ગુજરાતના ખેડૂતો માટે માઠા સમાચાર આવ્યા છે. 18-19 ફેબ્રુઆરીએ દક્ષિણ ગુજરાતમાં વરસાદની હવામાન વિભાગે આગાહી કરી છે. અરબી સમુદ્ર તરફ ભેજવાળા પવન ફૂંકાતા હળવો વરસાદ વરસી શકે છે.
કમોસમી વરસાદની આગાહી
રાજ્યના ખેડૂતો માટે માઠા સમાચાર
આગામી બે દિવસમાં વરસાદની આગાહી
ગુજરાતના વાતાવરણમાં પલટાની આગાહી હવામાન વિભાગ દ્વારા કરવામાં આવી છે. અરબી સમુદ્ર તરફ ભેજવાળા પવન ફૂંકાતા દક્ષિણ ગુજરાતમાં સામાન્ય વરસાદ પડી શકે છે. ઉત્તર કોંકણ અને વિદર્ભમાં સર્ક્યૂલેશન સર્જાતા 19 ફેબ્રુઆરીએ હળવો વરસાદ વરસી શકે છે. જેને લઇને ખેડૂતોની ચિંતામાં વધારો થયો છે.
તાપમાનઃ આગામી 2 દિવસમાં લઘુત્તમ તાપમાનમાં ફેરફાર થવાની સંભાવના નહીંવત છે. જોકે બાદમાં ત્રણ દિવસ દરમિયાન તાપમાનમાં 2થી 3 ડિગ્રી વધારો થઇ શકે છે.
આ વિસ્તારમાં પડી શકે વરસાદ: ગુજરાતના વલસાડ, તાપી, સાપુતારા, નર્મદા, ડાંગ, પંચમહાલ, દાહોદ, મહિસાગર અને મધ્ય ગુજરાતના વિસ્તારોમાં કમોસમી વરસાદ વરસી શકે છે. તો રાજ્યના અરવલ્લી, સાબરકાંઠા અને સૌરાષ્ટ્રમાં વાદળછાયું વાતાવરણ રહેવાની શક્યતા છે.
દેશના અનેક રાજ્યોમાં વરસાદનું પણ એલર્ટ જારી કરવામાં આવ્યું
દેશભરમાં હવામાન ધીરે ધીરે બદલાઈ રહ્યું છે. હાડ કકડાવતી ઠંડી બાદ તાપમાનમાં વધારો જોવા મળ્યો છે. પરંતુ ઉત્તર ભારતમાં ઘૂમ્મસની અસર હજું પણ વર્તાઈ રહી છે. અમૃતસર અને જમ્મુ કાશ્મીરમાં આજે સવારે ઝીરો વિજિબિલીટી દાખલ કરવામાં આવી છે. આ વિસ્તારોમાં સોમવારે સાંજથી જ ધુમ્મસની અસર જોવા મળી હતી. હવામાન વિભાગ(IMD)ના જણાવ્યાનુંસાર પશ્ચિમી વિક્ષોભ એક વાર હવામાન પર અસર નાંખશે. જો કે દેશના અનેક રાજ્યોમાં વરસાદનું પણ એલર્ટ જાહેર કરવામાં આવ્યું છે. હવામાન વિભાગે કહ્યું કે ઉત્તરાખંડ, હિમાચલ, જમ્મુ- કાશ્મીર ઉપરાંત 15 ફેબ્રુઆરી બાદ મધ્ય પ્રદેશ, છત્તીસગઢ, ઓડિસા, ઝારખંડ, મહારાષ્ટ્ર, તેલંગાના અને તમિલનાડુમાં કમોસમી વરસાદ થવાની શક્યતા છે.