હવામાન વિભાગ / ખેડૂતો માટે ખુશીના સમાચાર: રાજ્યમાં 3 દિવસ વરસાદની આગાહી, છેલ્લા 24 કલાકમાં 171 તાલુકામાં વરસાદ

• રાજ્યમાં આગામી 3 દિવસ વરસાદની આગાહી
• રાજ્યમાં 24 કલાકમાં 171 તાલુકામાં વરસાદ
• સૌથી વધારે ઉમરગામ તાલુકામાં સવા 5 ઇંચ વરસાદ 

ગુજરાતમાં આગામી ત્રણ દિવસ વરસાદી માહોલ જોવા મળશે. જેને લઇને ખેડુતો માટે ખુશીના સમાચાર છે. જેમાં આજે પંચમહાલ, ખેડા, નવસારી, વલસાડ, દમણ, દાદરા નગરહવેલીમાં વરસાદની આગાહી કરવામાં આવી છે. જ્યારે 14મીએ આણંદ, ડાંગ નવસારી, વલસાડ, દમણમાં ભારે વરસાદની આગાહી કરવામાં આવી છે. જ્યારે 15મી જુલાઇ જૂનાગઢ અને ગીર-સોમનાથમાં ભારે વરસાદની શક્યતા જણાવામાં આવી છે. 
 

ગુજરાતમાં છેલ્લા થોડા  દિવસોથી મેઘમહેર જોવા મળી રહી છે. જેમાં સૌથી વધારે વરસાદ સૌરાષ્ટ્રમાં પડી રહેલો જોવા મળી રહ્યો છે. ત્યારે રાજ્યમાં છેલ્લા 24 કલાકમાં રાજ્યના 171 તાલુકામાં વરસાદ ખાબક્યો છે. ત્યારે રાજ્યમાં સૌથી વધારે ઉમરગામ તાલુકામાં સવા 5 ઇંચ વરસાદ નોંધાયો છે.  
 

જ્યારે કામરેજમાં 2.5 ઇંચ, ઉમરપાડા-કપરાડા-નવસારી-પાદરામાં 2 ઇંચ વરસાદ, જ્યારે વલ્લભીપુર-જલાલપોર-વાપીમાં પોણા 2 ઇંચ વરસાદ પડ્યો છે. આ સાથે મહેસાણા-વાસો-માંગરોળ-અંકલેશ્વર-વાલોદ-ગણદેવીમાં 1.5 ઇંચ વરસાદ નોંધાયો છે.