સાબરમતી નદીને પ્રદૂષિત કરતી તમામ સોસાયટીઓની માહિતી મેળવવા AMCને કોર્ટનો આદેશ, કોર્ટે કહ્યું એકમો કે સોસાયટીઓ કોઈને ન બક્ષવા નહીં
સાબરમતી નદીને પ્રદૂષિત કરવાનો મામલો
પ્રદૂષણ ફેલાવતા એકમો બંધ રાખવા આદેશ છતાં એકમો શરૂઃ HC
ગુજરાત હાઇકોર્ટનો એકમો સામે ફરિયાદ નોંધવા પોલીસને હુકમ
અમદાવાદ જે નદી પર ગર્વ લઈ રહ્યું છે તેની જાળવણી કરવામાં તંત્ર નિષ્ફળ સાબિત થયું છે. હાઇકોર્ટ આ મુદ્દે સખ્તાઈ વર્તવવા ટકોર કરે છે પરંતુ તંત્ર આ બાબતે ઢીલી નીતિ બતાવી રહ્યું છે. અમદાવાદ મ્યુનિસિપલ કોર્પોરેશનને નદી માં કેમિકલ છોડતી કંપનીઓ સામે કાર્યવાહી કરવા આદેશ આપવામાં આવ્યો અને કોર્પોરેશને પણ ઘણી ફેકટરીઓના ડ્રેનેજ કનેક્શન કાપ્યા પરંતુ આ કાર્યવાહી માત્ર કાગળ પર કરી હોય તેવા દ્રશ્યો જોવા મળી રહ્યા છે.હજુ પણ સાબરમતી નદી માં બેફામ કેમિકલ માફિયાઓ કેમિકલ છોડી નદીને પ્રદુષિત કરી રહ્યા છે અને તંત્ર આંખ આડા કાન કરી રહ્યું છે.
સાબરમતી નદીને માતા કહેતા પણ શરમ આવે તેવી હાલત: કોર્ટ
સાબરમતી નદીને પ્રદૂષિત કરવા મામલે ફરિયાદ નોંધવા માટે હાઈકોર્ટ દ્વારા હુકમ કરવામાં આવ્યો. ગુજરાત હાઇકોર્ટે પ્રદૂષણ ફેલાવતા એકમો સામે ફરિયાદ નોંધવા પોલીસને હુકમ ફરમાવ્યો છે. ગુજરાત હાઇકોર્ટે પ્રદૂષણ ફેલાવતા એકમો સામે નારાજગી વ્યક્ત કરતા જણાવ્યુ કે પ્રદૂષણ ફેલાવતા એકમો બંધ રાખવા માટે આદેશ આપવામાં આવ્યા હતા, છતાં એકમો શરૂ જ છે, તેને આદેશ બાદ બંધ નથી કરાયા. સાબરમતી નદીને માતા કહેતા પણ શરમ આવે તેવી નદીની હાલત થી ગઈ છે.
27 જેટલી સોસાયટીઓ પ્રદૂષિત પાણી સીધુ જ સાબરમતીમાં ઠાલવે છે: કોર્ટ મિત્ર
નદીને પ્રદૂષિત કરતા એકમો સામે તત્કાલિક ફરિયાદ નોંધવા હાઈકોર્ટે હુકમ કર્યો છે. સાબરમતી નદી મામલે કોર્ટ મિત્રએ કોર્ટમાં રજૂઆત કરી હતી કે 27 જેટલી સોસાયટીઓ પ્રદૂષિત પાણી સીધુ જ સાબરમતીમાં ઠાલવે છે. તેથી હાઈકોર્ટે AMCને આદેશ કર્યો છે કે તમામ સોસાયટીઓની માહિતી મેળવી લેવામાં આવે. ઔદ્યોગિક એકમો કે સોસાયટીઓ કોઈને પણ બક્ષવામાં નહીં આવે તેમ હાઈકોર્ટે જણાવ્યુ હતુ.
અગાઉની સુનાવણીમાં શું શું થયું?
સાબરમતી નદીને પ્રદુષિત થતી અટકાવવા માટે ગુજરાત હાઇકોર્ટ અથાક પ્રયત્ન કરી રહી છે સાથે કોર્પોરેશન તરફથી પણ કોર્ટની દખલગીરી બાદ થોડા ઘણા અંશે પગલાઓ લેવામાં આવી રહ્યા છે ત્યારે ગુજરાત હાઇકોર્ટમાં કોર્પોરેશન તરફથી રજૂઆત કરવામાં આવી હતી કે જ્યારે એકમો સામે પગલાં લેવા જાય છે ત્યારે એકમ માલિકો નેતાઓના નામથી દાદાગીરી કરીને કોર્પોરેશનના અધિકારીઓને ધાક-ધમકી આપી રહ્યા છે ત્યારે એકમો સામે લાલ આંખ કરતાં કોર્ટે જે નેતાઓ ના નામ થી દાદાગીરી કરવામાં આવે છે તે નેતાઓના નામ ગુજરાત હાઇકોર્ટમાં જાહેર કરવા માટે કોર્પોરેશનને હાઈ કોર્ટે નિર્દેશ આપ્યો હતો. સાબરમતી નદી પ્રદૂષિત થતી અટકાવવા માટે કોઈને પણ છોડવામાં નહીં આવે અને કડકમાં કડક પગલાં લેવામાં આવશે નવાઈની વાત લાગે છે કે સાબરમતી નદીને પ્રદુષિત થતી અટકાવવા માં કોઈને રસ નથી અને માત્ર અને માત્ર એકમોને છાવરવામાં જ નેતાઓને છે કે શું આવું વેધક સવાલ ગુજરાત હાઇકોર્ટે કર્યો હતો.આ સાથે હાઈકોર્ટે સાબરમતી પ્રદૂષિત ન થાય અને કોર્ટના આદેશનું કેટલા અંશે તંત્ર દ્વારા પાલન થાય તેને જોવા માટે કોર્ટ મિત્રની પણ નિમણૂક કરી છે.