વિરોધ / ગુજરાત રાજ્ય કર્મચારી સંકલન સમિતિ આકરા પાણીએ, સાતમા પગારપંચના બાકીના લાભો મામલે ઉચ્ચારી આંદોલનની ચીમકી

• ગુજરાતમાં એકબાદ એક આંદોલનના ભણકારા
• તલાટીની હડતાળ સમેટાઇ ત્યાં નવુ આંદોલન 
• રાજ્ય કર્મચારી સંકલન સમિતિ દ્વારા આંદોલનની ચીમકી

ગુજરાત વિધાનસભાની ચૂંટણી નજીક આવી રહી છે તેમ રાજ્યમાં એક બાદ એક આંદોલન વેગ પકડી રહ્યા છે. માજી સૈનિકોનું આંદોલન, પોલીસ ગ્રેડ પે માટેનું આંદોલન, ત્યારબાદ તલાટીઓની હડતાળ સમેટાઇ ત્યારે હવે વીસીઇ પણ આંદોલનના માર્ગે ઉતર્યુ છે. જો કે આટલુ ઓછુ હોય તેમ વધુ એક આંદોલનના ભણકારા વાગી રહ્યા છે. 

રાજ્ય કર્મચારી સંકલન સમિતિની આંદોલનની ચીમકી

ગુજરાત રાજ્ય કર્મચારી સંકલન સમિતિ દ્વારા આંદોલનની ચીમકી ઉચ્ચારવામાં આવી.  સાતમા પગારપંચના બાકીના લાભો મામલે આંદોલનની ચીમકી ઉચ્ચારવામાં આવી.  સાતમા પગાર પંચ સહિતની 14 જેટલી માંગણીઓને લઇને રાજ્યના 10 લાખ કર્મચારી અને પેન્શનરો વતી આંદોલન કરશે. જો કે હજી ક્યાં અને ક્યારે આંદોલન કરાશે તે જાણવા મળ્યુ નથી પરંતુ  આગામી સમયમાં વિરોધ કાર્યક્રમો અંગે સમિતિ જાહેરાત કરશે. ગાંધીનગરમાં રાજ્ય કર્મચારી સંકલન સમિતિની બેઠક મળી હતી જેમાં કર્મચારીઓની અલગ અલગ 14 માંગણીઓ પર ચર્ચા કરવામાં આવી હતી. 

હવે VCE આંદોલનના માર્ગે 

તલાટીઓની હડતાળ પૂરી થઇ તો હવે VCE  પડતર પ્રશ્નોને લઇને આંદોલનનો માર્ગ અપનાવશે. 24 ઑગષ્ટના રોજ કાળી પટ્ટી ધારણ કરીને ફરજ પર હાજર થશે. જ્યારે 26 ઑગષ્ટના રોજ સોશિયલ મીડિયામાં સરકાર સામે ઝુંબેશ ચલાવશે.  30 ઑગષ્ટે પછી આંદોલન વધુ આકરુ બનાવશે. છેલ્લા ઘણા વર્ષોથી વીસીઇ માત્ર કમિશનથી જ કામ કરે છે.