ગુજરાતમાં આગામી 5 દિવસ ભારે વરસાદની આગાહી વચ્ચે ગઇકાલે રાજ્યમાં સાર્વત્રિક વરસાદ વરસ્યો છે. જેને લઇને ખેડૂતોમાં ખુશીની લહેર જોવા મળી રહી છે. રાજ્યમાં અત્યાર સુધીમાં સિઝનનો 83.59 ટકા વરસાદ વરસ્યો છે. રાજ્યના 7 તાલુકાઓમાં 10 ઇંચથી ઓછો વરસાદ વરસ્યો છે. આમ છેલ્લા ઘણા દિવસથી રાજ્યમાં મેઘમહેર યથાવત જોવા મળી રહી છે.
રાજ્યમાં અત્યાર સુધીમાં સિઝનનો 83.59 ટકા વરસાદ
રાજ્યમાં 7 તાલુકાઓમાં 10 ઇંચથી ઓછો વરસાદ
સરદાર સરોવર ડેમમાં 54.48 ટકા પાણીનો જથ્થો
ગુજરાતમાં વરસાદી માહોલ જામ્યો છે. રાજ્યમાં અત્યાર સુધીમાં સિઝનનો 83.59 ટકા વરસાદ નોંધાયો છે. રાજ્યમાં 7 તાલુકાઓમાં 10 ઇંચથી ઓછો વરસાદ પડ્યો છે. જ્યારે રાજ્યની જીવાદોરી સમાન ગણાતાં સરદાર સરોવર ડેમમાં 54.48 ટકા પાણીનો જથ્થો છે.
રાજ્યના 205 જળાશયોમાં 64 ટકા કરતા વધુ જળસંગ્રહ છે. ભારે વરસાદથી 90 ટકાથી વધારે ભરાયા હોય તેવા 98 ડેમો હાઈઅલર્ટ પર છે. જ્યારે 80થી 90 ટકા ભરાયા હોય તેવા 9 ડેમો અલર્ટ પર છે. આ સાથે 70 ટકાથી વધારે ભરાયેલા 14 ડેમો વોર્નિંગ સ્ટેજ પર મુકાયા છે.
નર્મદા ડેમમાં 18,943 ક્યૂસેક પાણીની આવક થઇ રહી છે. જ્યારે ઉકાઈ ડેમમાં 68,699 ક્યૂસેક પાણીની આવક થઇ રહી છે. રાજ્યમાં 39 નદીઓ અને 44 તળાવો ઓવરફ્લો થયા છે.
ભારે વરસાદના કારણે છેલ્લા 5 દિવસમા 6,194 લોકોનું સ્થળાંતર કરવામાં આવ્યું છે. આ સાથે 3,213 લોકો ઘરે પરત ફર્યા છે. જ્યારે 2981 લોકો હજુ આશ્રયસ્થાન પર છે. રાજ્યના 323 રસ્તાઓ ભારે વરસાદના કારણે બંધ થઇ ગયા છે. હજુ પણ આગામી 5 દિવસ ભારે વરસાદની આગાહી કરવામાં આવી છે.