સુરતમાં વહેલી સવારે ભારે ગાજવીજ સાથે પડ્યો ધોધમાર વરસાદ ખેડૂતોમાં આનંદની લાગણી

સુરતઃ શહેરમાં આજે વહેલી સવારથી ગાજવીજ સાથે ભારે વરસાદ વરસ્યો છે. ઓલપાડ માંગરોળ માંડવી સહિતનાં વિસ્તારોમાં વરસાદ પડયો છે. વરસાદનાં પગલાને લઇને વાતાવરણમાં ભારે ઠંડક પ્રસરી ગઇ છે. વરસાદ આવતા જ ખેડૂતોમાં ભારે ખુશીનો માહોલ છવાઇ ગયો છે.

ઉલ્લેખનીય છે કે ભારે ઉકળાટ અને અસહ્ય બફારા વચ્ચે દક્ષિણ ગુજરાતમાં મેઘરાજાએ વિધિવત આગમન કરી દીધું છે. મેઘરાજાએ ગઇ કાલનાં સવારનાં રોજથી દ.ગુજરાતમાં પ્રવેશ કર્યા બાદ સૌરાષ્ટ્રનાં પણ કેટલાંક વિસ્તારોમાં પ્રવેસ કરતાં લોકોમાં ખુશીની લાગણી છવાઇ ગઇ છે.

વરસાદનાં આગમનથી લોકોએ અસહ્ય ગરમીથી પણ છુટકારો મળ્યો છે. મહત્વનું છે કે ઋતુનાં પહેલા વરસાદથી લોકોને બફારાથી પણ છુટકારો મળ્યો છે તેમજ ખેડૂતોએ પણ આનંદનો હાશકારો અનુભવ્યો છે.

મહત્વનું છે કે ગઇ કાલનાં રોજ પણ વાદળછાયા વાતાવરણ વચ્ચે સુરતનાં અડાજણ રાંદેર વરાછા અમરોલી સહિતનાં વિસ્તારમાં મેઘરાજાએ ધમાકેદાર આગમન કર્યું હતું. મેઘરાજાની ધમાકેદાર એન્ટ્રીથી સર્વત્ર જળબંબાકાર થઈ ગયું હતું.

પહેલાં વરસાદની મજા નાનાં નાનાં ભૂલકાઓથી માંડીને મોટા લોકોએ પણ માણી હતી. અમરોલી વરાછા અને વેદ રોડ સ્થિત ગરનાળાં પણ વરસાદી પાણીમાં ગરકાવ થઇ ગયાં હતાં. જેને કારણે વાહન ચાલકોને પણ ભારે હાલાકીનો સામનો કરવો પડ્યો હતો.