દિલ્હી વિધાનસભા ચૂંટણીને લઇ ભાજપ, આમ આદમી પાર્ટી અને કોંગ્રેસ દ્વારા જોરશોરથી પ્રચાર પ્રસાર ચાલી રહ્યો છે. ત્યારે ગુજરાતમાં આ વર્ષે રાજ્યસભાની 4 બેઠકો માટે ચૂંટણી યોજાશે. ત્યારે આ ચૂંટણીમાં ભાજપને એક બેઠક ગુમાવવાનો વારો આવી શકે છે. હાલની સ્થિતિએ કોંગ્રેસને 1 બેઠકનો ફાયદો થઈ શકે છે. જેથી કોંગ્રેસ પાસે બે બેઠક રહેશે તેવી શક્યતાઓ છે.
એપ્રિલ 2020માં જામશે રાજ્યસભાનો જંગ
ગુજરાતની 4 રાજ્યસભાની બેઠકો પડશે ખાલી
હાલની સ્થિતિએ કોંગ્રેસને 1 બેઠકનો થશે ફાયદો
આગામી એપ્રિલ મહિનામાં ગુજરાતમાંથી રાજ્યસભામાં ગયેલા ચાર સાંસદો જેમાં ભાજપ સાંસદ ચુની ગોહેલ, કોંગ્રેસ સાંસદ મધુસુદન મિસ્ત્ર, ભાજપ સાંસદ લાલસિંહ વાડોદીયા અને શંભુ પ્રસાદ ટુંડિયાનો કાર્યકાળ પુરો થઈ રહ્યો છે. આ ચાર સભ્યોમાં ત્રણ ભાજપના અને એક કોંગ્રેસના છે. જો એક સાથે આ 4 બેઠકોની ચૂંટણી થાય તો ભાજપ એક બેઠક ગુમાવી શકે છે અને કોંગ્રેસને એક બેઠકનો ફાયદો થઈ શકે છે. તેથી કોંગ્રેસ પાસે બે બેઠક રહેશે તેવી શક્યતાઓ વર્તાય રહી છે.
ભાજપ એક બેઠક ગુમાવી શકે છે
લોકસભાની 26 બેઠકમાંથી કોંગ્રેસ પાસે એકપણ બેઠક નથી, પરંતુ રાજ્યસભામાં ચાર બેઠક છે. જે વધીને પાંચ થઈ શકે તેમ છે. હાલ વિધાનસભામાં સંખ્યાબળ જોતા કોંગ્રેસ પાસે 72 સભ્યો છે જ્યારે ભાજપના 103 સભ્યો છે. જેના આધારે કોંગ્રેસને બે બેઠકો મળી શકે છે, એટલે કે ભાજપે ત્રણમાંથી એક બેઠક ગુમાવવી પડશે.
ભાજપ પાસે 7 અને કોંગ્રેસ પાસે 4 બેઠક
ગુજરાતમાં રાજ્યસભાની કુલ 11 બેઠક છે. જેમાંથી ભાજપ પાસે 7 અને કોંગ્રેસ પાસે 4 બેઠક છે. હાલ કોંગ્રેસમાંથી મધુસુદન મિસ્ત્રી, અહમદ પટેલ, અમી યાજ્ઞિક અને નારણ રાઠવા રાજ્યસભાના સભ્ય છે. કોંગ્રેસમાંથી રાજ્યસભામાં સૌથી વધુવાર જીતવાનો રેકોર્ડ અહમદ પટેલના નામે છે. અહમદ પટેલ કુલ પાંચ વાર રાજ્યસભાની ચૂંટણી જીતી ચૂક્યા છે.