આઉટસોર્સિંગ કર્મચારીઓને લઈને રૂપાણી સરકારે મહત્વનો નિર્ણય લીધો છે. સરકારના આ નિર્ણયથી આઉટસોર્સિંગ એજન્સીઓ ગેરરીતિ નહીં કરી શકે.
આઉટસોર્સિંગ એજન્સીઓ નહીં કરી શકે ગેરરીતિ
આરોગ્ય કમિશનરે કરી સ્પષ્ટતા
બોનસ, લીવ ઓન કેશ સહિતના નાણાં કર્મચારીઓને ચુકવાશે
રાજ્ય સરકાર દ્વારા લેવાયેલા નિર્ણય પ્રમાણે, ગુજરાતમાં હવે આઉટસોર્સિગ કર્મચારીઓનું શોષણ બંધ થશે અને કર્મીઓને હવેથી બોનસ તેમજ લીવ ઓન કેશ તેમજ ડ્રેસ વોશિંગના પણ નાણાની ચૂકવણી કરવામાં આવશે. આ અંગે ગુજરાતના આરોગ્ય કમિશનર દ્વારા સત્તાવાર પરિપત્ર જાહેર કરીને આ સ્પષ્ટતા કરવામાં આવેલ છે.
એસ્ક્રો એકાઉન્ટ દ્વારા નાણાની કરાશે ચૂકવણી
ઉલ્લેખનીય છે કે, એસ્ક્રો એકાઉન્ટ દ્વારા આઉટસોર્સિંગ સાથે જોડાયેલા કર્મચારીઓને નાણાની ચૂકવણી કરવામાં આવશે. તો આ સાથે જ ESIC, PF તLe GST ભર્યાનું ચલણ રજૂ કર્યા બાદ જ એજન્સીઓને સર્વિસ ચાર્જ મળશે.
રાજ્ય સરકારે લીધો નિર્ણય
આપને જણાવી દઈએ કે, ગત 5 વર્ષમાં આઉસસોર્સ એજન્સીઓએ વ્યાપક ભ્રષ્ટાચાર આચર્યો છે અને આઉટસોર્સિંગના કર્મચારીઓને બોનસ અને રજા પગારના નાણાની ચૂકવણી કરી નથી. આ બધી જ બાબતોને ધ્યાને રાખીને રાજ્ય સરકાર દ્વારા મહત્વનો નિર્ણય કરવામાં આવ્યો છે.
VTV દ્વારા વારંવાર ચલાવવામાં આવી છે મૂહિમ
ઘણાં સમયથી VTV આઉટસોર્સિંગ કર્મચારીઓના શોષણનો મુદ્દો ઉઠાવતું રહ્યું છે કે આઉટસોર્સિંગ કર્મચારીઓને એજન્સીઓ પગાર ચૂકવવામાં ગલ્લા તલ્લા કરી રહી છે. સરકાર પોતાના તરફથી નિશ્ચિત કરેલી રકમ આપે છે પરંતુ એ રકમ જયારે કર્મચારી સુધી પહોંચે છે ત્યારે ચિત્ર કંઈક જુદુ જ હોય છે. સવાલ એ છે કે આઉટસોર્સિંગ કર્મચારીઓનું આવુ શોષણ કરતા એજન્સીઓના પેટનું પાણી નથી હલતુ.. કર્મચારીઓની વેદના તંત્રના બહેરા કાને કેમ નથી અથડાતી.