મતદાન કરતો વીડિયો વાયરલ કરવામાં આવ્યો છે જેને પગલે ધમાલ મચી ગઈ હતી.
મતદાન કરતા હોવાનો વીડિયો વાયરલ
મતદાન કરતી વખતે બુથનો વીડિયો
ચૂંટણી અધિકારીએ ફરીયાદ નોંધી
રાજ્યમાં સ્થાનિક સ્વરાજ્યની ચૂંટણી માટે મતદાન ચાલી રહ્યું છે. મતદારો મતદાન કરવા માટે પહોંચી રહ્યા છે. પરંતુ ગોંડલમાં મતદાન કરતા હોવાનો એક વીડિયો વાયરલ થયો છે. મતદાન કરતી વખતે બુથનો વીડિયો વાયરલ થયો છે. જોકે વીડિયોને લઇને ચૂંટણી અધિકારીએ ફરિયાદ નોંધી છે. ફરિયાદ નોંધી કાયદેસરની કાર્યવાહી હાથ ધરી છે.
રાજકોટ જિલ્લા પંચાયતની 36 બેઠકો માટે આજે મતદાન
જિલ્લા પંચાયતની 36 બેઠક પર 111 ઉમેદવારો મેદાનમાં છે. ભાજપ અને કોંગ્રેસના 36-36 ઉમેદવારો અને AAPના 21 ઉમેદવાર છે. 11 તાલુકા પંચાયતની 202 બેઠકો માટે 586 મુરતિયા રણમેદાનમાં છે. રાજકોટ જિલ્લામાં કુલ મતદારોની સંખ્યા 9 લાખ 41 હજાર 457 છે. જિલ્લામાં કુલ 1146 મતદાન મથકો ઉભા કરાયા છે જેમાંથી 396 સંવદેનશીલ મતદાન કેન્દ્ર જાહેર કરાયા . ચૂંટણીની કામગીરી માટે 8 હજાર કર્મચારીઓ જોડાયા છે અને 3 હજાર પોલીસકર્મીઓ ચૂંટણી બંદોબસ્તમાં રહેશે.
બીજા તબક્કાનું મતદાન
આજે રાજ્યભરમાં સ્થાનિક સ્વરાજ્યની ચૂંટણીનું મતદાન થઈ રહ્યું છે. 31 જિલ્લા પંચાયત, 231 તાલુકા પંચાયત અને 81 નગરપાલિકાના મતદારો મત્તાધિકારનો ઉપયોગ કરી રહ્યા છે. જેમાં 81 નગરપાલિકાના 46.89 લાખથી વધુ અને તાલુકા, જિલ્લા પંચાયતના 2.50 કરોડ મતદારો છે. આજે રાજ્યના 4 કરોડ 9 લાખ જેટલા મતદારો ઉમેદવારોના ભાવિનો ફેંસલો કરશે. જિલ્લા અને તાલુકા પંચાયતોમાં 31 હજાર 370 મતદાન મથકો ઉભા કરાયા છે.
રાજ્યમાં 6 હજાર 443 મતદાન મથકો સંવેદનશિલ જાહેર કરાયા છે. 3 હજાર 532 મતદાન મથકો અતિસંવેદનશીલ છે. ગત ચૂંટણીમાં 31માંથી 23 જિલ્લા પંચાયત કોંગ્રેસે કબજે કરી હતી. 31માંથી માત્ર 8 જિલ્લા પંચાયત જ ભાજપના ફાળે આવી હતી. 231 તાલુકા પંચાયતમાંથી 146 કોંગ્રેસ, 85માં ભાજપને જીત મળી હતી. 51 નગરપાલિકામાંથી ભાજપને 37 અને કોંગ્રેસનો 14માં વિજય થયો હતો.
ગુજરાતની 231 તા.પંચાયતની યોજાઇ રહી છે ચૂંટણી
ગુજરાતની 231 તા.પંની ચૂંટણીમાં કુલ 12,265 ઉમેદવારો મેદાને છે. જેમાં ભાજપના 4652, કોંગ્રેસના 4594 ઉમેદવારો ચૂંટણી લડી રહ્યા છે. જ્યારે BSP-255, NCP-61 અને AAPના 1067 ઉમેદવારો મેદાને છે. તો અન્ય પક્ષોના 462 અને 1139 અપક્ષ ઉમેદવારો ચૂંટણી જંગમાં છે.
ગુજરાતની 81 નગરપાલિકામાં યોજાઈ રહી છે ચૂંટણી
રાજ્યભરમાં 81 નગરપાલિકામાં ચૂંટણી યોજાઈ રહી છે. 7 હજાર 245 ઉમેદવારોના ભાવિ EVMમાં કેદ થશે. ભાજપના 2,555 અને કોંગ્રેસના 2,247 ઉમેદવારો મેદાનમાં છે. BSP-109, NCP-88, SP-64 ઉમેદવારો ચૂંટણી લડી રહ્યા છે. AAPના 719 અને અન્ય પક્ષોના 264 અને 1,184 અપક્ષ ઉમેદવારો પણ રણમેદાનમાં છે.
જિલ્લા પંચાયતની ચૂંટણીમાં 2655 ઉમેદવારો મેદાને
રાજ્યની જિલ્લા પંચાયતની ચૂંટણીમાં કુલ 2 હજાર 655 ઉમેદવારો મેદાનમાં છે. જેમાં ભાજપના 954, કોંગ્રેસના 937 ઉમેદવારો મેદાને છે. BSPના 88, NCPના 23, CPI-Mના 3, AAPના 304 ઉમેદવાર છે. જ્યારે અન્ય પક્ષોના 133 અને 209 અપક્ષ ઉમેદવારો રણસંગ્રામમાં છે.
કેટલી બેઠકો બિનહરીફ?
વિવિધ જિલ્લા પંચાયતોની કુલ 25 બેઠકો બિનહરીફ, વિવિધ તાલુકા પંચાયતોની 117 બેઠકો બિનહરીફ, વિવિધ નગરપાલિકાઓની 95 બેઠકો બિનહરીફ થઇ છે.