આગાહી / ગુજરાત ચોમાસુ: આગામી પાંચ દિવસ વાતાવરણ રહેશે સુકૂં, ભારે પવન ફૂંકાવાની આગાહીને પગલે માછીમારો સતર્ક

• રાજ્યમાં 1 જૂનથી તાપમાનમાં થશે સામાન્ય વધારો
• હાલ રાજ્યમાં વરસાદી સિસ્ટમ સક્રિય નહીં
• ભારે પવન ફૂંકાવાની આગાહીને પગલે માછીમારો એલર્ટ 

કેરળમાં ચોમાસું બેસી ગયુ છે. ત્યારે હવે ગુજરાતમાં પણ વરસાદની ઘડીઓ ગણાઇ રહી છે.  ગુજરાતમાં 15 થી 20 જૂન વચ્ચે ચોમાસું બેસશે તેવી હવામાન વિભાગે આગાહી કરી છે. ત્યારે આગામી દિવસોમાં વાતાવરણને લઇને હવામાન વિભાગે જણાવ્યું કે  રાજ્યમાં 5 દિવસ વાતાવરણ રહેશે સૂકું રહેશે.  આગામી બે દિવસ તાપમાન કોઈ મોટો ફેરફાર જોવા મળશે નહિ.  1 જૂનથી તાપમાનમાં સામાન્ય વધારો થશે.

'હાલ વરસાદી સિસ્ટમ નહી'

મહત્વનું છે કે કેરળમાં ચોમાસાનું આગમન થઇ ગયું છે. કર્ણાટક સુધી પહોંચવામાં હજી 4 દિવસ લાગશે ત્યાર બાદ ત્યાંથી મહારાષ્ટ્ર પહોંચશે. પરિણામે હાલ પશ્ચિમી દિશામાંથી પવન ફૂંકાઈ રહ્યા છે. હાલ ગુજરાતમાં વરસાદી સિસ્ટમ સક્રીય થઇ નથી. જેથી હાલમાં પ્રિ મોનસૂન એક્ટિવિટી પણ મોટાપાયે જોવા નહિ મળે તેમ હવામાન વિભાગે જણાવ્યું હતું. 

દરિયામાં જોવા મળી રહ્યો છે કરંટ

તો આ તરફ હવામાન વિભાગે આગામી બે દિવસ દરિયો ન ખેડવાની સૂચના આપી છે.  દરિયાઇ વિસ્તારોમાં 50થી 60 કિમીની ઝડપે પવન ફૂંકાવાની શક્યતાને પગલે આ એલર્ટ આપવામાં આવ્યું છે. પરિણામે દરિયામાં કરંટ જોવા મળી રહ્યો છ.  જેના કારણે દમણના ફિશરીઝ વિભાગ દ્વારા માછીમારોને દરિયામાં ન જવા માટે સૂચના આપવામાં આવી છે.

સૂચના મળતાં જ દમણના માછીમારો દ્વારા પોતાની બોટને સલામત રીતે જેટી ઉપરચઢાવી દેવામાં આવી છે.  બોટને જેટી પર ચઢાવ્યા બાદ માછીમારો બોટનું સમારકામ કરી રહ્યા છે. અને આગામી ઓગસ્ટ પછી માછીમારી કરવા માટે બોટને સજ્જ કરી રહ્યા છે.