લો બોલો! / મોજશોખ અને મિત્રોનો સંગ અંધ યુવાનને પણ લઈ ગયો ગુનાહની અંધારી ગલીઓમાં 

• ફેરવવા માટે એક્ટિવા ચોરી ગમે ત્યાં મૂકી દેતા હતા
• મિત્રો સાથે અંધ યુવાન પણ વાહનચોરીના રવાડે ચડ્યો

થોડાક દિવસ પહેલાં વટવા પોલીસે બે એક્ટિવા ચોરીના ગુનામાં અસ્લમ ઉર્ફે છોટુ અનવર શેખ, દીપક હીરાભાઇ રાઠોડની ધરપકડ કરી હતી, જેમાં બંને આરોપીઓની પૂછપરછમાં તેમનો સાથીદાર અહેમદ અબ્દુલ સલામ શેખ હોવાનું પણ કબૂલાત કરી હતી. પોલીસે જ્યારે અહેમદની ધરપકડ કરી ત્યારે તે પણ તેને જોઇને ચોંકી ગઇ હતી, કારણ કે અહેમદ અંધ હતો. 

પોલીસ કહે છે અહેમદ 90 ટકા અંધ 

પોલીસસૂત્રોના જણાવ્યા અનુસાર અહેમદ ૯૦ ટકા અંધ છે અને તે જોઇ નથી શકતો, જ્યારે સિવિલ હોસ્પિટલે અહેમદ ૧૦૦ ટકા અંધ હોવાનો ‌રિપોર્ટ આપ્યો છે. અહેમદે પણ વટવા પોલીસ સ્ટેશનમાં બે ગુના તેમજ રામોલ પોલીસ સ્ટેશન, ઇસનપુર અને નરોડા પોલીસ સ્ટેશનની હદમાં આવતા વિસ્તારમાં ચોરી કરી હોવાની કબૂલાત કરી છે. 

2017માં ચોરીના એક્ટીવામાં ફર્યો હતો

વટવા પોલીસે તેની પૂછપરછ કરી તો તેણે કબૂલાત કરી હતી કે વર્ષ ર૦૧૭માં તે તેના મિત્ર અસ્લમ ઉર્ફે છોટુ સાથે એક્ટિવા પર ગયો હતો, જેમાં બાપુનગર પોલીસે સીસીટીવી ફૂટેજના આધારે બંને જણાની ધરપકડ કરી હતી. અસ્લમે એક્ટિવાની ચોરી કરી હતી, જે વાતથી અહેમદ અજાણ હતો. 

રામોલ પોલીસે ધરપકડ કરી

હાલ અહેમદની રામોલ પોલીસે ધરપકડ કરીને કોર્ટમાં રજૂ કર્યો હતો, જ્યાં કોર્ટે તેને સેન્ટ્રલ જેલમાં મોકલી આપ્યો છે. અહેમદ અને તેની ગેંગની ખા‌િસયત એ છે કે તે મોજશોખ માટે એક્ટિવા ચોરી કરતા હતા અને ત્યારબાદ અવાવરું જગ્યા પર તેને મૂકી દેતા હતા. પોલીસે ચોરી કરેલાં તમામ એક્ટિવા કબજે કર્યાં છે.