ગુજરાત / આજનું નોરતું બગડયું! 45 તાલુકાઓમાં વરસાદે ઠોક્યો તાલ, જુઓ ક્યાં કેટલો

રાજ્યના વિવિધ વિસ્તારોમાં નવરાત્રીના સમયમાં વરસાદ વિઘ્ન બન્યો છે. આજે સવારે 6થી સાંજે 6 વાગ્યા સુધીમાં રાજ્યમાં 45 તાલુકાઓમાં વરસાદ નોંધાયો છે. જેમાં સૌથી વધુ ગીર સોમનાથના કોડીનારમાં 2.5 ઈંચ વરસાદ ખાબક્યો છે. જ્યારે નવસારીના ગણદેવીમાં 1.7 ઈંચ તેમજ ગીરસોમનાથના સુત્રાપાડામાં 1.25 ઈંચ વરસાદ વરસ્યો છે.

મહુવામાં 1.10 ઈંચ વરસાદ નોંધાયો

અત્રે જણાવીએ કે, ભાવનગરના મહુવામાં 1.10 ઈંચ જ્યારે નવસારીના ચીખલી અને ખેરગામમાં 1 ઈંચ તેમજ સુરતના મહુવા અને પલસાણામાં 1 ઈંચ વરસાદ વરસ્યો છે.

સુરતમાં વાતાવરણમાં પલટો

સુરતમાં અચાનક વાતાવરણમાં પલટો આવ્યો છે. શહેરના અનેક વિસ્તારોમાં ધોધમાર વરસાદ ખાબક્યો છે. મજૂરા ગેટ, અડાજણ, પાલ, ઉધના સહિતના વિસ્તારોમાં વરસાદે રમઝટ બોલાવી છે. મોડી સાંજે વરસાદ શરૂ થતા નવરાત્રી આયોજકો ચિંતામાં મુકાયા છે.

નવસારી જિલ્લામાં આઠમે નોરતે વરસાદ

નવસારી જિલ્લામાં આઠમે નોરતે વરસાદ વિધ્ન બન્યો છે. જિલ્લાના અનેક વિસ્તારો વરસાદ ખાબક્યો છે, ગણદેવી, બીલીમોરા તેમજ ચીખલી તાલુકામાં સાંબેલાધાર વરસાદ ખાબક્યો છે. ગાજવીજ અને ભારે પવન સાથે ધોધમાર વરસાદને કારણે ગરબા ગ્રાઉન્ડમાં પાણી ભરાયા છે. ગરબા ગ્રાઉન્ડમાં પાણી ભરાતા આયોજકો મૂંઝવણમાં મુકાયા છે.

આ પણ વાંચો: ગુજરાત સરકારની આ યોજના આદિવાસી સમુદાય માટે ટર્નિંગ પોઇન્ટ, 10 મુદ્દાઓથી મહત્વની સિદ્ધિઓ હાંસલ કરી

વલસાડમાં સતત બીજા દિવસે વરસાદી માહોલ

વલસાડ જિલ્લામાં સતત બીજા દિવસે વરસાદ ધરમપુર અને કપરાડા સહિત વિસ્તારોમાં વરસાદ વરસ્યો હતો. નવરાત્રીમાં વરસાદી માહોલથી ખેલૈયા અને ગરબા આયોજકોમાં ચિંતાનો માહોલ છવાયો હતો. વરસાદને કારણે ડાંગરના પાકને નુકસાન થવાની ભીતિથી ખેડૂતોમાં ચિંતાનો માહોલ છવાયો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ