વાલીને રાહત / 'ફીનું દબાણ કરતા સંચાલકો સામે કાયદેસરની કાર્યવાહી થશે', સુરત કલેકટરના પરિપત્ર પર સ્ટે મૂકી હાઈકોર્ટનો સંચાલકોને નિર્દેશ

• સુરત કલેકટરના પરિપત્ર પર હાઈકોર્ટે હાલ પુરતો સ્ટે આપ્યો 
• ફીનું દબાણ કરતા સંચાલકો સામે કાયદેસરની કાર્યવાહી થશે: HC
• બાકી ફી માટે વાલીઓને જાણ કરવી એ દબાણ ન કહી શકાય: સંચાલક

સુરત કલેક્ટરના ખાનગી શાળાને નિયંત્રિત કરતા પરિપત્ર મુદ્દે હાઈકોર્ટે હાલપુરતો સ્ટે આપ્યો છે. હાઇકોર્ટે રાષ્ટ્રીય બાળ અધિકાર સંરક્ષણ આયોગને પક્ષકાર તરીકે જોડાવા નિર્દેશ કર્યો છે. હાઈકોર્ટે રાષ્ટ્રીય બાળ અધિકાર સંરક્ષણ આયોગને નોટિસ પાઠવી છે. 

ફીનું દબાણ કરતા સંચાલકો સામે કાયદેસરની કાર્યવાહી થશે: HC
કલેકટરે ફી મુદ્દે ખાનગી શાળાઓને ઉદ્દેશીને પરિપત્ર જાહેર કર્યો હતો. સ્કૂલ સંચાલક મંડળે હાઈકોર્ટમાં આ પરિપત્રને પડકાર્યો હતો. હાઈકોર્ટે શાળાના સંચાલકો અને કલેક્ટરને ટકોર કરી જણાવ્યું હતું કે જિલ્લા કલેકટર સત્તા બહારના નિર્દેશો ન આપી શકે. વિદ્યાર્થીની ફી બાકી હોય તો બાળકો પર દબાણ કરવું નહીં, ફીનું દબાણ કરતા સંચાલકો સામે કાયદેસરની કાર્યવાહી થશે. બાકી ફી માટે વાલીઓને જાણ કરવી એ દબાણ ન કહી શકાય એવો મત સંચાલકોએ કોર્ટને જણાવ્યો હતો.

શું છે સમગ્ર મામલો
મહત્વનું છે કે સુરત કલેકટરને વાલીઓની ફરિયાદ મળી હતી કે સત્ર પૂરું થવા આવતા શાળા સંચાલકો સતત ફી ભરવા માટે દબાણ કરી રહ્યા છે જે બાદ કલેકટર દ્વારા પરિપત્ર જાહેર કરવામાં આવ્યો હતો કે કોઈ સંચાલકો બાકી સ્કૂલ ફી વસૂલાત મુદ્દે વિદ્યાર્થીને હેરાન કરશે નહીં, નહીંતર શાળા સંચાલક સામે કાયદેસરની કાર્યવાહી થશે. આ પરિપત્રનો સંચાલકોએ પુરજોષથી વિરોધ કર્યો હતો અને હાઈકોર્ટમાં પિટિશન દાખલ કરી હતી. બીજી તરફ વાલીઓએ કલેકટરના પરિપત્રની સમર્થન કર્યું હતું. જે બાદ આજે કોર્ટમાં હાથ ધરાયેલી સુનાવણીમાં કોર્ટ નિર્દેશ કર્યો હતો કે વિદ્યાર્થીની ફી બાકી હોય તો બાળકો પર દબાણ કરવું નહીં. તેમજ કલેકટરને પણ પોતાની સત્તામાં રહીને આદેશ જાહેર કરવા સૂચન કર્યું હતું. 

ખાનગી શાળા સંચાલકોના ફી મુદ્દેના વલણમાં વાલીઓમાં રોષ છે. કોર્ટમાં  થયેલી પિટિશનમાં વિદ્યાર્થીઓના અધિકારોના રક્ષણ માટે વાલીઓ હાઇકોર્ટમાં જોઇનિંગ પાર્ટી તરીકે જોડાયા હતા.