જાહેરનામુ / માસ્ક નહીં પહેરનારને હવે પોલીસ ફટકારશે દંડ, અમદાવાદમાં ઘરે આવશે ઇ-મેમો

• માસ્ક અને જાહેરમાં થૂંકવા બદલ રૂપિયા 200ના દંડની જોગવાઈ
• હવે માસ્ક ન પહેરનાર પાસેથી હવે પોલીસ વસૂલશે દંડ
• માસ્ક ન પહેરનાર વાહનચાલકોને ઈ-મેમો મારફતે રૂ.200નો દંડ

આરોગ્ય અને પરિવાર કલ્યાણ વિભાગ દ્વારા એક જાહેરનામું બહાર પાડવામાં આવ્યું છે. જેમાં જણાવવામાં આવ્યું કે, કોરોના વાયરસના સંક્રમણને રોકવા ઘરની બહાર નિકળતા લોકોને માસ્ક પહેવું ફરજીયાત છે. માસ્ક ન પહેરનાર વ્યક્તિ પાસેથી દંડ વસૂલવામાં આવશે. આ દંડની કાર્યવાહી હાલ મ્યુનિસિપલ કમિશ્નર, કલેક્ટર, નગરપાલિકા, સ્થાનિક સ્વરાજ્યની સંસ્થા દ્વારા વસૂલવામાં આવે છે તેને બદલે હવેથી આ કામગીરી પોલીસ કમિશનર અને જિલ્લા પોલીસ વડાએ તેમના હકુમત હેઠળના વિસ્તારોમાં કરવાની રહેશે.

મહત્વનું છે કે, અમદાવાદમાં માસ્ક નહી પહેરવા મામલે અમદાવાદ મ્યુનિસિપલ કોર્પોરેશન દ્વારા કાર્યવાહી હાથ ધરવામાં આવી હતી. સોલિડ વેસ્ટ વિભાગે શહેરમાં ચેકિંગ હાથ ધર્યું હતું. માસ્ક ન પહેરનાર દુકાનદારો અને વાહનચાલકોને દંડ ફટકાર્યો હતો. ત્યારે અમદાવાદ પોલીસ હવે માસ્ક ન પહેરનારને દંડ ફટકારશે.

માસ્ક ન પહેરનાર વાહનચાલકોને ઈ-મેમો મારફતે રૂ.200નો દંડ

રાજ્યમાં હજુ કોરોનાનો કહેર યથાવત છે. તેને વકરતો અટકાવવા માટે સામાજિક અંતરની સાથે માસ્ક પહેરવું ફરજિયાત કરાયું છે. ત્યારે અમદાવાદમાં શહેરના રોડ પર લાગેલા 3 હજાર કેમેરાથી નિરીક્ષણ કરવામાં આવી રહ્યું છે. હવે ટ્રાફિક બાદ માસ્ક મામલે પણ ઈ-મેમો આપવાની કાર્યવાહી હાથ ધરવામાં આવી છે. AMC સોલિડ વેસ્ટ મેનેજમેન્ટ દ્વારા ઈ-મેમો આપવાનું શરૂ કરવામાં આવ્યું છે. અત્યાર સુધી નિયમભંગ કરનાર 250 વાહનચાલકોને ઈ-મેમો આપવામાં આવ્યો છે. વાહનચાલકોને ઈ-મેમો મારફતે રૂ.200નો દંડ ફટકારવામાં આવ્યો છે. આ ઉપરાંત જાહેર રોડ પર થૂંકનાર શખ્સો સામે પણ કાર્યવાહી કરવામાં આવશે.