ગુજરાત / કોરોના રસીકરણના સમયે હડતાળ પર ઉતરેલા 33000 આરોગ્ય કર્મીઓએ હડતાળ સમેટી, આ અંગે જાણો DyCMએ શું કહ્યું...

• પંચાયત હસ્તકના આરોગ્ય કર્મચારીઓએ હડતાળ પાછી ખેંચી
• DyCMની સંઘના હોદ્દેદારો સાથેની બેઠક બાદ હડતાળનો અંત
• પડતર પ્રશ્નોના નિરાકરણની આરોગ્ય મંત્રી નીતિન પટેલે આપી ખાતરી

કોરોના મહામારીમાં વેક્સિનેશનનાં ખરા સમયે રાજ્યના આરોગ્ય કર્મચારીઓ કેટલીક પડતર માગણીઓને લઇને હડતાળ પર ઉતરી ગયા હતા. જેને લઇને ગુજરાતની પંચાયત હસ્તકના આરોગ્ય કર્મચારીઓની નાયબ મુખ્યમંત્રી અને આરોગ્ય મંત્રી નીતિન પટેલ સાથે બેઠક યોજાઇ હતી. આરોગ્ય કર્મચારી મહાસંઘના હોદ્દેદારો સાથે નીતિન પટેલ અને રાજ્ય સરકારના અધિકારીઓ સાથે પોણા કલાક સુધી બેઠક ચાલી હતી. આ બેઠકનો સુખદ અંત આવ્યો છે. પડતર પ્રશ્નોના નિરાકરણની આરોગ્ય મંત્રી નીતિન પટેલે ખાતરી આપતા આરોગ્ય કર્મચારીઓએ હડતાળ સ્થગિત કરી છે. 1800 ગ્રેડ પેને વધારીને 2800 ગ્રેડ પે સહિતની વિવિધ માંગણીઓ સાથે કામથી અળગા રહી આરોગ્ય કર્મચારીઓ વિરોધ કરી રહ્યા હતા. 

આવતીકાલથી 33000 કર્મચારી ફરજ પર હાજર થશે: DyCM

નાયબ મુખ્યમંત્રી DyCM નીતિન પટેલે કહ્યું કે, આવતીકાલથી 33000 કર્મચારી ફરજ પર હાજર થશે. તમામ આરોગ્ય કર્મીઓ વેક્સિન લેશે. આરોગ્ય કર્મચારી મહાસંઘ વિવિધ પ્રશ્નોને લઇને હડતાળ પર હતા. આરોગ્ય કમિશનર અને ગૃહ સચિવ સાથે બેઠક કરી હતી.

આરોગ્ય કર્મચારીઓની શું છે માંગણીઓ ?

કોરોના મહામારીમાં રસીકરણ દરમિયાન જ આરોગ્ય કર્મચારીઓએ આંદોલન શરૂ કર્યું હતું અને હડતાળ પર ઉતર્યા હતા. આરોગ્યના કર્મચારીઓની તાલુકા અને જિલ્લા કક્ષાએ સુપરવાઈઝની જગ્યાઓ અપગ્રેડ કરવી, 6ઠ્ઠા પગારપંચ મુજબનો ગ્રેડ પે મળે, મહિલા હેલ્થ વર્કરના બદલે મહિલા હેલ્થ આસિસટન્ટ નામાભિધાન કરવા સહિતની 13 જેટલી પડતર માગણીઓને લઇને રાજ્યમાં આરોગ્ય કર્મચારીઓ હડતાળ પર ઉતરી ગયા હતા. આ કર્મચારીઓએ કોરોના વેક્સિન લેવાનો પણ ઇન્કાર કર્યો હતો. સાથે જ કોરોના રસીકરણમાં કામગીરીથી પણ તેઓ અળગા રહ્યા હતા. જોકે હવે આવતીકાલથી હડતાળ પર ઉતરેલા આરોગ્ય કર્મીઓ કામ પર લાગી જશે.