એક્શન / DGPના આદેશ બાદ ગુજરાત પોલીસ એક્શનમાં : લગ્નમાં નિયમભંગ બદલ આટલાની ધરપકડ, માસ્ક/થૂંકવા માટે 10,961 દંડાયા

• કોરોનાને લઇ પોલીસ વિભાગ અલર્ટ
• સોશિયલ ડિસ્ટન્સ મુદ્દે કોઇ બાંધછોડ નહીં
• એક જ દિવસમાં જાહેરનામા ભંગના 2451 કેસ

કોરોના સંક્રમણ અટકાવવા પોલીસ વિભાગ અલર્ટ

ગુજરાતમાં કોરોના વાયરસના કારણે સતત કોહરામ જેવી પરિસ્થિતિ છે. ગુજરાતમાં હોસ્પિટલોમાં બેડ, ઑક્સીજન માટે રાજ્યની પ્રજા પીડાઈ રહી છે ત્યારે કોરોના સંક્રમણને અટકાવવા માટે રાજ્યની પોલીસ હવે એક્શન મોડમાં આવી ગઈ છે. કોરોના વાયરસના જાહેરનામા ભંગ બદલ કડક કાર્યવાહી કરવામાં આવી રહી છે તથા લગ્ન સમારંભોમાંથી પણ લોકોની ધરપકડ કરવામાં આવી રહી છે. 

DGPના આદેશ બાદ પોલીસ વિભાગની કડક કાર્યવાહી

રાજ્યના પોલીસ વડા આશિષ ભાટિયા દ્વારા પોલીસ વિભાગને કોરોના વાયરસના પ્રોટોકોલનું પાલન કરાવવા માટે કડક આદેશ આપી દેવામાં આવ્યા છે. હવે રાજ્યમાં ખાસ કરીને શહેરોના વિસ્તારોમાં માસ્ક અને સોશ્યલ ડિસ્ટન્સ મુદ્દે કોઈ બાંધછોડ રાખવામાં આવી રહી નથી. DGPના આદેશ બાદ કેટલીક જગ્યાઓ પર કડક કાર્યવાહી જોવા મળી રહી છે. 

લગ્નમાં જાહેરનામા ભંગમાં 471 લોકોની ધરપકડ

રાજ્યમાં લગ્ન સમારંભોમાં 50 લોકોને જ અનુમતિ આપવામાં આવી છે ત્યારે એક મહિનામાં લગ્નમાં જાહેરનામા ભંગના 341 ગુના નોંધાયા છે તથા લગ્નમાં કોરોના નિયમોના ભંગ માટે 471 લોકોની ધરપકડ પણ કરવામાં આવી છે. 

માસ્ક અને જાહેરમાં થુંકવાના કેસમાં 10,961ને દંડ

DGPના આદેશ બાદ રાજ્યમાં 2500થી વધુ લોકોની પોલીસે ધરપકડ કરી. આટલું જ નહીં માસ્ક અને જાહેરમાં થુંકવાના કેસમાં 10,961 લોકોને દંડ કરવામાં આવ્યો છે અને 1438 વાહનો ડિટેઇન કરવામાં આવ્યા છે.