખેલાડીઓને મુખ્યમંત્રી નિવાસે આમંત્રીત કરી ગુજરાતની જનતા - જનાર્દન વતી ભાવભર્યું સન્માન કર્યું હતું. મુખ્યમંત્રીએ યુવા, રમત-ગમત અને સાંસ્કૃતિક વિભાગના મંત્રી હર્ષદભાઈ સંઘવીની ઉપસ્થિતિમાં વિજેતા ખેલાડીઓને પાટણના પરંપરાગત પટોળા ભેટ આપી તેમનું સ્વાગત કર્યું હતું, ત્યારબાદ મુખ્યમંત્રીએ સૌ ખેલાડીઓ સાથે સાથે વાર્તાલાપ કર્યો હતો. આ અભિવાદન સમારોહમાં મુખ્યમંત્રી ભૂપેન્દ્ર પટેલે કહ્યું કે, ગુજરાત ટાઇટન્સ ટીમે તેની ડેબ્યૂ ટુર્નામેન્ટમાં વિજેતા બની સૌ ગુજરાતીઓને ગૌરવ અપાવ્યું છે. ગુજરાત ટાઇટન્સ ટીમને વિજેતા બનતા જોઇને દરેક ગુજરાતીની છાતી ગર્વથી ફુલી જાય તેવો માહોલ ફાઇનલ મેચમાં સર્જાયો હતો.
ખેલાડીઑ સાથે મેચના રોમાંચક પળોની વાત જાણી
મુખ્યમંત્રી ભૂપેન્દ્ર પટેલે ફાઇનલ મેચની રોમાંચક પળો વિશે ખેલાડીઓ સાથે વાત કરી હતી સાથે-સાથે બાળપણમાં ક્રિકેટ રમવાના તેમના સંસ્મરણો પણ તાજા કર્યા હતા.ગુજરાત ટાઇટન્સ ટીમના ખેલાડીઓએ સોશિયલ કોઝ માટેની પ્રસંશનીય પહેલ કરતા ટીમના બધા જ ખેલાડીઓના હસ્તાક્ષર કરેલું ‘ બેટ ’ મુખ્યમંત્રી ભૂપેન્દ્ર પટેલને આપ્યુ હતું. આ બેટની હરાજી વેચાણમાંથી થનારી આવક રાજ્યની દિકરીઓના શિક્ષણ - કન્યા કેળવણી માટે વપરાશે. ગુજરાત ટાઇટન્સના કેપ્ટન હાર્દિક પંડ્યાએ ટીમની જીત પાછળનો સફળતા મંત્ર વર્ણવતા કહ્યું કે, વિશ્વના સૌથી મોટા ક્રિકેટ સ્ટેડિયમ નરેન્દ્ર મોદી સ્ટેડિયમમાં એક લાખથી વધારે ગુજરાતી પ્રેક્ષકોએ ઉત્સાહ વર્ધન કર્યું તેનાથી એક અલગ જ ઉર્જા સૌ ખેલાડીઓને મળી હતી.
કાર્યક્રમમાં કોણ કોણ રહ્યું હાજર?
મુખ્યમંત્રી સમક્ષ ટીમના કોચ આશિષ નેહરા, વાઈસ કેપ્ટન રાશિદ ખાન, ઓપનર શુભમન ગીલ તથા રિદ્ધિમાન સાહા વગેરે ખેલાડીઓએ પોતાના અનુભવો વર્ણવ્યા હતા, આ ખેલાડીઓએ ગુજરાતી ખાનપાન, મહેમાનગતિ અને ગુજરાતી પ્રેક્ષકોના ઉત્સાહને વખાણ્યા હતા. મુખ્યમંત્રી ભૂપેન્દ્ર પટેલ સમક્ષ ગુજરાત ટાઇટન્સના ખેલાડીઓએ IPL ટ્રોફી પ્રસ્તુત કરી હતી. ટીમના કેપ્ટન હાર્દિક પંડ્યાએ તેમના સૌ ખેલાડીઓનો પરિચય મુખ્યમંત્રીને કરાવ્યો હતો, આર.જે. ધ્વનિતે મોડરેટરની ભૂમિકા નિભાવી હતી.અભિવાદન સમારોહમાં મુખ્યમંત્રીના મુખ્ય અગ્રસચિવ કૈલાસનાથન, અધિક મુખ્ય સચિવ પંકજ જોશી, સચિવ મતી અવંતિકા સિંઘ પણ ઉપસ્થિત રહ્યા હતાં.
IPL 15માં ગુજરાત ટાઇટન્સનું શાનદાર પ્રદર્શન
ઈન્ડિયન પ્રીમિયર લીગ 2022ના રવિવારે રમાયેલા સૌથી મોટા મુકાબલા એટલે કે ફાઇનલ મેચમાં પોતાના જ હોમ ગ્રાઉન્ડમાં રમાયેલી મેચમાં ગુજરાત ટાઇટન્સે રાજસ્થાન રૉયલ્સને 7 વિકેટથી હરાવીને ટ્રોફી જીતી લીધી છે. જીત માટે મળેલા 131 રનના ટાર્ગેટનો પીછો કરવા ઉતરેલી ગુજરાત ટાઇટન્સની શરૂઆત ખરાબ રહી હતી અને 2 વિકેટ જલ્દીધી પડી ગયા હતા. પરંતુ બીજા ઓપનર શુભમન ગિલ(અણનમ 45)એ મોરચો સંભાળ્યો, તો કેપ્ટન હાર્દિક પંડ્યા(34)એ પણ પોતાનું સારુ યોગદાન આપ્યું. ત્યારે ગત કેટલીક મેચોની જેમ ડેવિડ મિલ(32)એ પણ સારી બેટિંગ કરતા 18.1 ઓવરોમાં 7 વિકેટ અને 11 બોલ બાકી રહેતા ગુજરાત ટાઇટન્સને તેના પહેલા જ પ્રયાસમાં આઈપીએલનું ચેમ્પિયન બનાવી દીધું છે.ગુજરાતે આ સિઝનમાં 16માંથી 14 મેચ જીતી છે.
રાજસ્થાન રૉયલ્સને બોલિંગ પાવરથી પછાડ્યું
આ પહેલાં ગુજરાતે પહેલા બોલિંગ કરતા રાજસ્થાન રૉયલ્સને માત્ર 130 રનો પર જ રોકી દીધા હતા. પહેલા બેટિંગ કરતા રાજસ્થાનના ઓપનરોએ સારી અને ઝડપી શરૂઆત કરવાનો પ્રયત્ન કર્યો, પરંતુ દર વખતની જેમ જ યશસ્વી જયસવાલ(22) રન બનાવીને આઉટ થયા, પરંતુ પહેલી વિકેટ પડી તો રાજસ્થાનનો કોઈ પણ બેટ્સમેન પિચ પર ન ટકી શક્યો. કેપ્ટન સંજૂ(14) સસ્તામાં પેવેલિયન ભેગા થયા તો દેવદત્ત(2) પણ કંઇ ખાસ ન કરી શક્યા. પરંતુ જ્યારે રાજસ્થાનનો આખો પ્લાન જમીનદોસ્ત થઇ ગયો. અહીંથી કોઇ બેટ્સમેન બટલરના નુકસાનની ભરપાઇ ન કરી શક્યું. હાર્દિક પંડ્યાએ સારી બોલિંગ કરી. પરિણામ એ રહ્યું કે રાજસ્થાન 20 ઓવરમાં 9 વિકેટ પર 130 રન જ બનાવી શક્યું. હાર્દિકે ત્રણ વિકેટ ઝડપી.