સ્વીટી પટેલની હત્યા કરનાર PI પતિ અજય દેસાઇને આજે ગુજરાત પોલીસ દ્વારા અટાલી લાવવામાં આવ્યો હતો.
ભરુચમાં ચર્ચાસ્પદ સ્વીટી પટેલ મર્ડર કેસનો મામલો
આરોપી PI પતિ અજય દેસાઈને દહેજના અટાલી લવાયો
ક્રાઇમ બ્રાન્ચે આરોપીને સાથે રાખી રી-કન્સ્ટ્રકશન કર્યું
કરજણ ખાતે હત્યા કર્યા બાદ મૃતદેહ અટાલી સળગાવ્યો હતો
આરોપી PI પતિ અજય દેસાઈને દહેજના અટાલી લવાયો
વડોદરાનાં હાઈપ્રોફાઇલ કેસ મામલે હવે ગુનેગારને કડકમાં કડક સજા થાય તે માટેનાં પ્રયાસ કરવામાં આવી રહ્યા છે. સ્વીટી પટેલની હત્યા કરનાર PI પતિ અજય દેસાઇને આજે ગુજરાત પોલીસ દ્વારા અટાલી લાવવામાં આવ્યો હતો. ક્રાઈમ બ્રાન્ચે આરોપીને સાથે રાખ્યો અને આખી ઘટનાનું રી-કન્સ્ટ્રકશન કરવામાં આવ્યું હતું. નોંધનીય છે કે અજય દેસાઇએ પહેલા કરજણમાં હત્યા કરી અને તે બાદ પત્નીનો મૃતદેહ અટાલીમાં સળગાવ્યો હતો. ત્યારે પૂરાવા માટે પોલીસ દ્વારા આખી ઘટનાનું રી-કન્સ્ટ્રકશન કરવામાં આવ્યું હતું.
દાખલો બેસે તેવી કડક સજા કરાશે : DGP
નોંધનીય છે કે આ પહેલા રાજ્યના પોલીસ વડા આશિષ ભાટિયાએ અમદાવાદ ક્રાઈમ બ્રાન્ચ અને ATSની ઉમદા કામગીરીને બિરદાવી હતી અને PI અજય દેસાઈને લઈ નિવેદન આપતા જણાવ્યું હતું કે અજય દેસાઈએ રક્ષક થઈને ભક્ષકનું કામ કર્યું છે, તેને દાખલો બેસે તેવી કડક સજા કરાશે. તેમણે વધુમાં કહ્યું કે PI અજય દેસાઈના DNA ટેસ્ટ સહિતની કાર્યવાહી કરવામાં આવશે અને જરૂરી તમામ પુરાવાઓ એકત્રિત કરીને કોર્ટમાં રજૂ કરવામાં આવશે.
શું છે સમગ્ર ઘટના
વડોદરાનાં PI અજય દેસાઇની પત્ની સ્વીટી પટેલ ઘણા દિવસથી ગુમ હોવાથી આખા રાજ્યમાં આ કેસ ચર્ચાનો વિષય બન્યો હતો. આ કેસમાં અમદાવાદ ક્રાઈમ બ્રાન્ચ સહિત ગુજરાત પોલીસ દ્વારા તપાસનો ધમધમાટ કરવામાં આવ્યો હતો, જોકે કેસમાં 49 દિવસે પતિ PI દેસાઇએ જ કબૂલાત કરી હતી કે સ્વીટી પટેલની હત્યા કરવામાં આવી છે.
મૃતદેહને પોતાના ઘરના બાથરૂમમાં છૂપાવ્યો
એક રાત્રી મૃતદેહને પોતાના ઘરના બાથરૂમમાં છૂપાવી રાખ્યા બાદ બીજા દિવસની સવારે 11 કલાકે PI અજય દેસાઈએ પોતાની બ્લેક જીપનો ઉપયોગ કર્યો હતો. જીપને ઘરના ગેટ સુધી રિવર્સ લઈ મૃતદેહને બ્લેન્કેટમાં કવર કર્યા બાદ જીપની ડેકીમાં મૂકી દીધી હતી. આ બાદ ગાડીને બાજુના મકાનના કમ્પાઉન્ડમાં રાખી પોતાના સાળા જયદીપને કહ્યું કે, તેમના બહેન સ્વિટી પટેલ ગુમ થઈ ગયા છે.
કિરીટસિંહ જાડેજાને પણ આરોપી બનાવવામાં આવ્યા
સ્વિટી પટેલના ભાઈને જાણ કર્યા બાદ અજય દેસાઈએ મૃતદેહને ઠેકાણે લગાવવાની તજવીજ હાથ ધરી હતી. આ માટે PI અજય દેસાઈએ પોતાના મિત્ર કિરીટ સિંહ જાડેજા કરજણવાળાની મદદ લીધી હતી. અને 5 જૂનની સાંજે 4 વાગ્યે કરજણ-આમોદ-વાગરાથી દહેજ હાઈ-વે પર અટાલી ગામના પાટી પાસે કિરીટસિંહ જાડેજાની બંધ હોટલ પર પહોંચ્યા હતા. આ હોટલ લાંબા સમયથી બંધ હતી. અને હોટલના પાછળના ભાગે આવેલા ખુણામાં ગાડીને લઈ મૃતદેહને સળગાવી દેવાયો હતો. આ કેસમાં PI અજય દેસાઈની સાથે કિરીટસિંહ જાડેજાને પણ આરોપી બનાવવામાં આવ્યા છે.
પુત્રએ સોશિયલ મીડિયામાં અભ્યાન ચલાવ્યું
સ્વિટી પટેલની હત્યાની કબૂલાત તો, PI અજય દેસાઈએ કરી લીધી છે. અને સ્વિટી પટેલને ગળેફાંસો લગાવીને હત્યા કરી હોવાનો પણ ખુલાસો સામે આવ્યો છે. જો કે, આ ઘટના પછી લાંબા સમય સુધી કોઈને પણ વાતની જાણ થઈ નહોતી. પરંતુ સ્વિટી પટેલના ઓસ્ટ્રેલિયા ખાતે રહેતા પુત્રએ સોશિયલ મીડિયામાં અભ્યાન ચલાવ્યું હતું. જે બાદ સમગ્ર મામલે PI અજય દેસાઈ પર શંકાની સોય ફરી હતી. અને પોલીસે તપાસનો ધમધમાટ શરૂ કર્યો હતો.