એન્કાઉન્ટર સ્પેશ્યલિસ્ટ તરીકે જાણીતા પોલીસ અધિકારી દયા નાયકે મુંબઈમાં ઘાતક હથિયારો સાથે 3 ગુજરાતીને ઝડપ્યા છે. દયા નાયકને બાતમી મળી હતી કે, મુંબઈમાં ગુજરાતથી કેટલાક લોકો આવ્યા છે જેમની પાસે ઘાતક હથિયારો છે.
મુંબઈમાં ઘાતક હથિયારો સાથે ઝડપાયા 3 ગુજરાતી
એન્કાઉન્ટર સ્પેશ્યલિસ્ટ તરીકે જાણીતા પોલીસ અધિકારી દયા નાયકે ઝડપ્યા
દુબઈ, યુગાંડા અને પાકિસ્તાનમાં કરોડોના હવાલા પાડતા હતા શખ્સો
મુંબઇના અંધેરીમાં સીટી મોલ નજીક મહારાષ્ટ્ર ATSના એન્કાઉન્ટર સ્પેશ્યલિસ્ટ દયા નાયકે ગુજરાત પાસિંગની કાર રોકી હતી. કારની તપાસ કરતા ત્રણેય શખ્સો હથિયાર સાથે ઝડપાયા હતા. આ શખ્સો પાસેથી 2 લોડેડ પિસ્તોલ અને 3 લાખ રૂપિયા મળી આવ્યા હતા. ATSની ટીમ ત્રણેયને જુહુ ઓફિસ લઇ ગઇ હતી. આ દરમિયાન તેમની પૂછપરછ કરતા ત્રણેય રાજકોટના ધોરાજીના વતની હોવાનું ખુલ્યું છે. આ ત્રણેય શખ્સોના નામ મહોમ્મદ યુનુસ ધુણેજા, સૈયદ સોહેલ મીયા અને ઈલિયાસ માજોઠી હોવાનું જાણવા મળ્યું છે.
દુબઈ, યુગાંડા અને પાકિસ્તાનમાં કરોડોના હવાલા પાડતા હતા શખ્સો
આ શખ્સો પાસેથી 2 લોડેડ પિસ્તોલ અને રૂ.3 લાખ કબ્જે કરાઇ હતી. ત્યારબાદ ATSએ વધુ તપાસ હાથધરતા 14 જેટલા મોબાઈલ મળી આવ્યા હતા. પોલીસે આ મોબાઇલ ફોનની તપાસ કરતા દુબઇ, પાકિસ્તાન અને યુગાન્ડાથી કરોડો રૂપિયાના હવાલાઓ પાડવામાં આવ્યા હોવાનો પર્દાફાશ થયો છે. પોલીસનું માનવું છે કે, ગુજરાતના આ ત્રણેય યુવકો હવાલા રેકેટ ચલાવી રહ્યા હતા અને જે માટે તેમણે મુંબઈના મીરા રોડ પર એક ફ્લેટ પણ રાખ્યો હતો. જ્યાંથી તેઓ પોતાનો કારોબાર ચલાવતા હતા. ઈલિયાસ માજોઠી સામે ગુજરાતમાં પણ હત્યાના પ્રયાસનો ગુનો નોંધાયેલો છે. હાલ આ ત્રણેય વિરૂદ્ધ મુંબઈ પોલીસ વધુ તપાસ કરી રહી છે.