તોફાન / VIDEO: ગુજરાતમાં મીની વાવાઝોડાંનો કહેર: લગ્ન મંડપ સાથે ખુરશીઓ હવામાં ઉડી, જાનૈયાઓએ આશરો લેવો પડ્યો

Gir Somnath Heavy Rain : હવામાનની આગાહી વચ્ચે ગીર સોમનાથમાં મીની વાવાઝોડાનો કહેર જોવા મળી રહ્યો છે. અહીં એક લગ્ન પ્રસંગમાં વાવાઝોડાને કારણે વિનાશની સ્થિતિ બની હતી. સુત્રાપાડાના પાંડવા ગામ લગ્ન પ્રસંગમાં વાવાઝોડાએ કહેર મચાવ્યો છે. વિગતો મુજબ અહીં તોફાની પવનમાં લગ્નનો મંડપ હવામાં ઉડ્યો હતો. આ તરફ અચાનક પવન સાથે વરસાદથી જાનૈયાઓમાં દોડધામ મચી ગઈ હતી.

સુત્રાપાડાના પાંડવા ગામે અચાનક ભારે પવન સાથે આવેલ વરસાદને કારણે મંડપ અને ખુરશી ઉડતાં જાનૈયાઓમાં નાસભાગ મચી ગઈ હતી. જાનૈયાઓએ દોડીને નજીકના મકાનમાં આશરો લીધો હતો. અહીં ભારે વરસાદને કારણે લગ્નની સામગ્રી પણ પાણીમાં પલળી ગઈ હતી.

આ તરફ અરબી સમુદ્રમાં સર્જાયેલી સિસ્ટમની અસરના પગલે કાંઠાના ભાગોમાં દરિયામાં કરંટ જોવા મળ્યો છે. ગીર સોમનાથનો દરિયો તોફાની બન્યો છે. ઊંચા મોજા ઉછળ્યા છે. હાલની સ્થિતિએ માછીમારોને દરિયો ન ખેડવાની તાકીદ કરાઈ છે.

વધુ વાંચો : ગુજરાતમાં મીની વાવાઝોડાનો કહેર: ક્યાંક લગ્નમંડપ ઉડ્યો, તો ક્યાંક ગામડાઓમાં અંધારપટ છવાયો

હવામાન વિભાગની આગાહી પ્રમાણે રાજ્યના અનેક વિસ્તારોમાં વરસાદ ખાબક્યો છે. જેમાં ખાસ કરીને નવસારી, ગીર સોમનાથ, વલસાડ અને તાપી પંથકમાં વરસાદનું આગમન થયું છે. કેટલાક સ્થળોએ ભારે પવન ફૂંકાતા વૃક્ષો ધરાશાઈ થયાનું પણ સામે આવ્યું છે. આ સાથે ગીર સોમનાથ પંથકમાં વાવાઝોડાને કારણે આંબા પરથી કેરીઓ ખરી પડી છે. આ તરફ વીજળીના થાંભલાઓ ધરાશાયી થવાને કારણે અંદાજે સાતથી આઠ જેટલા ગામોમાં અંધારપટ છવાઈ ગયો હતો.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ