આફત / ગુજરાતમાં મોટી આફતના અણસાર : 25 વર્ષ બાદ દરિયાકાંઠે લાગ્યું 10 નંબરનું સિગ્નલ, લોકોમાં ભયનો માહોલ

• ગુજરાત માથે ખૂબ મોટી આફતની આહટ 
• 25 વર્ષ બાદ દરિયા કિનારે 10 નંબરનું સિગ્નલ અપાયું 
• જાફરાબાદ બંદર પર ચુસ્ત પોલીસ બંદોબસ્ત, ધારા 144 લાગુ 

તૌકતે વાવાઝોડાનું સંકટ
ગુજરાતમાં તૌકતે વાવાઝોડાનું સંકટ સતત વધી રહ્યું છે અને તોફાન આજે રાત્રે ગુજરાતને ટકરાય તેવી આશંકા છે ત્યારે ગુજરાતના દરિયાકિનારા પર 25 વર્ષ બાદ 10 નં.નું સિગ્નલ આપવામાં આવ્યું છે. નોંધનીય છે કે વાવાઝોડાની અસર અને પવનની ગતિને ધ્યાનમાં રાખીને બંદરો પર આ પ્રકારના નંબરના સિગ્નલ આપવામાં આવ્યા છે ત્યારે ગુજરાતના દરિયા કિનારાના ગામેગામ ખાલી કરાવવામાં આવી રહ્યા છે. 

25 વર્ષ 10 નંબરનું સિગ્નલ અપાયું

• માંગરોળ : જૂનાગઢના માંગરોળ બંદર પર 10 નંબરનું સિગ્નલ લગાવાયું
• ગીર સોમનાથ : વાવાઝોડાના ખતરાને જોતાં વેરાવળ બંદર પર લગાવાયું 10 નંબરનું સિગ્નલ 
• પોરબંદર : તૌકતે વાવાઝોડાની તાકાત વધતા 8 નંબરનું સિગ્નલ લગાવાયું
• દેવભૂમિ દ્વારકા : ઓખા બંદર ઉપર 8 નંબરનું ભયસૂચક સિગ્નલ લગાવાયું
• અમરેલી : અમરેલીના જાફરાબાદ બંદરે 10 નંબરનું સિગ્નલ લગાવાયું, દરિયાકિનારે ચુસ્ત પોલીસ બંદોબસ્ત અને ધારા 144 લાગુ 

અત્યંત ભયંકર કેટેગરીમાં મુકાયું આ વાવાઝોડું 
કોરોના વાયરસ સામે લડતા ગુજરાતના માથે વાવાઝોડાનું ખૂબ જ મોટું સંકટ આવીને ઊભું થયું છે ત્યારે આ વાવાઝોડાએ હવે ગતિ વધારી છે તેજીથી ગુજરાત તરફ તે આગળ વધી રહ્યું છે ત્યારે હવામાન વિભાગ દ્વારા આ વાવાઝોડાને અતિ ગંભીર કેટેગરીમાં મૂકી દેવામાં આવ્યું છે. આ વાવાઝોડાને કેટેગરી ચારમાં રાખવામાં આવ્યું છે અને આ કેટેગરીમાં  225થી 279 કિમી ઝડપે પવન ફૂંકાય છે. હવામાન વિભાગની આગાહી અનુસાર સોમવારે રાત્રે જ વાવાઝોડું ગુજરાતને ટકરાવાનું છે. ગુજરાતમાં 25 વર્ષ બાદ દરિયાકિનારે 10 નંબરનું સિગ્નલ આપી દેવામાં આવ્યું છે. 

સોમવારે રાત્રે જ ગુજરાતને ટક્કર મારશે વાવાઝોડું
ગુજરાત માટે ચિંતાની વાત કહી શકાય કે વાવાઝોડાની ગતિ ખૂબ જ વધી રહી છે અને પ્રચંડ વેગ સાથે વાવાઝોડું હવે આજે રાત્રે જ આઠથી 11 વાગ્યાની વચ્ચે ગુજરાતને ટકરાઇ શકે છે. ગુજરાતના પોરબંદરથી મહુવાની વચ્ચે આ વાવાઝોડું ટકરાશે જેમાં અત્યંત ભયંકર કહી શકાય તેમ 156થી 185 કિમી પ્રતિ કલાકની ઝડપે પવન ફુંકાઈ શકે છે. 

કયા સિગ્નલનો શું અર્થ થાય?

1 નંબરનું સિગ્નલ
વાવાઝોડું આવશે કે નહીં તેની ચેતવણી આપતી નિશાની
--
2 નંબરનું સિગ્નલ
વાવાઝોડું સક્રિય છે, દરિયામાં જતા જહાજોને સમુદ્રી બળનો સામનો કરવો પડે
--
3 નંબરનું સિગ્નલ
સપાટીવાળી હવાથી બંદર ભયમાં
--
4 નંબરનું સિગ્નલ
વાવાઝોડાથી બંદર ભયમાં છે, પરંતુ ભય એવો ગંભીર જાણતો નથી, કે જેનાથી કોઈ સાવચેતીના પગલા લેવા પડે. 
--
5 નંબરનું સિગ્નલ
સાધારણ પ્રકારનું વાવાઝોડું બંદરથી દક્ષિણ દિશા તરફ કિનારો ઓળંગવા સંભવ છે.
--
6 નંબરનું સિગ્નલ 
સાધારણ પ્રકારનું વાવાઝોડું બંદરની ઉત્તર દિશા તરફ કિનારો ઓળંગવા સંભવ છે.
--
7 નંબરનું સિગ્નલ 
સાધારણ પ્રકારનું વાવાઝોડું બંદરથી નજીક અથવા બંદરની ઉપરથી પસાર થવા સંભવ, બંદરને ભારે તોફાની પવનનો સામનો કરવો પડશે 
--
8 નબરનું સિગ્નલ 
ભારે જોરવાળું વાવાઝોડું બંદરથી દક્ષિણ તરફ કિનારો ઓળંગવા સંભવ છે.
બંદરે તોફાની હવાનો અનુભવ થાય
--
9 નંબરનું સિગ્નલ 
ભારે જોરવાળું વાવાઝોડું બંદરથી ઉતર તરફ કિનારો ઓળંગે તેવી સંભાવના 
--
10 નંબરનું સિગ્નલ
ભારે જોરવાળું વાવાઝોડું બંદર ઉપર થઈને પસાર થવાની શક્યતા છે. 
--
11 નંબરનું સિગ્નલ
તાર વ્યવહાર બંધ થાય. ખુબ ખરાબ હવામાનનો અનુભવ. અત્યંત ભયજનક ગણાય.