માનવતા મહેંકી ઉઠી, સાબરકાંઠા પોલીસે તરછોડાયેલી બાળકીને બચાવી લીધી પણ બાળકીની હાલત હજુ ગંભીર
માનવતા હંમેશા મહેક્યા કરે છે તેની સુવાસ ક્યારે કયા બંજર ઝાડવામાંથી મહોરી ઉઠે તે નક્કી નહી. સાબરકાંઠામાં પણ આવો જ એક કિસ્સો સામે આવ્યો છે. સાત દિવસની માસૂમ બાળકી ત્યજાયેલી હાલતમાં મળી આવી છ. ત્યારે પોલીસ તંત્રએ આ બાળકી પોતાની માનીને તેની સમગ્ર જવાબદારી પોતાને માથે ઉઠાવી લીધી છે. સાબરકાંઠા પોલીસ બી ડિવિઝને આ બાળકી જાણે તેમની હોય તેમ તેની જાળવણી કરી રહી છે.
બેરહમ માતા-પિતા દ્વારા તરછોડાયેલી માસૂમની હાલત અત્યારે ગંભીર છે તેને સારવાર અર્થે અમદાવાદ ખસેડવામાં આવી છે આ મામલે હાલ તો માતા-પિતા સામે ગુનો નોંધીને તપાસ હાથ ધરી છે કુદરત પણ કેવી કમાલ કરે છે ક્યાંક ફર્ટીલીટી સેન્ટરના ધક્કા ખાધા બાદ પણ બાળકો નથી થતાં અને ઘણા ઘાતકી મા-બાપ પોતાના નવજાત શીશુને તરછોડી દે છે. સાબરકાંઠા પોલીસ આવી જ એક બાળકીની તારણહાર બની છે. હિમતનગરનો પોલીસ સ્ટાફ આ બાળકીની શ્વાસનળીની સર્જરી માટેનો તમામ ખર્ચ આપશે.
બેટી બચાવોના મોટા મોટા વાયદાઓ વચ્ચે હજુય બાળકીઓ પ્રત્યે સમાજની માનસિકતા બદલાયેલી નથી લાગતી.જો કે જેને રામ રાખે તેને કોણ ચાખે? ઉક્તિ આ બચાવી લેવાયેલી બાળકી માટે સાર્થક નીવડી છે. સાબરકાંઠા પોલીસ પોતાની પંડની જણી હોય તેમ બાળકીની તબિયતના સુધારા માટે પ્રયાસો કરી રહી છે અને પ્રભુને પણ પ્રાર્તના કરી રહી છે.