'રસ્તો' ક્યારે / અમદાવાદના 50થી 80% રોડ ખરાબ હોવાનો હાઈકોર્ટમાં રિપોર્ટ, GSLSAના ખુલાસાથી AMCના દાવા ધોવાયા

• અમદાવાદના સ્માર્ટ રસ્તાની હાઇકોર્ટમાં પોલ ખુલી, 
• શહેરમાં 50થી 80% રોડ ખરાબ હોવાનો કોર્ટમાં રિપોર્ટ 
• ગુજરાત સ્ટેટ લીગલ સર્વિસ ઓથોરિટીના રિપોર્ટમાં ખુલાસો

અમદાવાદ શહેરમાં તંત્રના પાપે શહેરની સ્માર્ટસિટીની ઓળખ સામે ખતરો ઉભો થયો હોય તેવું દેખાઇ રહ્યું છે. શહેરમાં ઉત્તર અને પશ્ચિમ વિસ્તારને જોડાતા માર્ગ પર કતારબદ્ધ ખાડા તંત્રના પોકળ દાવાની ચાડી ખાઈ રહ્યા છે.

શહેરમાં 50થી 80% રોડની ખસ્તાહાલત
ત્યારે હવે AMCના દાવાઓની હાઇકોર્ટમાં પોલ ખુલી છે, અમદાવાદ શહેરમાં બિસ્માર રોડ હોવાનો કોર્ટમાં રિપોર્ટ સોંપાયો છે. ગુજરાત સ્ટેટ લીગલ સર્વિસ ઓથોરિટીના રિપોર્ટમાં મોટો ખુલાસો થયો છે કે શહેરમાં 50થી 80% રોડ ખરાબ છે. તેમાં પણ ખાસ કરીને ઉત્તર પશ્ચિમ ઝોનમાં રસ્તાઓ પર ખાડાઓની ભરમાર છે.

ટેક્સના રૂપિયાનું પાણી
જ્યારે દેશનો નાગરીક વાહન ખરીદે છે ત્યારે જ તે રોડ ટેક્સ કોર્પોરેશનને ચુકવી દેતો હોય છે. જેના બદલામાં કોર્પોરેશને તેને રોડની સુવિધા આપવાની હોય છે. ત્યારે કોર્પોરેશન તેમને સુવિધાની જગ્યાએ કમરતોડ રસ્તાની ભેટ આપે છે.

અમદાવાદમાં અનેક જગ્યાએ જોખમી રસ્તા પર ભૂવા પડ્યા
અમદાવાદ શહેર ભુવા નગર બની રહ્યું છે. કર્ણાવતી ક્લબ પાસે ત્રણ દિવસ પહેલા થયેલા ભારે વરસાદમાં મોટો ભૂવો પડ્યો છે.આજે ત્રણ દિવસના વાણા વિત્યા છતાં તંત્ર દ્વારા કોઈ પણ પ્રકારની કામગીરી કરવામાં આવી નથી.ફક્ત સાવધાન સાથેના કોર્ડન કરેલું નજરે પડી રહ્યું છે.પૂર્વમુખ્યમત્રી નીતિન પટેલના ઘર પાસે પડ્યો છે..એ પણ બે દિવસથી તંત્રના કામકાજની રાહ જોઈ રહ્યો છે.જેમાં પાણીની લાઈન પણ ડેમેજ થઈ છે.જેથી હજારો લીટર પાણી વહી રહ્યું છે, છતાં તત્ર દ્વારા કોઈ કામગીરી કરવા બદલે કોર્ડન કરી સંતોષ માની લેવામાં આવ્યો છે. પસાર થતાં રાહદારીઓ પરેશાની અનુભવી રહ્યા છતાં કોઈ ઉકેલ ન આવવાની વાત કરી રહ્યા છે.

તંત્રને નાગરીકોની સુરક્ષામાં નહી પોતાની કમાણીમાં રસ છે
ખાડાને કારણે ન ફક્ત શહેરીજનોનાં સ્વાસ્થયને અસર થાય છે  પણ તેમને આર્થિક રીતે પણ નુંકસાન જાય છે. જેમ કે તેમણે ખરીદેલા વાહનનું આયુષ્ય પણ ઘટે છે. વારંવાર બ્રેક લગાવાથી પેટ્રોલ વધારે વપરાય છે. વારંવાર નાના- મોટા ખાડામાં વાહન પછડાતા તેને ઇન્ટર્નલ પાર્ટ્સને પણ નુકસાન થાય છે. વારંવાર વાહનને સર્વિસ કરાવવાને કારણે નાગરીકોને આર્થિક માર પડી રહ્યો છે.

VTV ગુજરાતીના સળગતા સવાલ

• દર વર્ષે કેમ તૂટે છે રોડ?
• કેમ નથી થતું પાક્કુ પેચવર્ક?
• જનતા પરેશાન છે,તમે જોયા કરશો?
• ટેક્સની વસૂલાત પુરી, તો રસ્તો ચકાચક કેમ નહીં
• જનતાની મુશ્કેલીનું વળતર આપશો?
• આ ખાડા હાડકા તોડી નાંખે તેવા છે !
• વરસાદના બહાનાથી ક્યા સુધી બચશો?
• જનતાના રસ્તે પસાર થઇને તો જુઓ!
• આ ખાડા પસાર કરવા સહેલા નથી!
• કાગળ પર રસ્તા બનાવવાનું બંધ કરો!