અલ્પેશ ઠાકોરનું ધારાસભ્ય પદ રદ કરવાની અરજી મામલે હાઇકોર્ટ ચુકાદો આપ્યો છે. બંને પક્ષોની રજૂઆતો બાદ હાઈકોર્ટે કોંગ્રેસની અરજી ફગાવી છે.
અલ્પેશ ઠાકોર મુદ્દે ચાલી રહેલા વિવાદ અંગે આખરે હાઇકોર્ટને ચુકાદો આવ્યો છે. હાઇકોર્ટમાં કોંગ્રેસને ફટકો પડ્યો છે. કોર્ટે અલ્પેશ ઠાકોરનું ધારાસભ્ય પદ રદ કરવાની અરજી મામલે પોતાનો ચુકાદો આપ્યો છે. જેમાં હાઇકોર્ટે અલ્પેશ ઠાકોરનું ધારાસભ્ય પદ રદ્દ કરવાની કોંગ્રેસની અરજી ફગાવી છે. કોર્ટે વિધાનસભા અધ્યક્ષની કામગીરીમાં હસ્તક્ષેપ કરવાની ના પાડી છે. કોર્ટનું અવલોકન છે કે, અલ્પેશ ઠાકોરને સસ્પેન્ડ કરવાની અરજી અધ્યક્ષ સમક્ષ પેન્ડિગ છે. એટલે કોર્ટ તેના વિષયમાં હસ્તક્ષેપ નહીં કરે.
મહત્વનું છે કે કોંગ્રેસની વચગાળાના આદેશ આપવાની માગ ફગાવી હતી. કોંગ્રેસની લીગલ ટીમે વચગાળાનો આદેશ આપવા હાઇકોર્ટમાં રજૂઆત કરી હતી. કોંગ્રેસે અલ્પેશ ઠાકોરને સસ્પેન્ડ કરવા અધ્યક્ષને વચગાળાનો આદેશ કરવા રજૂઆત કરી હતી. કોંગ્રેસના વિધાનસભાના દંડક અશ્વિન કોટવાલે હાઈકોર્ટમાં અરજી કરી હતી. જેમાં અલ્પેશ ઠાકોરના પક્ષ વિરોધી વલણને લઇ ધારાસભ્ય પદ રદ્દ કરવા માટે અરજી કરી હતી. જેને લઈને હાઈકોર્ટ આજે ચુકાદો આપ્યો છે. હાઇકોર્ટે અલ્પેશ ઠાકોરના ધારાસભ્ય પદને રદ કરવાની અરજી ફગાવી છે.
મેં રાજીનામુ આપ્યું નથીઃ અલ્પેશ ઠાકોર
જો કે થોડા દિવસ અગાઉ અલ્પેશ ઠાકોરે હાઈકોર્ટમાં સોગંદનામું રજૂ કર્યું હતું. તેમાં પોતે કોંગ્રેસમાંથી રાજીનામું ન આપ્યું હોવાનો ઉલ્લેખ કર્યો હતો. તો બીજી તરફ વિધાનસભા અધ્યક્ષે પણ હાઈકોર્ટમાં રજૂઆત કરી છે કે કોર્ટ અધ્યક્ષના નિર્ણયમાં હસ્તક્ષેપ ન કરે. તો બન્ને પક્ષ તરફથી હાઈકોર્ટમાં સોગંદનામું રજૂ કરવામાં આવ્યું હતું.