અરજી / ગુજરાત હાઇકોર્ટનો મહત્વનો આદેશ: પોલીસ સ્ટેશનોમાં 6 મહિના સુધીના CCTV ફૂટેજ સાચવી રાખો

• પોલીસ સ્ટેશનોમાં CCTV ફુટેજ સાચવી રાખવા કોર્ટનો આદેશ
• 6 મહિના ઓડિયો-વીડિયો સાચવી રાખવા HCનો આદેશ
• હેબિયસ કોર્પસની થયેલી અરજી પર કોર્ટે પોલીસને કર્યો આદેશ

પાલીતાણામાં એક યુવક- યુવતી લગ્ન કરે તે પહેલાં જ પોલીસ દ્વારા યુવકને કસ્ટડીમાં લઇ લેતા હાઇકોર્ટમાં હેબિયસ કોર્પસ કરાઇ હતી. પોલીસે યુવકને પોલીસ સ્ટેશનમાં ખૂબ માર માર્યો હોવાની પરિવાર દ્વારા રજૂઆત કરાઇ હતી. આ અંગે ફરિયાદ કરતા ગુજરાત હાઇકોર્ટે પોલીસ સ્ટેશનને CCTV ફૂટેજ રજૂ કરવા આદેશ કર્યો હતો.

હેબિયસ કોર્પસની અરજી પર પોલીસ સ્ટેશનોમાં CCTV ફુટેજ સાચવી રાખવા કોર્ટનો આદેશ

કોર્ટે હેબિયસ કોર્પસની અરજી પર પોલીસ સ્ટેશનોમાં CCTV ફુટેજ સાચવી રાખવા આદેશ કર્યો છે. 6 મહિના ઓડિયો-વીડિયો સાચવી રાખવા ગુજરાત હાઇકોર્ટે આદેશ કર્યો છે. હાઇકોર્ટે કહ્યું કે, સુપ્રીમ કોર્ટની માર્ગદર્શિકા મુજબ પોલીસ સ્ટેશનમાં CCTV ફુટેજ રાખો. તમને જણાવી દઇએ કે, અગાઉ પણ HCએ પોલીસ સ્ટેશનના CCTV ચાલુ રાખવા આદેશ કર્યો હતો.

જો કે, આ મામલે પોલીસે દલીલ કરી હતી કે, 30 દિવસના CCTV ફૂટેજ સાચવી રાખવામાં આવે છે. ત્યારે કોર્ટે એવી ટકોર કરી હતી કે, 6 મહિના સુધીના CCTV ફૂટેજ સાચવી રાખવા જોઇએ. હાઇકોર્ટે જીલ્લા પોલીસ વડાને પોલીસ સ્ટેશનમાં માર મારનાર અધિકારીને ઓળખીને રિપોર્ટ રજૂ કરવાનો પણ આદેશ કર્યો છે.

લગ્નની નોંધણીની નોટિસ કાઢવામાં આવે એ પહેલાં પોલીસ યુવક-યુવતીને ઉઠાવી ગઇ

મળતી માહિતી અનુસાર, પાલીતાણામાં એક યુવક અને યુવતી એકબીજાને પ્રેમ કરતા હોવા છતાં અલગ ધર્મના હોવાથી તેઓ ભાગી ગયા હતા. આથી તેઓએ મેરેજ રજિસ્ટ્રાર પાસે લગ્નની નોંધણી કરાવી હતી. 30 દિવસ બાદ નોટિસ કાઢવામાં આવી તે પહેલાં જ પોલીસ યુવક-યુવતીને લઇને જતી રહી અને યુવકને પોલીસ સ્ટેશનમાં માર માર્યો હોવાની પરિવાર દ્વારા રજૂઆત કરાઇ હતી.