બનાવ / VIDEO : ક્યાંક બાઈક તો ક્યાંક કાર, એક જ દિવસમાં વાહનોમાં આગ લાગવાની 3 ઘટના

Gujarat Fire Video : રાજ્યમાં અંગ દઝાડતી ગરમી વચ્ચે લોકો ઠંડક મેળવવા અવનવા પ્રયાસ કરી રહ્યા છે. આ તરફ અસહ્ય ગરમીને કારણે અનેક જગ્યાએ આગ પણ લાગતી હોય છે. આ બધાની વચ્ચે રાજ્યમાં 3 જગ્યાએ બાઇક-કાર અને ટ્રકમાં આગ લાગવાના બનાવો સામે આવ્યા છે. આ ત્રણેય આગની ઘટનામાં રાહતના સમાચાર એ છે કે, કોઈ જાનહાનિ નથી સર્જાઇ. આ ઘટનાઓ સુરત, જામનગર અને કચ્છમાં બની છે.

સુરતના વરાછામાં લક્ષ્મણનગર નજીક બાઈકમાં આગ

સુરતના વરાછાના લક્ષ્મણ નગર નજીક દિનદયાળ ચોકમાં આગની ઘટના સામે આવી છે. જેમાં બાઈક ચાલક સ્લીપ થયા બાદ એકાએક બાઈકમાં આગ લાગી હતી. જોકે બાઈક ચાલક સમય સૂચકતા વાપરી બાઇકથી દૂર ભાગી ગયો હતો. આ ઘટનામાં બાઈક આગમાં બળીને ખાક થયું હતું. સ્થાનિક લોકો દ્વારા બાઈકમાં લાગેલી આગ ઓલવવાનો પ્રયાસ કરાયો હતો. જોકે સદનસીબે આ ઘટનામાં કોઈ જાનહાની સર્જાઇ નહોતી.

જામનગરમાં કારમાં આગ લાગી

જામનગરમાં કારમાં આગ લાગવાનો સિલસિલો યથાવત છે. આજે વાકીયા ગામ પાસે કારમાં આગ લાગી હતી. કારમાં આગને કારણે રાજકોટ-જામનગર હાઇવે એક સાઇડનો રોડ બંધ કરવામાં આવ્યો હતો. જોકે રાહતની વાત એ છે કે, આ ઘટનામાં કારમાં સવાર લોકો બહાર નીકળી જતાં કોઈ જાન હાની સર્જાઇ નહોતી. આ તરફ ફાયર વિભાગને જાણ કરતા તાત્કાલિક ઘટના સ્થળે પહોંચી આગ પર કાબૂ મેળવ્યો હતો.

વધુ વાંચો : ગુજરાત જીતવા કોંગ્રેસે કસી કમર, પશ્ચિમ બંગાળમાં ભયાનક હિંસા, જુઓ 8 વાગ્યાના 8 મોટા સમાચાર

ભચાઉના ચીરઈ ગામ પાસે આવેલ હાઈવે ઉપર ટ્રકમાં લાગી આગ

આ તરફ કચ્છ જિલ્લાના ભચાઉના ચીરઈ ગામ પાસે આવેલ હાઈવે ઉપર ટ્રકમાં આગ લાગી હતી. વિગતો મુજબ મોડી રાત્રે મુન્દ્રાથી દિલ્લી જતી ચાલુ ટ્રકમાં આગ લાગતા દોડધામ મચી હતી. આ તરફ ટ્રકમાં આગ લાગવાના કારણે હાઈવે પર ટ્રાફિક જામ સર્જાયો હતો. જોકે ભચાઉ ફાયર વિભાગની ટીમે આગ પર કાબૂ મેળવ્યો હતો.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ