રાજ્યમાં કોરોનાની અસર અને ડર હજુ પણ લોકોમાં જોવા મળી રહી છે ત્યારે માસ્ક નહિ પહેરવા બદલ દંડ વસૂલવા માટે પોલીસ તંત્ર વધુ સક્રિય જોવા મળી રહ્યું છે.
રાજ્યમાં પોલીસ વિભાગે માસ્કના નામે કરી કરોડોની ઉઘરાણી
બે મહિનામાં 45 કરોડથી વધુ રકમની વસૂલાત કરાઇ
નેતાઓની માસ્ક વગર એન્ટ્રી, પ્રજાને નોએન્ટ્રી
છેલ્લાં 2 માસમાં માસ્ક નહિ પહેરવા બદલ તેમજ જાહેર રસ્તાંઓ પર થૂંકવા બદલ પોલીસ વિભાગે રૂ. 45 કરોડના દંડની વસૂલાત કરી છે. સૌથી વધુ દંડ અમદાવાદ શહેરમાં વસૂલાયો છે જ્યારે સૌથી ઓછો દંડ રાજ્યના પાટનગરમાં વસૂલાયો છે.
માસ્ક દંડથી સરકારી તિજોરીમાં કરોડોની આવક:
રાજ્યમાં પોલીસ વિભાગને રૂ. 45 કરોડ 17 લાખ 20 હજાર 500ની આવક માત્ર બે માસમાં જ થઈ છે અને આ આવક છે રાજ્યના વિવિધ વિસ્તારમાં માસ્ક નહિ પહેરવા બદલ દંડ તેમજ જાહેરમાં થૂંકવા બદલના દંડ અંગેની છે.
કોરોનાની બીજી લહેર પૂરી થઈ છે અને ત્રીજી લહેર આવવાની સંભાવના અંગે આગાહી કરવામાં આવી રહી છે ત્યારે માત્ર છેલ્લાં બે માસ એટલે કે જૂન અને જુલાઈ માસમાં રાજ્યમાંથી રૂ. 45 કરોડની માતબર રકમના દંડની વસૂલાત કરાઈ છે.
એકંદરે દંડની રકમમાં ઘટાડો થયો:
જો કે એકંદરે મે માસની સરખામણીએ જોઈએ તો તબક્કાવાર દંડની રકમમાં ઘટાડો નોંધાઈ રહ્યો છે એટલે માનવામાં આવી રહ્યું છે કે પ્રજામાં માસ્ક પ્રત્યે જાગૃતિ આવી છે. જો મે માસની વાત કરીએ તો સમગ્ર રાજ્યમાંથી કુલ 37 કરોડ જેટલો દંડ વસૂલાયો છે
જ્યારે જૂન માસમાં આ રકમમાં ઘટાડો થઈ 28 કરોડ સુધી પહોંચ્યો અને બાદમાં જુલાઈ માસમાં આ રકમ 17 કરોડ સુધી પહોંચી છે તેમ છતાં પણ પ્રજા જાગૃત રહે અને સતર્કતા રાખે તે જ પોલીસ વિભાગ અપીલ કરી રહ્યું છે. એકંદરે રાજ્યમાં સૌથી વધારે અમદાવાદ શહેરમાં દંડની વસૂલાત થઈ છે જ્યારે પાટનગર ગાંધીનગરમાં સૌથી ઓછો દંડ વસૂલાયો છે. જો કે પ્રજામાં જે રીતે માસ્ક પહેરવા બાબતે જાગૃતિ આવી છે ત્યારે સવાલ એ પણ થાય છે કે આખરે કોરોનાનો ડર છે ? કે પછી માસ્ક નહિ પહેરવા બદલ દંડનો ડર છે ?