આગાહી / આગામી 24 કલાકમાં રાજ્યમાં કમોસમી વરસાદની હવામાન વિભાગની આગાહી, ખેડૂતોમાં ચિંતાનો માહોલ

• આજે પણ રાજ્યના જિલ્લાઓમાં કમોસમી વરસાદની આગાહી
• દક્ષિણ પાકિસ્તાન પર વેસ્ટર્ન ડિસ્ટર્બન્સથી હવામાનમાં પલટો
• સૌરાષ્ટ્ર, દ્વારકા, કચ્છ, બનાસકાંઠા, પોરબંદરમાં વરસાદની આગાહી

રાજ્યમાં હવામાન વિભાગની કમોસમી વરસાદની આગાહી વચ્ચે ગઇકાલે રાજ્યના અનેક જિલ્લામાં કમોસમી વરસાદ પડ્યો હતો. જેને લઇને રાજ્યના ખેડૂતોની ચિંતામાં વધારો જોવા મળ્યો છે.
 

ત્યારે હવામાન વિભાગની આગામી 24 કલાકમાં વરસાદની આગાહી કરી છે. સૌરાષ્ટ્ર, દ્વારકા, કચ્છ, બનાસકાંઠા, પોરબંદરમાં સામાન્ય વરસાદ પડી શકે છે. ત્યારે અમદાવાદ શહેરમાં પણ કેટલાંક વિસ્તારમાં વરસાદની સંભાવના વ્યક્ત કરવામાં આવી છે. 

 

આજે વહેલી સવારથી અમદાવાદમાં જોવા મળ્યું વાદળછાયું વાતાવરણ

ગઇકાલે થયેલા કમોસમી વરસાદની વચ્ચે આજરોજ સવારે શહેરમાં વાદળછાયું વાતાવરણ જોવા મળ્યું છે. હવામાન વિભાગની આગાહી મુજબ અમદાવાદ શહેરમાં આજે પણ છૂટોછવાયો વરસાદ પડે તેવી શક્યતા છે. 
 

વલસાડ જિલ્લામાં વહેલી સવારથી વાતાવરણમાં પલટો જોવા મળ્યો.. 

વલસાડ જિલ્લામાં વહેલી સવારથી આકાશમાં વાદળછાયું વાતાવરણ છવાયેલું જોવા મળ્યું છે. જ્યારે જિલ્લાના  વાપી પંથકમાં વરસાદી ઝાપટા પડ્યા છે.  કમોસમી વરસાદના કારણે કેરીના પાકને નુકસાનીની ભીતી સેવાઈ રહી છે. ઉનાળાની સીઝનમાં જિલ્લામાં વરસાદ થતાં ખેડૂતોમાં ચિંતાનો માહોલ જોવા મળ્યો છે.

રાજ્યમાં પડેલા ગઇકાલના વરસાદના કારણે ખેતરોમાં ઉભા પાકને નુકસાન જોવા મળ્યું છે. જેમાં જીરુ, ઘઉં કેરીના પાકને કમોસમી વરસાદથી મોટું નુકસાન થયું છે.