આજે દ. ગુજરાતના જિલ્લાઓમાં છૂટોછવાયો વરસાદ વરસશે જ્યારે ઉત્તર ગુજરાત, સૌરાષ્ટ્ર-કચ્છના જિલ્લાઓમાં વાતાવરણ સામાન્ય રહેશે.
દ. ગુજરાતના જિલ્લાઓમાં છૂટાછવાયા વરસાદની આગાહી
ઉત્તર ગુજરાતના જિલ્લાઓમાં વાતાવરણ આજે કોરુ રહેશે
ગુજરાતમાં 8થી 11 સપ્ટેમ્બર સુધી વરસાદની શક્યતા: અંબાલાલ
હવામાન વિભાગની આગાહી અનુસાર, આજે રાજ્યમાં દક્ષિણ ગુજરાતના જિલ્લાઓમાં છૂટાછવાયો વરસાદ પડશે. દમણ અને દાદરા નગર હવેલીમાં આજે છૂટો છવાયો વરસાદ વરસશે.
જ્યારે ઉત્તર ગુજરાતના જિલ્લાઓમાં વાતાવરણ આજે કોરુ રહેશે. આજે રાજ્યમાં બનાસકાંઠા, પાટણ, મહેસાણા, ખેડા અને અમદાવાદમાં વાતાવરણ ડ્રાય રહેશે. એ સિવાય સૌરાષ્ટ્ર-કચ્છના જિલ્લાઓમાં પણ વાતાવરણ આજે સામાન્ય રહેશે.
ગુજરાતમાં 4 દિવસ સારા એવા વરસાદની શક્યતા: આગાહી
ઉલ્લેખનીય છે કે, હવામાન વિભાગે ગુજરાતમાં 4 દિવસ ભારે વરસાદની આગાહી કરી છે. જેમાં આગાહી મુજબ દક્ષિણ ગુજરાત અને સૌરાષ્ટ્રમાં સારો એવો વરસાદ પડી શકે છે. દક્ષિણ ગુજરાતની વાત કરીએ તો દ. ગુજરાતમાં સુરત, નવસારી, તાપી અને ડાંગમાં સારો એવો વરસાદ પડવાની સંભાવના રહેલી છે. એ સિવાય છોટા ઉદેપુર અને સૌરાષ્ટ્રમાં અમરેલી, દ્વારકા, જૂનાગઢ, પોરબંદર અને ગીર સોમનાથમાં સારો એવો વરસાદ પડી શકે છે. જોકે, આજે ઉત્તર ગુજરાતના જિલ્લાઓમાં વાતાવરણ કોરુ રહેશે તેમજ સૌરાષ્ટ્ર-કચ્છના જિલ્લાઓમાં પણ વાતાવરણ આજે સામાન્ય રહેશે.
ગુજરાતમાં 8થી 11 સપ્ટેમ્બર સુધી વરસાદની શક્યતા
બીજી બાજુ હવામાન નિષ્ણાંત અંબાલાલ પટેલે વરસાદને લઇને આગાહી કરતા જણાવ્યું છે કે, તારીખ 30-31 ઓગસ્ટના રોજ રાજ્યના કેટલાક ભાગોમાં વરસાદ પડી શકે છે. સપ્ટેમ્બર મહિનાની શરૂઆતમાં વરસાદની શકયતા દર્શાવવામાં આવી છે. સપ્ટેમ્બરમાં બંગાળની ખાડીમાં હવાનુ હળવુ દબાણ ઉભુ થશે જેથી 8થી 11 સપ્ટેમ્બર સુધી વરસાદની શક્યતા છે. 23 સપ્ટેમ્બરથી ઓક્ટોબર સુધી ભારે ગરમી અનુભવાશે. જેના લીધે લોકલ સિસ્ટમ ઉભી થવાના વરતારા છે. નવરાત્રીના સમયમાં કેટલાક ભાગોમાં વરસાદની શક્યતા સેવાઇ છે. 10 થી 17 ઓક્ટોબર દરિયા કિનારાના ભાગોમાં પવનનુ જોર સાથે વરસાદ રહેશે. દિવાળી આસપાસ વાદળ, પવન ફૂંકાશે. ઓક્ટોબર-નવેમ્બરમા દક્ષિણ ભારતમાં ભારે વરસાદની શક્યતા અંબાલાલે કરી છે.
અત્યાર સુધીમાં કુલ ૧૦૦.૯૮ ટકા જેટલો વરસાદ વરસ્યો
તમને જણાવી દઇએ કે, ગુજરાતમાં ચોમાસાની સિઝનમાં અત્યાર સુધીમાં કુલ ૧૦૦.૯૮ ટકા જેટલો વરસાદ થયો છે જ્યારે ગત વર્ષે આ સમયે રાજ્યમાં ૪૨.૩૫ ટકા વરસાદ નોંધાયો હતો. રાજ્યમાં સાર્વત્રિક વરસાદના પરિણામે કુલ ૮૬ લાખ હેક્ટર વિસ્તારની સામે ચાલુ સિઝનમાં ૮૨ લાખથી વધુ હેક્ટર વિસ્તારમાં એટલે કે ૯૫ ટકાથી વધુ ખરીફ પાકનું વાવેતર થયું છે
ગુજરાતની જીવાદોરી સમાન સરદાર સરોવર ડેમની સપાટી 136.7 મીટર સુધી પહોંચી
રાહત કમિશનર હર્ષદભાઇ પટેલના અધ્યક્ષસ્થાને આજે સ્ટેટ ઇમરજન્સી ઓપરેશન સેન્ટર- SEOC ગાંધીનગર ખાતે વેધર વોચ ગ્રુપની બેઠક યોજાઇ હતી. રાજ્યના જળાશયોની વિગતો આપતાં જણાવ્યું હતું કે ઉપરવાસમાં ભારે વરસાદના પરિણામે ગુજરાતની જીવાદોરી સમાન સરદાર સરોવર ડેમની સપાટી ૧૩૬.૭ મીટર સુધી પહોંચી છે એટલે કે ડેમમાં ૯૩.૪૨ ટકા પાણીનો સંગ્રહ થયો છે. આ ઉપરાંત રાજયનાં ૨૦૬ જળાશયોમાં ૪,૪૨,૬૨૫એમ.સી.એફ.ટી.પાણીનો સંગ્રહ છે, જે કુલ સંગ્રહ શકિતના ૭૯.૩૦ ટકા જેટલો છે. હાલમાં રાજ્યમાં૯૮ જળાશય હાઇ એલર્ટ, ૧૮ જળાશય એલર્ટ અને ૧૪ જળાશય વોર્નિંગ ૫ર છે.