અસર / ગુજરાતમાં આજથી ટ્રાફિકના નવા નિયમો અમલીઃ ક્યાંક પાલન ક્યાંક લોલમલોલ

• હેલ્મેટ નહી પહેરનારને 500 રૂપિયાનો દંડ ફટકારવામાં આવશે
• રાજકોટ CP કચેરી ખાતે 'ટ્રાફિકના નિયમ ભંગ કરનાર પોલીસકર્મીને પણ દંડ
• પાલનપુરમાં રિક્ષા ચાલકો ટ્રાફિક રુલનો વિરોધ કરી રહ્યા છે

રાજ્યમાં આજથી ટ્રાફિકના નવા નિયમ લાગૂ કરવામાં આવ્યા છે. ટ્રાફિકના નિયમો વધુ કડક કરવામાં આવ્યા છે. રાજ્યના મોટા શહેરમાં લોકો ટ્રાફિકના નિયમ પાલન કરતા જોવા મળ્યો. જોકે જિલ્લાઓમાં લોકોમાં ટ્રાફિકના નિયમોમાં અવેરનેસ જોવા મળી ન હતી. જામનગર, સુરેન્દ્રનગર, ભાવનગર અને મહેસાણા સહિતના જિલ્લામાં લોકોમાં ટ્રાફિકના નિયમને લઈને અવેરનેસ જોવા મળી ન હતી.

નવા નિયમ લાગૂ થયા બાદ પણ અનેક સ્થળો પર લોકો નિયમોનો ભંગ કરતા જોવા મળ્યા. અનેક રસ્તાઓ પર તો ટ્રાફિક પોલીસ પણ જોવા મળી ન હતી. મહેસાણામાં ટુ વ્હીલર ચાલકો હેલ્મેટ વગર ફરી રહ્યા હતા. જ્યારે રીક્ષા ચાલકો પણ ક્ષમતા વધારે મુસાફરો ભરતા જોવા મળ્યા. તો બીજી તરફ સુરેન્દ્રનગરના લખતરમાં નવા ટ્રાફિક નિયમોનો વિરોધ કરવામાં આવી રહ્યો છે.  

અમદાવાદમાં પોલીસ ચલાવી રહી છે ઝુંબેશ
ગુજરાતમાં ટ્રાફિકના નવા નિયમ લાગૂ થયા છે. ટ્રાફિકના નવા નિયમ લાગૂ થયા બાદ અમદાવાદ પોલીસે ઝુંબેશ શરૂ કરી છે. રોંગ સાઈડમાં આવતા વાહન ચાલકો પર પોલીસ નજર રાખી રહી છે. અમદાવાદમાં 20થી વધુ સ્થળો પર પોલીસ એલર્ટ થઈ છે. વાહન ચાલકો નવા નિયમ સ્વીકારવા માટે તૈયાર થયા છે. હેલ્મેટ નહી પહેરનારને 500 રૂપિયાનો દંડ ફટકારવામાં આવશે.

રાજકોટમાં પોલીસ કર્મચારીઓનું પણ ચેકિંગ
રાજકોટમાં પોલીસ કર્મચારીઓનું પણ ચેકિંગ કરવામાં આવી રહ્યુ છે જેમાં રાજકોટ CP કચેરી ખાતે 'ટ્રાફિકના નિયમ ભંગ કરનાર પોલીસકર્મીને પણ દંડ કરવામાં આવી રહ્યો છે. 
ઘણા પોલીસ કર્મચારીઓને દંડ ફટકારવામાં આવ્યો છે. એવી જ રીતે સામાન્ય જનતા પાસેથી પણ ટ્રાફિકના ચુસ્ત નિયમોનું પાલન કરાવાઈ રહ્યું છે. 

વડોદરામાં જાહેર જનતા અને પોલીસ બંને પાસેથી વસુલાયા દંડ
વડોદરામાં પોલીસ અને જાહેર જનતા બંને પાસેથી ટ્રાફિક નિયમોનું કડક પાલન કરાવાઈ રહ્યુ છે. પોલીસે પોલીસકર્મીઓ સામે કાર્યવાહી કરી અને નિયમો બધા માટે સરખા હોય છે તેનું એક ઉદાહરણ પૂરુ પાડ્યું. ટ્રાફિકના નિયમનું પાલન ન કરતા પોલીસકર્મીઓ સામે પોલીસે કાર્યવાહી કરી. પોલીસ હેડ ક્વાર્ટસ, પોલીસ ભવન પર પોલીસકર્મીઓને દંડ ફટકારવામાં આવ્યો હતો.

ગાંધીનગરમાં નવા ટ્રાફિક કાયદાનો અમલ શરૂ
ગાંધીનગરમાં સચિવાલયમાં ફરજ બજાવતા કર્મચારીઓનું પણ ચેકીંગ કરવામાં આવી રહ્યુ છે અને કાયદાનું ઉલ્લંઘન કારનાર પાસેથી દંડ વસુલાઈ રહ્યો છે ત્યારે સચિવાલય ખાતે એક કર્મચારીઓ એવા બહાના બતાવી રહ્યા છે કે, હજુ પગાર નથી થયો એટલે હેલમેટ નથી લાવ્યા પણ પોલીસ ટ્રાફીકના નિયમોનું દરેક પાસે કડક પાલન કરાવી રહી છે. 

સુરેન્દ્ર નગરનું લખતર છે સજ્જડ બંધ
સુરેન્દ્રનગરના લખતરમાં નવા ટ્રાફિક નિયમોનો વિરોધ કરવામાં આવ્યો છે. લખતરના બજારો બંધ પાળી વિરોધ કરવામાં આવી રહ્યો છે. વેપારીઓ અને દુકાનદારોએ વિરોધ પ્રદર્શન કર્યું. વેપારીઓએ નવા ટ્રાફિક નિયમોને લઇ સ્વેચ્છાએ ધંધો અને રોજગાર બંધ રાખ્યા છે. 

મહેસાણામાં ટ્રાફિકના નિયમની કોઈ અસર નથી
મહેસાણામાં પણ ટ્રાફિકના નવા નિયમની કોઇ અસર જોવા નથી મળી રહી. મોટાભાગના ટુ વ્હીલર ચાલકો હેલ્મેટ વગર જ જોવા મળ્યા. ટ્રાફિકના નિયમોનો સરેઆમ ભંગ થઇ રહ્યો છે. તો કારચાલકો પણ સીટ બેલ્ટ નથી બાંધી રહ્યાં. જ્યારે રીક્ષાઓ પણ વધારે પેસેન્જરો ભરવામાં આવ્યા છે.

બનાસકાંઠામાં ટ્રાફિક રુલનો રિક્ષા ચાલકો વિરોધ કરી રહ્યા છે
પાલનપુરમાં રિક્ષા ચાલકો ટ્રાફિક રુલનો વિરોધ કરી રહ્યા છે. રિક્ષા ચાલકોએ નવા નિયમોના અમલીકરણને ચીમકી આપી છે. જો ટ્રાફિક પોલીસ રિક્ષા ચાલકોને ટાર્ગેટ કરશે તો તેઓ આક્રમક વિરોધનો કરશે તેવું તેમણે બેઠક યોજીને જાહેરમાં જણાવ્યુ હતુ. 

આજથી રાજ્યભરમાં નવો મોટર એક્ટ લાગુ . આ ટ્રાફિક નિયમનું પાલન નહી કરવામાં આવે તો આકરો દંડ થશે. તેમજ જરૂરી દસ્તાવેજો સાથે નહીં રાખો તો આકરો દંડ થશે. નવા નિયમ પ્રમાણે દંડની રકમમાં વધારો કરવામાં આવ્યો છે. 

અકસ્માતની સંખ્યા ઘટાડવા માટે સરકારે આ દંડ લાગુ કર્યા
હેલ્મેટ, લાયસન્સ, સીટ બેલ્ટ વિના વાહન ચલાવવા પર નવાદંડ લગાવવામાં આવ્યા છે. ત્રિપલ સવારી, ઓવરસ્પીડિંગમાં દંડની રકમમાં પણ વધારો કરવામાં આવ્યો છે. વીમા, RC બુક વિના વાહન ચલાવવા પર પણ દંડ છે. અકસ્માતની સંખ્યા ઘટાડવા માટે સરકારે આ દંડ લાગુ કર્યો છે.

અવાજ પ્રદુષણ માટે પણ રૂા, 1000નો દંડ
PUC વિના 30 સપ્ટેમ્બર સુધી જૂના નિયમ પ્રમાણે દંડ થશે. HSRP નંબર પ્લેટ માટે પણ એક માસની સમય મર્યાદા છે. અડચણરૂપ પાર્કિંગ, ડાર્ક ફિલ્મ મુદ્દે રૂ.1500ના દંડની જોગવાઈ છે. ચાલુ વાહને મોબાઇલનો ઉપયોગ કરાશે તો રૂ.એક હજાર દંડ થશે. અવાજનું પ્રદૂષણ અને ભારે હોર્ન માટે રૂ.1000 નો દંડ છે. જાહેર સ્થળે રેસ કરવા પર રૂપિયા 5-10 હજારની દંડની જોગવાઈ છે. 

ઈમરજન્સી વાહનને ફરજિયાત આપવી પડશે સાઈડ
ઇમરજન્સી વાહનોને સાઇડ નહીં આપો તો રૂપિયા 1000 દંડ થશે. ડિજીટલ સ્વરૂપે દસ્તાવેજો રજૂ કરવા પર માન્યતા છે. સ્થળ પર દસ્તાવેજ ન હોય તો 15 દિવસમાં તેની રજૂઆત કરી શકાશે. ભયજનક રીતે વાહન ચલાવવા બદલ અધધ દંડ  થઇ શકે છે. ટુ-વ્હીલરમાં પાછળ બેસનાર વ્યક્તિને હેલ્મેટમાંથી હાલ મુક્તિ આપવામાં આવી છે. 2 વર્ષથી નાના બાળકો સાથે ત્રિપલ સવારી પર દંડમાંથી મુક્તિ આપવામાં આવી છે. વાહન પર હેન્ડ્સ ફ્રીથી વાત કરનાર વ્યક્તિને દંડ થશે નહીં. વિદેશી વાહનોને પણ ગુજરાતના નિયમ પ્રમાણે દંડ કરવામાં આવશે.