ગાંધીનગરઃ ગુજરાતમાં સ્થાનિક સ્વરાજની સંસ્થાઓની ચૂંટણીઓને લઇને કોંગ્રેસના સભ્યોમાં અસંતોષની લાગણી ફેલાઈ છે. તાલુકા પંચાયત જિલ્લા પંચાયત નગરપાલિકાઓની ચૂંટણીને લઇને કોંગ્રેસના સભ્યોમાં અસંતોષની લાગણી ફેલાઈ છે. જેથી કોંગ્રેસના પ્રભારીએ નારાજ સભ્યો સાથે સોમવારે બેઠક યોજી હતી.
નારાજ સભ્યોને મનાવવા પ્રભારીએ સ્થાનિક નેતાઓને સૂચના આપી હતી. નગરપાલિકાઓ હાથમાંથી જતા કોંગ્રેસે ડેમેજ કંટ્રોલ શરૂ કર્યુ છે. તાલુકા પંચાયત અને જિલ્લા પંચાયતો હાથમાંથી ન જાય તે માટે કોંગ્રેસે કવાયત શરૂ કરી દીધી છે. તાલુકા પંચાયત-જિલ્લા પંચાયતના સભ્યોને અજ્ઞાતવાસમાં મોકલાયા છે.
ઉલ્લેખનીય છે કે હાલમાં કોંગ્રેસ પાસે 230માંથી 146 તાલુકા પંચાયત છે. 33 જિલ્લા પંચાયતમાંથી 24 જિલ્લા પંચાયત કોંગ્રેસ હસ્તક છે.
ગોધરાઃ 7 અપક્ષ સભ્યોને અજ્ઞાત જગ્યાએ મોકલી દેવાયા
પંચમહાલના ગોધરા નગરપાલિકાના પ્રમુખ-ઉપપ્રમુખ ચૂંટણીના મામલે 7 અપક્ષ સભ્યોને અજ્ઞાત જગ્યાએ મોકલી દેવાતા રોષ વ્યાપ્યો છે. લાલચ આપીને ભાજપે અપક્ષના સભ્યોને મોકલ્યા હોવાનો આક્ષેપ કરવામાં આવ્યો છે. અન્ય અપક્ષ સભ્યોએ અજ્ઞાત સભ્યોના પૂતળા બાળ્યા હતાં. ગોધરા પાલિકાના પ્રમુખ ઉપપ્રમુખની ચૂંટણી યોજાશે.
બાયડમાં તાલુકા પંચાયતમાં કોંગ્રેસ સત્તા ગુમાવે તેવી પરિસ્થિતિ
અરવલ્લીના બાયડ અને ધનસુરા તાલુકા પંચાયતમાં ડખો જોવા મળ્યો છે. બાયડમાં તાલુકા પંચાયતમાં કોંગ્રેસમાં સત્તા ગુમાવે તેવી પરિસ્થિતિ જોવા મળી છે. બાયડના કોંગ્રેસના 16માંથી 5 સભ્યો ભાજપના સંપર્કમાં છે. તો બાયડ તાલુકા પંચાયતના કોંગ્રેસના પૂર્વ પ્રમુખ 15 દિવસથી ભૂગર્ભમાં ઉતર્યા છે.
ધનસુરામાં પણ કોંગ્રેસને સત્તા ખોવાનો ડર
બીજી તરફ ધનસુરામાં પણ કોંગ્રેસને સત્તા ખોવાનો ડર સતાવી રહ્યો છે. ધનસુરા તાલુકા પંચાયતમાં કોંગ્રેસના એક સભ્ય ભાજપના સંપર્કમાં હોવાનું બહાર આવ્યું છે. આ સમગ્ર પરિસ્થિતિ જોતા લાગે છે કે જિલ્લાની રાજનીતિમાં મોટા ઉલેટફેર થઈ શકે છે.
દેવભૂમિ દ્વારકા જિલ્લા પંચાયતના પ્રમુખની ચૂંટણીમાં નવો વળાંક
દેવભૂમિ દ્વારકા જિલ્લા પંચાયતના પ્રમુખની ચૂંટણીમાં નવો વળાંક સામે આવ્યો છે. કોંગ્રેસના સભ્યો સાથે ભાજપના એક સભ્ય ભૂગર્ભમાં ઉતરતા ભાજપમાં દોડધામ જોવા મળી. પરંતુ કોંગ્રેસ જિલ્લા પંચાયતમાં સત્તા જાળવી રાખે તેવી શક્યતા જણાય છે.
પાટણ જિલ્લા પંચાયત કોંગ્રેસના હાથમાંથી સરકી શકે
પાટણ જિલ્લા પંયાયત કોંગ્રેસના હાથમાંથી સરકે તેવી શક્યતાઓ સેવાઈ રહી છે. આવતીકાલે પાટણ જિલ્લા પંચાયતના પ્રમુખ-ઉપપ્રમુખની ચૂંટણી યોજાવાની છે. તે પૂર્વે જ પાટણ કોંગ્રેસમાં ભડકો જોવા મળ્યો. કોંગ્રેસમાં આંતરિક ડખો સામે આવ્યો છે. કોંગ્રેસમાંથી બાબુજી ઠાકોરે પ્રમુખ પદ માટે ઉમેદવારી નોંધાવી છે.
તો ભાજપમાંથી કોંગ્રેસના જ સભ્ય વિનુ પ્રજાપતિએ ઉમેદવારી નોંધાવી છે. ત્યારે જોવું રહ્યું કે પાટણ જિલ્લા પંચાયત કોંગ્રેસના હાથમાં રહે છે કે પછી ભાજપ આ બેઠક પોતાના નામે કરવામાં સફળ રહે છે.