ગુજરાત પોલીસ 21મી સદી જે માહિતીની સદી છે તેની સાથે કદમથી કદમ મિલાવીને ચાલે તેવી સૌની અપેક્ષા છે. એવામાં પોલીસ જે મુશ્કેલીમાં છે તેને મદદ કરવાને બદલે કોઈ જ પગલાં ન ભરે ત્યારે ગુજરાતની અસ્મિતા લાજે છે. આવી બે ઘટના દક્ષિણ ગુજરાતના તાપી જિલ્લામાંથી અને ઉત્તર ગુજરાતના મહીસાગર જિલ્લામાંથી બહાર આવી હતી.
વાલોડમાં ગામના લોકોએ એક મહિલાને ચુડેલ ગણીને માર માર્યો; પોલીસે FIR સુદ્ધા ન નોંધી
સુત્રો તરફથી મળેલી માહિતી પ્રમાણે વાલોડમાં એક મહિલાને ગામના લોકોએ પુષ્કળ માર્યો હતો. આ મહિલાનો વાંક ફક્ત એટલો હતો કે તેને ગામના લોકોએ એક ચુડેલ ગણીને ગામના થનાર તમામ કમનસીબ ઘટનાઓ માટે તેને જવાબદાર ઠેરવવામાં આવી. અંધશ્રદ્ધાથી ખદબદતા ગામવાસીઓએ તેને ઇલેક્ટ્રિકના થાંભલા સાથે બાંધીને ખૂબ માર માર્યો હતો. તે એક 36 વર્ષની વિધવા છે જે 14 અને 9 વર્ષના બે સંતાનો માટે બે ટંકના ભોજન માટે મહેનત કરે છે.
જયારે એક સજ્જને 181 અભયમ હેલ્પલાઇનમાં ફોન કરીને આ મુદ્દે જાણ કરી હતી ત્યારે તેઓ તાત્કાલિક ત્યાં પહોંચીને તેના માટે એમ્બ્યુલન્સની વ્યવસ્થા કરી હતી. આશ્ચર્યજનક વાત તો એ છે કે તેને હોસ્પિટલમાં દાખલ કર્યાના 24 કલાક પછી પણ બુહારી આઉટપોસ્ટની પોલીસે ન તો આરોપીઓ સામે કોઈ એક્શન લીધા હતા કે ન તો FIR દાખલ કરી હતી. આ મુદ્દે ત્યાંના PIએ ઉડાઉ જવાબ આપતા કહ્યું હતું કે હજુ સુધી પીડિતાએ કોઈ ફરિયાદ નોંધાવી નથી માટે અમે કોઈ કાર્યવાહી કરી નથી. નોંધનીય છે કે બીજા રાજ્યોમાં આવા ભુવા ચુડેલ જેવી અંધશ્રદ્ધાઓ સામે કાયદાઓની જોગવાઈ છે જયારે ભારતના મોડલ રાજ્ય ગુજરાતમાં આવા કોઈ કાયદાની જોગવાઈ નથી.
આ મુદ્દે તાપીના SPએ કહ્યું છે કે તેઓ આ મુદ્દે એક્શન લેશે અને સબ ઇન્સ્પેકટરને આ મુદ્દે તપાસ માટે કહેવામાં આવ્યું છે.
સમલૈંગિક સંબંધો ધરાવતી બે મહિલા પોલીસ કોન્સ્ટેબલે સતત ધમકીઓ પગલે માંગી સુરક્ષા; કોઈ પરિણામ ન આવતા અંતે હાઈકોર્ટનો આદેશ
મીડિયા અહેવાલો મુજબ મળેલી વિગત પ્રમાણે રાજ્યના મહીસાગર જિલ્લામાં ફરજ બજાવતા 24 વર્ષીય બે મહિલા કોન્સ્ટેબલ અનુક્રમે દાહોદ અને બોટાદ જિલ્લાના છે. તેઓ 3 વર્ષ પહેલા પ્રેમમાં પડ્યા અને તેમણે લિવ ઈનમાં સાથે રહેવાનું નક્કી કર્યું. જો કે જયારે તેમના પરિવારને આ વિષે ખબર પડી ત્યારે બંનેને ધમકીઓ મળવાની શરુ થઇ અને બંનેને ઘરે પાછા ફરવા માટે દબાણ કરવામાં આવ્યું.
આ મુદ્દે તેમણે મહીસાગરના SPને સંપર્ક કરીને તેમને વિનંતી કરી હતી કે તેમને સુરક્ષા આપવામાં આવે કારણ કે તેમના પરિવારજનો વારંવાર ધમકાવવા માટે અહીં આવતા હોય છે. જો કે તેમની આ વિનંતીનો દિવસો સુધી કોઈ જવાબ ન આવતા તેમણે હાઇકોર્ટના દ્વાર ખખડાવ્યા હતા જ્યાં હાઈકોર્ટે મહીસાગર SPને આદેશ આપ્યો હતો કે તેમને પોલીસ પ્રોટેક્શન આપવામાં આવે. નોંધનીય છે કે મહીસાગર SPએ જણાવ્યું હતું કે એક મહિલાના પિતા તેમને મળવા આવ્યા હતા પરંતુ તેમને સમજાવવામાં આવ્યું હતું કે બંને વયસ્ક મહિલાઓ છે અને તેઓ તેમની મરજી પ્રમાણે જીવન જીવી શકે છે.