કૌભાંડ / કોર્પોરેશન અને કોન્ટ્રાક્ટરોની મિલિભગતઃ જૂનાગઢમાં વાહન ભાડે રાખવાનો ખર્ચ વાહન ખરીદી જેટલો

• 3 વર્ષમાં વાહન ભાડા ખર્ચમાં રૂા. 47 લાખનો કરાયો વધારો
• માસિક રૂા. 35,000ને બદલે 45,000 ભાડું ચૂકવે છે મનપા
• મનપા પાસે સેંકડો વાહનો હોવા છતાં ભાડે વાહનો રાખે છે

જૂનાગઢ મહાનગરપાલિકામાં ભાડે વાહનો રાખવાનું કૌભાંડ સામે આવ્યું છે. બજાર કિંમત કરતા વધુ કિંમત આપીને મનપા દ્વારા વાહનો ભાડે રાખવામાં આવ્યા છે. મનપાના ત્રણ વર્ષમાં વાહન ભાડાના ખર્ચમાં 47 લાખ રૂપિયાનો વધારો કરાયો છે.

પોતાના વાહન હોવા છતા ભાડે રાખવાની જીદ
મનપા દ્વારા ભાડામાં માસિક 35 હજાર રૂપિયાની સામે 45 હજાર રૂપિયા ભાડું ચૂકવવામાં આવે છે. મનપા પાસે સેંકડો વાહનો હોવા છતા ખાનગી વાહનો ભાડે રાખવામાં આવે છે. વાહનો ભાડે રાખવાના કોન્ટ્રાક્ટમાં મળતી મલાઈની મનપા અધિકારીઓને આદત પડી ગઈ છે. 

મનપાના અધિકારીઓ માટે વાહનો રખાય છે
અધિકારીઓને ઘરેથી ઓફિસ આવવા-જવા વાહનો ભાડે રખાયા છે. વાહન કૌભાડના કોંગ્રેસ મહિલા કોર્પોરેટરે આક્ષેપ કર્યા છે. વળી કોર્પોરેટરો, અને અધિકારીઓના અંગત કામો માટે પણ વાહનો ભાડે રાખવામાં આવે છે અને એ ખર્ચ મનપાને ચોપડે નાંખવામાં આવે છે. આ અંગે કોંગ્રેસે આરોપ લગાવ્યા હતા કે, હાથે કરીને મનપા આટલુ મોંઘુ ભાડુ ચુકવે છે. આ ભાડામાંથી અડધા પૈસા કોન્ટ્રાક્ટરને ઘેર જાય છે અને અડધા ફુટેલા જનતાના સેવકોને ઘેર.