ગુજરાત / ગ્રેડ પે મામલે ગૃહ રાજ્યમંત્રી સાથે બેઠક બાદ પોલીસ પરિવારે આપ્યું મોટું નિવેદન

• ગૃહ રાજ્ય મંત્રીએ અધિકારીઓ સાથે બેઠક બાદ પોલીસ પરિવાર સાથે મુલાકાત કરી
• પોલીસ પરિવારના 15 સભ્યોએ ગૃહ રાજ્યમંત્રી સાથે કરી મુલાકાત
• અમને પોલીસે કોઇ ધમકી આપી નથીઃ પોલીસ પરિવાર

પોલીસ દ્વારા ગ્રેડ પે માં વધારો, રજાઓ અને કામનો નિયત સમય સહિતની વિવિધ માગો કરવામાં આવી છે. આ સમગ્ર મામલે સોશિયલ મીડિયામાં આંદોલન શરૂ કરવામાં આવ્યું છે. તેવામાં હવે પોલીસકર્મીઓના ગ્રેડ પેના આંદોલનને લઈને સરકાર એક્શનમાં આવી છે. ગૃહરાજ્યમંત્રી હર્ષ સંઘવીએ તત્કાલીક બેઠક બોલાવી હતી. જેમાં તમામ ઉચ્ચ અધિકારીઓને બોલાવાયા હતા. DGP આશિષ ભાટિયા, ગૃહ વિભાગના સચિવ અને ઉચ્ચ પોલીસ અધિકારીઓ હાજર રહ્યા હતા. આ બેઠક બાદ પોલીસ પરિવારના 15 સભ્યોએ હર્ષ સંઘવી સાથે મુલાકાત કરી હતી. આ મુલાકાત બાદ પોલીસ પરિવારના સભ્યોએ નિવેદન આપ્યું હતું.

ગૃહ રાજ્યમંત્રીએ અમને મદદની ખાતરી આપી છેઃ પોલીસ પરિવાર

પોલીસ પરિવારે જણાવ્યું હતું કે, ગૃહ રાજ્યમંત્રીએ અમને મદદની ખાતરી આપી છે. અમને પોલીસે કોઇ ધમકી આપી નથી. ગ્રેડ પે અને SRPના મુદ્દે ચર્ચા થઇ છે. ગૃહ રાજ્યમંત્રી પોલીસ પરિવારો સાથે ફરીથી બેઠક કરશે. આ કોઇ રાજકીય આંદોલન નથી. ખોટા મેસેજ વાયરલ થયા છે તેને દૂર કરાશે. અમે અગાઉ પણ રજૂઆતો કરી હતી. સરકાર સમિતિની રચના કરશે. 7 મુદ્દાઓ પર ગૃહ રાજ્યમંત્રી સાથે ચર્ચા થઇ છે. જ્યાં સુધી પ્રશ્નો નહી ઉકેલાય ત્યાં સુધી આંદોલન ચાલુ રહેશે.

કોઈપણ રાજ્યમાં 4200 ગ્રેડ પે અપાતો હોય તેવું ધ્યાને નથીઃ IGP બ્રિજેશ ઝા

ગ્રેડ પે આંદોલન મામલે ગૃહ રાજ્યમંત્રી હર્ષ સંઘવી સાથે બેઠક બાદ IGP બ્રિજેશ ઝાએ નિવેદન કર્યુ હતું. જેમાં તેમણે જણાવ્યું હતું કે આ બેઠકમાં પોલીસકર્મીઓના પ્રશ્નો મુદ્દે ચર્ચા થઈ છે. પગાર સિવાયની સવલતો મામલે પણ ચર્ચા કરી છે. અન્ય રાજ્યોમાં ગ્રેડ પેની વિગતો મંગાવી છે. ગ્રેડ પે મામલે આજની બેઠકમાં પ્રાથમિક ચર્ચા થઈ છે. ગુજરાતમાં અત્યારે સાતમાં પગારપંચ પ્રમાણે પગાર અપાય છે. કોઈપણ રાજ્યમાં 4200 ગ્રેડ પે અપાતો હોય તેવું ધ્યાને નથી. તો બીજી તરફ એવા પણ અહેવાલ છે કે પોલીસ કર્મચારીઓને સોશિયલ મીડિયામાં પોસ્ટ ન કરવા સૂચના આપવામાં આવી છે. આચારસંહિતાની અમલવારી કરવા અધિક પોલીસ મહાનિર્દેશક નરસિંહા કમારે પરિપત્ર જાહેર કર્યો હતો. જેમાં સોશિયલ મીડિયા પર આચારસંહિતા ભંગ થતી ટીપ્પણી ન કરવા સૂચના આપવામાં આવી છે.