ચેતવણી / પોલીસ કર્મીએ ટ્રાફિકના નિયમનો ભંગ કર્યો તો તેની ખેર નથીઃ સુરત પોલીસ કમિશનર

• ટ્રાફિકના દંડ સિવાય પોલીસકર્મી પાસેથી એક હજારનો વધુ દંડ વસુલ
• સુરત પોલીસ કમિશનરે પોલીસકર્મીઓ માટેનો એક પરિપત્ર જાહેર કર્યો
• વળી કાનૂની કાર્યવાહી તો કરવામાં આવશે જ

ટ્રાફિકના નવા નિયમ સોમવારથી લાગૂ થવા જઈ રહ્યા છે. આ પહેલા રાજ્યના અનેક પોલીસકર્મીઓના ટ્રાફિક નિયમ ભંગ કરતા વીડિયો સામે આવ્યા છે. ત્યારે હવે સુરત પોલીસ કમિશનરે પોલીસકર્મીઓ માટેનો એક પરિપત્ર જાહેર કર્યો છે. આ પરિપત્રથી પોલીસકર્મીઓને ટ્રાફિકના નિયમ પાલન કરવાના આદેશ આપવામાં આવ્યા છે. જો કોઈ પોલીસકર્મી ટ્રાફિકના નિયમનો ભંગ કરશે તો કાયદેસર દંડ આપીને કાર્યવાહી હાથ ધરવામાં આવશે. વળી ટ્રાફિકના દંડ સિવાય પોલીસકર્મી પાસેથી એક હજારનો વધુ દંડ વસુલવામાં આવશે. 

શું છે સુરત પોલીસ કમિશનરના પરિપત્રમાં
સામાન્ય નાગરિક કરતા પણ કાયદાનું પાલન કરવાની જવાબદારી પોલીસકર્મીની વધુ છે ત્યારે સુરતના કમિશનરે પોલીસકર્મીઓ માટેના પરિપત્રમાં સ્પષ્ટ જણાવ્યું છે કે, જો તમે ટ્રાફિક રૂલ્સ તોડશો તો તમારે તે અંગે તો દંડ ચૂકવવો જ પડશે પરંતુ રૂા. 1000નો વધારાનો દંડ વસૂલવામાં આવશે. વળી કાનૂની કાર્યવાહી તો કરવામાં આવશે જ.