કોમનવેલ્થ ગેમ્સ મેડલ વિજેતા ખેલાડીઓ સ્વદેશ પરત ફર્યા, ભાવિના પટેલ અને સોનલ પટેલ, રાધા યાદવ અને યાસ્તિકા ભાટિયાને વધાવી લેવાયા
ગુજરાતની દિકરીઓએ કોમનવેલ્થ ગેમ્સમાં વગાડ્યો ડંકો
અમદાવાદ એરપોર્ટ પર બંને ખેલાડીઓનું કરાયું ભવ્ય સ્વાગત
ભાવિના પટેલ અને સોનલ પટેલે મેળવ્યા મેડલ
કોમનવેલ્થ ગેમ્સ મેડલ વિજેતા ખેલાડીઓ સ્વદેશ પરત ફર્યા છે ત્યારે વિશ્વમાં દેશ સહિત ગુજરાતનું ગૌરવ વધારનાર ખેલાડીઓ પણ અમદાવાદ આવી પહોંચ્યા છે.ટેબલ ટેનિસ સ્ટાર ખેલાડીઓ ભાવિના પટેલ અને સોનલ પટેલ અમદાવાદ એરપોર્ટ પર આવી પહોંચ્યા હતા, જ્યાં તેમનું હાર પહેરાવી ઢોલ નગારા સાથે સ્વાગત કરવામાં આવ્યું હતું. બંનેએ ટેબલ ટેનિસમાં મેડલ મેળવી ઝળક્યા છે.
મહિલા ક્રિકેટર રાધા અને યાસ્તિકાનું જોરદાર સ્વાગત
મહિલા ક્રિકેટર રાધા યાદવ અને યાસ્તિકા ભાટિયા વડોદરા પહોંચ્યાં હતા. વડોદરા એરપોર્ટ પર રાધા અને યાસ્તિકાનું ભવ્ય સ્વાગત કરાયું હતું. બંને કોમનવેલ્થ ગેમ્સમાં સિલ્વર મેડાલીસ્ટ ટીમનાં સભ્યો રહ્યા છે. બંનેએ બર્મિંગહામ કોમનવેલ્થ ગેમ્સમાં શાનદાર પ્રદર્શન કર્યું હતું. BCA અને મહિલા ક્રિકેટરો તરફથી ઢોલ નગારા સાથે સ્વાગત કરવામાં આવ્યું. કોમનવેલ્થ ગેમ્સમાં ભારતીય મહિલા ક્રિકેટ ટીમે જીત્યો હતો સિલ્વર મેડલ અને ગોલ્ડ મેડલ મેચમાં રાધા યાદવનું રહ્યું શાનદાર પ્રદર્શન. ઢોલ નગારાના તાલે બંને ક્રિકેટરોનું સ્વાગત કરાયું છે. ખુલ્લા રથમાં બેસાડી બંનેનો રોડ શો પણ કરવામાં આવ્યો હતો.
કોમનવેલ્થ ગેમ્સમાં ગુજરાતી ચડક્યા
ભારતીય ટીમે સિંગાપોરને હરાવીને ટેબલ ટેનિસમાં ગોલ્ડ જીત્યો હતો. પુરુષ ટેબલ ટેનિસની ટીમમાં સુરતના હરમીત દેસાઈ પણ સામેલ હતો. રમતમાં હરમીતનું પ્રદર્શન શાનદાર રહ્યું છે. ગુજરાતની દીકરી ભાવિના પટેલે રાજ્ય અને દેશનું ગૌરવ વધાર્યું છે. ભાવિનાબેને કોમનવેલ્થ ગેમ્સમાં પેરા ટેબલ ટેનિસમાં ગોલ્ડ મેડલ જીત્યો હતો. ભારતીય ખેલાડીએ પેરા ટેબલ ટેનિસમાં ફાઇનલમાં નાઇજિરિયાના ખેલાડીને 3-0થી હરાવીને ગોલ્ડ મેડલ જીત્યો હતો.ગુજરાતની સોનલ પટેલે પણ કોમનવેલ્થ ગેમ્સ 2022માં પેરા ટેબલ ટેનિસમાં બ્રોન્ઝ મેડલ જીત્યો હતો. તેણે બ્રોન્ઝ મેડલ મેચ 3-5થી જીતી હતી.
હરિયાણાના કોમનવેલ્થના મેડલવીર પર થઈ ધનવર્ષા
હરિયાણા સરકારે ખેલાડીઓ માટે મોટા ઈનામની જાહેરાત કરી છે. કોમનવેલ્થ ગેમ્સમાં ગોલ્ડ જીતનાર દરેક ખેલાડીને 1.5 કરોડની રકમ મળશે, તેવી રીતે સિલ્વર જીતનાર ખેલાડીને 75 લાખનું ઈનામ મળશે. બ્રોન્ઝ મેડલ જીતનાર ખેલાડી માટે 50 લાખના ઈનામની જાહેરાત કરી છે. હરિયાણા સરકારે 16 ઓગસ્ટે ગુરુગ્રામમાં કોમનવેલ્થ ગેમ્સના ખેલાડીઓ માટે એક સન્માન સમારોહ યોજ્યો છે. સરકાર કોમનવેલ્થના તમામ ખેલાડીઓનું સન્માન કરશે.
28 જુલાઇથી ઈગ્લેંડના બર્મિંગહામ શરૂ થયેલા કોમનવેલ્થ 2022નું 8 ઓગસ્ટને સોમવારે સમાપન થયું હતું. ભારત માટે આ ગેમ્સ ખૂબ જ ખાસ રહી છે. આ વખતે ઘણાખરા ખેલાડીઓ સારું પદર્શન કરી ભારતનો ડંકો વગાડ્યો છે. પૂરા દેશે આ ગેમ્સ દરમિયાન ખેલાડીઓનો જુસ્સો વધાર્યો છે. વેટલીફ્ટર મીરાંબાઈ ચાનુંના ગોલ્ડની સાથે શરૂ થયેલી આ ગેમ્સ હોકીમાં સિલ્વર મેડલ સાથે પૂર્ણ થઈ.
પોઈન્ટ ટેબલમાં ભારતનું 4 નંબરનું સ્થાન
ભારતે 18મી વખત આ કોમનવેલ્થ ગેમ્સમાં હિસ્સો લીધો. દેશ તરફથી 104 પુરુષો અને 103 મહિલાઓએ તેમાં હિસ્સો લીધો હતો. આ ખેલાડીઓ 61 મેડલ જીતવામાં કામયાબ રહ્યા છે. ભારે 22 ગોલ્ડ 16 સિલ્વર અને 23 બ્રોન્ઝ મેડલ જીત્યા છે. પુરૂષોએ 35 અને મહિલાઓએ 26 મેડલ જીતી દેશનું ગૌરવ વધાર્યું છે. પોઈન્ટ ટેબલમાં ઓસ્ટ્રેલીયા, ઈંગ્લેન્ડ અને કેનેડા પછી 4 નંબરનું સ્થાન ભારતને મળ્યું છે.
પહેલી વાર લોન બોલ મેડલ મળ્યા
ભારતને સૌથી વધુ 12 મેડલ રેસલિંગમાં મળ્યા છે જેમાં 6 ગોલ્ડ, એક સિલ્વર અને 5 બ્રોન્ઝ મેડલનો સમાવેશ થાય છે. દેશમાં પહેલી વાર લોન બોલ ( એક ગોલ્ડ, એક સિલ્વર)ની ગેમ્સમાં મેડલ જીતવામાં સફળતા મળી છે. તો બીજી તરફ એથ્લેટિકસ અને બેડમિંટનમાં ખેલાડીઓએ સિઝનનું સર્વશ્રેષ્ઠ પ્રદર્શન કર્યું છે.
કઇ રમતમાં કેટલા મેડલ મળ્યા
ભારતે વેટલિફ્ટિંગમાં 10,ટેબલટેનિસમાં 7,બોક્સિંગમાં 7 મેડલ જીત્યા, બેડમિન્ટનમાં 6,એથલેટિ્ક્સમાં 8 મેડલ જીત્યા, લોનબોલમાં બે અને પેરા લિફ્ટિંગમાં એક મેડલ જીત્યો જ્યારે જૂડોમાં ત્રણ,હોકીમાં બે,ક્રિકેટમાં એક અને સ્કવોશમાં બે મેડલ જીત્યા છે.
CWGમાં ભારતે 22 ગોલ્ડ,16 સિલ્વર અને 23 બ્રોન્ઝ મેડલ જીત્યા