નવરાત્રી દરમિયાન છેડતીની ઘટનાઓને રોકવા માટે ગુજરાત પોલીસ એક્શનમાં આવી છે. ગુજરાત પોલીસ દ્વારા મહિલાઓને ટ્વીટ કરીને અપીલ કરવામાં આવી છે.
આજથી માતાજીની આરાધનાનો પર્વ નવરાત્રીનો પ્રારંભ
છેડતીની ઘટનાઓને રોકવા માટે ગુજરાત પોલીસ એક્શનમાં
ગુજરાત પોલીસની મહિલાઓને અપીલ
આજથી માતાજીની આરાધનાનો પર્વ નવરાત્રીનો પ્રારંભ થયો છે. કોરોના મહામારી બાદ આ વર્ષે નવરાત્રી પર્વની ધામધૂમથી ઉજવણી થવા જઈ રહી છે, જેને લઈને ગરબાપ્રેમીઓમાં અનેરો ઉત્સાહ જોવા મળી રહ્યો છે. સામાન્ય રીતે નવરાત્રીના પર્વમાં મહિલાઓ સાથે છેડતીના વધુ બનાવો બનાતા હોય છે, ત્યારે છેડતીની ઘટનાઓને રોકવા માટે ગુજરાત પોલીસ એક્શનમાં આવી છે. ગુજરાત પોલીસ દ્વારા એક ટ્વીટ કરવામાં આવ્યું છે.
આ નંબર પર કોલ કરીને તાત્કાલિક મેળવો મદદ
ગુજરાત પોલીસે ટ્વીટમાં લખ્યું છે કે, 'ગુજરાત પોલીસ મહિલાઓની સુરક્ષા માટે કટિબદ્ધ છે. નવરાત્રીના તહેવાર દરમ્યાન કોઈ પણ પ્રકારની છેડતી વિરુદ્ધ 181 અભયમ મહિલા હેલ્પલાઇન પર કોલ કરીને તાત્કાલિક મદદ મેળવો. 181 મોબાઈલ એપ તમારા મોબાઈલમાં ડાઉનલોડ કરો.'
આ સાથે જ ગુજરાત પોલીસે એક તસવીર પણ શેર કરી છે. જેમાં લખેલું છે કે, ગુજરાત પોલીસ હંમેશા છે મહિલાઓની પડખે, નવરાત્રીમાં ગરબા કરો નિશ્ચિત થઈને, કોઈ પણ છેડતી વિરુદ્ધ 181 અભયમ મહિલા હેલ્પલાઈન પર કોલ કરીને ફરિયાદ કરો અને તાત્કાલિક મદદ મેળવો.
મહિલાઓની સુરક્ષા વ્યવસ્થાને લઈને પોલીસે એક્શન પ્લાન ઘડી દીધો છે. નવરાત્રીના નવ દિવસ દરમિયાન રોમિયોને પકડવા માટે પોલીસ ટ્રેડિશન ડ્રસમાં વોચ કરશે. જે જગ્યાએ ગરબાનું આયોજન થઈ રહ્યું છે ત્યાં મહિલાઓની સુરક્ષાને લઈને તમામ પોલીસ સ્ટેશનનની અલગ અલગ શી ટીમ તૈનાત રહેશે. મહિલા પોલીસ પાર્ટી પ્લોટ પર ટ્રેડિશનલ ડ્રેસમાં લોકો વચ્ચે રહેશે અને રોમિયોગીરી કરનાર પર વોચ રાખશે. નવરાત્રીના તહેવારમાં ભીડ વચ્ચે કોઈ રોમિયો મહિલાઓની છેડતી કે ચેનચાળા કરતો જણાય તો તેને આ SHE ટીમ તરત જ ધરપકડ કરી જેલહવાલે કરે છે.
બે વર્ષ પછી ખેલૈયાઓ મન મૂકીને નવરાત્રીની મજા માણી શકશે
નોંધનીય છે કે, આ વર્ષે ધામધૂમથી નવરાત્રીની ઉજવણી થવા જઈ રહી છે. અમદાવાદ સહિત રાજ્યભરમાં મોટા પાયે રાસ - ગરબાનું આયોજન કરાયું છે. રાત પડતાં જ શેરી, ગલી, ચોક, પ્લોટ, મંદિરોના મેદાનો, પાર્ટી પ્લોટ્સ ગરબાની ગુંજથી ગુંજી ઉઠશે. બે વર્ષ પછી ખેલૈયાઓ મન મૂકીને નવરાત્રીની મજા માણી શકશે. પોલીસ વિભાગે પણ શાંતિપૂર્ણ વાતાવરણમાં નવારાત્રી ઉજવાય તે માટે તમામ સુરક્ષા વ્યવસ્થાને આખરી ઓપ આપી દીધો છે.
શું છે 181 અભયમ હેલ્પલાઇન?
મહિલા હેલ્પલાઈન વિશે વાત કરીએ તો સમગ્ર રાજ્યભરમાં મહિલાઓને મદદ મળી રહે તે માટે સરકાર દ્વારા વર્ષ 2015થી 181 મહિલા હેલ્પલાઈન સેવા શરૂ કરવામાં આવી છે. જેમાં મહિલાઓ કોઈપણ પ્રકારની મુશ્કેલ સ્થિતિમાં તુરંત મદદ મળેવવા માટે આ હેલ્પલાઈનનો સંપર્ક કરી શકે છે. આ ઉપરાંત અદ્યતન ટેક્નોલોજીનો ઉપયોગ કરીને 181 અભયમ મોબાઈલ એપ્લિકેશન પણ બનાવવામાં આવી છે.
એક રિપોર્ટ અનુસાર, છેલ્લાં 7 વર્ષમાં 9.90 લાખથી વધુ મહિલાઓને સેવા આપી 181 અભયમ હેલ્પલાઈન ખરા અર્થમાં મહિલાઓ માટે સંકટ સમયની સાથી સાબિત બની છે. તો અત્યાર સુધીમાં એપ પર 1,32,827 કરતાં વધારે મહિલાઓ દ્વારા રજીસ્ટ્રેશન કરવામાં આવ્યું છે.