સુરક્ષા / ગુજરાતના દરિયા કિનારા ભગવાન ભરોસે? 1600 કિમીની કોસ્ટ લાઈન સામે પોલીસ સ્ટેશન આંગળીના વેઢે ગણાય એટલા

ગુજરાતની પાકિસ્તાનથી ઘણી નજીક ભૌગોલિક સ્થાન હોવાના કારણે વારંવાર હાઈ અલર્ટ લાગુ કરવામાં આવે છે. જો કે આ હાઈ અલર્ટમાં સુરક્ષા કરતી એજન્સી એટલે કે મરીન પોલીસ સંસાધનો અને ઈન્ફ્રાસ્ટ્રક્ચરના અભાવના કારણે ગાફેલ રહે છે. 

2019 કેન્દ્રીય ગૃહ મંત્રાલયના પોલીસ ઓર્ગેનાઇઝેશનના ડેટા પ્રમાણે ગુજરાત કરતા ટૂંકો દરિયા કિનારો અને પાકિસ્તાનથી વધુ દૂર આવેલા રાજ્યોમાં પણ વધુ સંખ્યામાં મરીન પોલીસ સ્ટેશન આવેલ છે. 

કયા રાજ્યમાં કેટલા પોલીસ સ્ટેશન આવેલા છે?

ફક્ત 22 પોલીસ સ્ટેશન અને 30 ઇન્ટરસેપ્ટર બોટની મદદથી એક મરીન પોલીસ સ્ટેશને તોતિંગ 72 કિમી જેટલો દરિયા કિનારાનો વિસ્તાર સાચવવો પડે છે. બાંધકામના ત્રીજા ચરણમાં અહીં અહીં 13 નવા પોલીસ સ્ટેશન બનવા જઈ રહ્યા છે જો કે તેને ઘણી વાર લાગશે તેની સંભાવના છે. 

કર્ણાટકના દરિયા કિનારાના વિસ્તાર અને પોલીસ સ્ટેશનની સંખ્યા પરથી માલુમ પડે છે કે એક પોલીસ સ્ટેશને 5 કિમીનો વિસ્તાર સુરક્ષિત રાખવો પડે છે. મહારાષ્ટ્રમાં આ વિસ્તાર 16 કિમી, તામિલનાડુમાં 25 કિમી અને  ઓરિસ્સામાં 26 કિમી છે.

જો કે મરીન ટાસ્ક ફોર્સના DIG હિમાંશુ શુક્લાએ જણાવ્યું હતું કે ગુજરાતનું સુરક્ષા માળખું બીજા રાજ્યો કરતા અલગ છે. અહીં 22 પોલીસ સ્ટેશન ઉપરાંત 45 આઉટપોસ્ટ અને ચોકીઓ પણ આવેલી છે. ગુજરાત દેશનું એકમાત્ર રાજ્ય છે જ્યાં સ્પેશ્યલ મરીન ટાસ્ક કમાન્ડોના દળની રચના થયેલી છે. 

ગુજરાત વિધાનસભામાં એક પ્રશ્નનો જવાબ આપતી વખતે ગૃહ મંત્રી પ્રદીપસિંહ જાડેજાએ કહ્યું હતું કે રાજ્યમાં 1640 કિમીનો દરિયા કિનારો, 144 નાના મોટા ટાપુઓ આવેલા છે જેમાંથી 6 ટાપુઓ ઉપર માનવ વસ્તી છે. 

અહીં નોંધનીય છે કે 2006માં ગુજરાતમાં મરીન પોલીસની રચના કરવામાં આવી હતી. 2008ના મુંબઈ હુમલાના આતંકવાદીઓ ગુજરાત સરહદથી કુબેર નામની બોટ વડે દેશમાં પ્રવેશ્યા હતા.