BIG NEWS / પોલીસ ગ્રેડ-પે મામલે કમિટીની રચનાની જાહેરાત, DGP ભાટિયા બોલ્યાં હવે ગેરશિસ્ત કરશો તો એક્શન લેવાશે

• પોલીસ ગ્રેડ પે મામલે પોલીસ વડાએ કરી પત્રકાર પરિષદ 
• ગ્રેડ પે ને લઇ CM, રાજ્ય ગૃહ મંત્રી અને DGPની મળી હતી બેઠક
• બ્રિજેશ ઝાના અધ્યક્ષ સ્થાને કમિટી બનાવાઇ

કમિટીના ગઠનનો નિર્ણય
રાજ્ય સરકાર પોલીસના પ્રશ્નોને લઇને એકશનમાં આવી ગઈ છે. પોલીસ કર્મી તેમજ આંદોલન કરી રહેલા પોલીસ પરિવારો સાથે બેઠક કરી ગૃહરાજ્યમંત્રી હર્ષ સંઘવી પહોંચ્યા CM નિવાસસ્થાને પહોંચ્યા હતા. તેમની સાથે રાજ્ય પોલીસવડા પણ CM નિવાસસ્થાને પહોંચ્યા હતા. હાઈલેવલ બેઠકમાં પોલીસ આંદોલનના  પ્રશ્નોને લઇ CM ભૂપેન્દ્ર પટેલ સાથે ચર્ચા કરવામાં આવી હતી. ગ્રેડ પે ને લઇ CM, રાજ્ય ગૃહ મંત્રી અને DGPની બેઠક બાદ પત્રકાર પરિષદમાં પોલીસ વડા એ કહ્યું છે કે ગ્રેડ પે તેમજ અન્ય માંગોને લઈ સરકારે એક કમિટીના ગઠનનો નિર્ણય કર્યો છે. જેમાં 5 જેટલા પોલીસના ઉચ્ચ અધિકારીઑની બ્રિજેશ ઝાના અધ્યક્ષ સ્થાને કમિટી બનાવાઇ છે.જે સૂચિત સમયગાળામાં વિવિધ માંગ પર અભ્યાસ કરી સરકારને રિપોર્ટ સોંપશે જે બાદ સરકાર કોઈ યોગ્ય જાહેરાત કરશે. પણ જો સોશિયલ મીડિયામાં હવે કોઈ ઉશ્કેરણી જનક પોસ્ટ મૂકશે તો કડક કાર્યવાહી કરવામાં આવશે. ગેરશિસ્ત મામલે પ્રાથમિક તપાસ ચાલશે તેવા આદેશ પણ DGPએ આપ્યા છે.

DGP આશિષ ભાટિયાએ શું આપી ચેતવણી
પોલીસ ગ્રેડ-પે મામલે DGP આશિષ ભાટિયાએ કડક ચેતવણી આપતા કહ્યું હતું કે સોશ્યલ મીડિયામાં ખોટી ઉશ્કેરણીજનક પોસ્ટ મૂકવા બદલ ચાર ગુના દાખલ, ગેરશિસ્ત કરતાં પોલીસકર્મીઓ સામે તપાસનાં આદેશ આપી દેવાયા છે. કમિટીની રચના બાદ હવે પછી કોઈ કર્મચારી કાયદા વિરુદ્ધ વર્તન કરશે તો કડક પગલાં લેવામાં આવશે

કોણ કોણ છે કમિટીમાં?

• ગુજરાતના IGP બ્રિજેશ ઝાના અધ્યક્ષ સ્થાને કમિટી બનાવવા આવી
• ગૃહ વિભાગના ડેપ્યુટી સેક્રેટરી જિગર પટેલ 
• DG ઓફિસના ચીફ ફાયનાસિયલ ઓફિસર સ્મૃતિ પાઠકનો સભ્ય સચિવ તરીકે સમાવેશ
• નાણાં વિભાગના અધિકારીનો પણ કમિટીમાં સમાવેશ

પોલીસ પરિવારની મહિલાઓએ મહત્વનું નિવેદન
ગુજરાતમાં પોલીસ ગ્રેડ પે મામલે આંદોલન ચાલી રહ્યું છે. આ મામલે સરકાર પણ એક્શનમાં છે ત્યારે આજે ગાંધીનગરમાં વિધાનસભા ગેટ નં-6 પર પોલીસપરિવારની મહિલાઓ એકઠી થઇ હતી. ત્યારબાદ પોલીસ પરિવારની મહિલાઓએ ગૃહરાજ્યમંત્રી હર્ષ સંઘવી સાથે બેઠક કરી હતી. આ બેઠક બાદ પોલીસ પરિવારની મહિલાઓએ જણાવ્યું છે કે, રાજ્ય સરકારે આપણી માંગ મામલે સકારાત્મક જવાબ આપ્યો છે. રાજ્ય સરકાર કમિટીની રચના કરશે અને સાંજે જવાબ આપશે. હાલ તમામ બહેનોએ ઘરે જવું જોઇએ. તો સામે કેટલીક બહેનો લેખિતમાં જવાબનિ રાહ જોઈ બેઠી છે. સરકારની કમિટી ગઠનની જાહેરાત સાથે એમ કહી શકાય કે સરકાર અને પોલીસ વડાના સકારાત્મક વલણથી આંદોલનની આગ શાંત પડી છે. હવે કમિટીના સભ્યો દરેક પાસા પર ગહન વિચાર કરી પોલીસકર્મીની માગ અને શું રાહત આપી શકાય તે માટે રિપોર્ટ સોંપશે.

પરિવારો સાથે મુલાકાત બાદ ગૃહ રાજ્યમંત્રી હર્ષ સંઘવીનું નિવેદન
ગાંધીનગરમાં પોલીસકર્મીના આંદોલનનો મામલે આજે આંદોલન કરતા પોલીસ પરિવારો સાથે ગૃહ રાજ્યમંત્રી હર્ષ સંઘવીએ  મુલાકાત કરી છે. જે બાદ તેમણે નિવેદન આપતા કહ્યું છે કે આ અમારા પરિવારનો વિષય છે જેથી અમે મળીને સારી રીતે નિવારણ લાવીશું. સરકાર આ મામલે સકારાત્મક છે. યોગ્ય પાસાઓ પર વિચારણા ચાલી રહી છે.

પોલીસ કર્મચારીઓની માગ શું છે?

• હાલમાં પોલીસ કોન્સ્ટેબલને 1800 રૂપિયાનો ગ્રેડ પે મળે છે
• 1800 રૂપિયાનો ગ્રેડ પે મેળવતા પોલીસને 20 હજાર રૂપિયા પગાર મળે છે
• પોલીસ કોન્સ્ટેબલની 2800 રૂપિયા ગ્રેડ પે કરવા માગણી છે
• 2800 રૂપિયા ગ્રેડ પે થાય તો કોન્સ્ટેબલને 33 હજાર પગાર મળે
• LRDમાંથી 12 વર્ષે કોન્સ્ટેબલ બને ત્યાં સુધી કોન્સ્ટેબલના પગારમાં કોઈ બદલાવ થતો નથી
• અન્ય વિભાગના કર્મચારીઓની જેમ પોલીસ પણ પોતાના યુનિયન માટે લડે છે
• અનુશાસિત ફોર્સ હોવાના કારણે તેમને યુનિયન બનાવવાની મંજૂરી નથી
• પોતાની માગોને જાહેરમાં વ્યક્ત કરી શકતા નથી, આંદોલન કરી શકતા નથી
• ફરજના કલાકો નક્કી નહી હોવાના કારણે શારીરિક-માનસિક યાતનાઓ ભોગવે છે
• પોલીસ કોન્સ્ટેબલના કામના કલાકો નક્કી કરવાની પણ કર્મચારીઓની માગ છે
• હેડ કોન્સ્ટેબલ માટે 3600 રૂપિયા ગ્રેડ પે ની માંગ છે જે હાલમાં 2200 રૂપિયા છે
• ASIનો ગ્રેડ પે હાલમાં 2800 રૂપિયા છે જે 4200 કરવા માગ ઉઠી છે
• SRP જવાનોની દર ત્રણ મહિને બદલી કરાય છે તેમાં બદલાવની માગ છે
• SRPના જવાનો જે સ્થળે ફરજ બજાવે છે એ સ્થળે સુવિધાઓનો અભાવ હોય છે