નિર્ણય / ગુજરાતમાં અહીં આવેલું છે અનોખું ગામ, જ્યાં છેલ્લા 20 વર્ષથી ઠંડા પીણાના વેચાણ પર પ્રતિબંધ

રાજ્યમાં ઉનાળો બરાબરનો જામ્યો છે, ત્યારે ગરમીથી બચવા માટે લોકો ઠંડા પીણાનો સહારો લઈ રહ્યાં છે. જે ઠંડા પાણીમાં ગરમીથી રાહત આપે છે પરંતુ સ્વાસ્થ્ય માટે જોખમી પણ એટલા જ છે. ત્યારે આ બધાની વચ્ચે પટોળા નગરી પાટણનું એક એવુ ગામ છે જ્યાં છેલ્લા 20 વર્ષથી ઠંડા પીણા પર સંપૂર્ણ પ્રતિબંધ છે. વાત એવી છે કે, ઠંડા પાણી બંધ કરવાનું આ ગામે એટલા માટે પસંદ કર્યું હતું કારણે કે, નાના બાળકોનું સ્વાસ્થ્ય સારૂ રહે પરંતુ ધીરે ધીરે સમગ્ર ગ્રામજનોએ આ બાબતને ગંભીરતાથી લઈને સ્વેચ્છા અમલીકરણ કરી લીધું.

છેલ્લા 20 વર્ષથી ઠંડા પીણાના વેચાણ પર પ્રતિબંધ

રાજ્યનું એકમાત્ર એવું હારીજનું ગોવના ગામ છે. જ્યાં 20 વર્ષ પૂર્વે ગ્રામજનોએ સદંતર ઠંડા પીણા ઉપર પ્રતિબંધ મૂકીને સ્વાસ્થય પ્રત્યે સચોટતા દર્શાવી છે. આજે આ ગામમાં 1 હજારથી વધુ વસ્તી છે. છતા નાના બાળકથી લઈને વયવૃદ્ધ ઠંડા પીણા આરોગતા નથી. આ ગામ ઠંડા પીણા મુક્ત બનતા ઉનાળામાં થતી બીમારીનું પ્રમાણ ઘટ્યું હોવાનું પણ ગ્રામજનો દાવો કરી રહ્યાં છે.

આ પણ વાંચો: કોંગ્રેસના પૂર્વ ધારાસભ્ય સામે કાર્યવાહી, નિયમ ભંગ કરતા ફટકાર્યો એક લાખનો દંડ

નિયમ તોડનારને 1000 રૂપિયા દંડ

ગામના દુકાનદાર દિપક ભાઈ ઠક્કરે જણાવ્યું કે, ગામનાં સ્વાસ્થ્યના હિતમાં લીધેલા નિર્ણયને દુકાનદારો યોગ્ય રીતે પાલન કરે છે અને કોઈ પણ પ્રકારના ઠંડા પીણાનું વેચાણ કરતા નથી. ગામના બાળકો અને ગ્રામજનો સ્વાસ્થ્ય હેતુસર પ્રતિબંધનું પાલન કરવામાં આવ્યું હતું અને આ નિયમ તોડનારને 1000 રૂપિયા દંડની પણ ગ્રામજનોએ જોગવાઈ કરેલી છે. ત્યારે ગોવનામાં છેલ્લા 20 વર્ષથી ઠંડા પીણાં, આઈસ્ક્રીમ, બરફગોળા, પેપ્સી જેવી વસ્તુઓના વેચાણ પર પ્રતિબંધ યથાવત છે, એટલું જ નહી ગામ બહારથી આવતા ઠંડા પીણા વેચતા ફેરિયાઓને પણ આ ગામમાં નો એન્ટ્રી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ