હવામાન / રાજ્યભરમાં મેઘો મંડાયોઃ સૌરાષ્ટ્ર-દ.ગુજરાતમાં ધોધમાર વરસાદ, બે દિવસની ભારે આગાહી

આગામી 24 કલાકમાં રાજ્યભરમાં વરસાદી માહોલ સર્જાશે. હવામાન વિભાગની આગાહી મુજબ આજે દક્ષિણ ગુજરાતમાં ભારે વરસાદ પડી શકે છે. આગામી 24 કલાકમાં સારો વરસાદ રહેશે. ત્યારે અત્યાર સુધી રાજ્યમાં 27 ટકા વરસાદ નોંધાયો છે. સાયકલોનિક સર્ક્યુલેશનની સિસ્ટમના કારણે રાજ્યમાં વરસાદ સારો રહેશે તેવું અનુમાન છે. ત્યારે અમદાવાદમાં પણ વરસાદનું આગમન થઇ રહ્યું છે. તો રાજ્યના અનેક વિસ્તારોમાં મેઘરાજા મહેરબાન થયા હતા.

દેવભૂમિ દ્વારકાના અનેક વિસ્તારોમાં ધોધમાર વરસાદ

લાંબા વિરામ બાદ પાટણ અને હારીજ તાલુકામાં વરસાદ થયો હતો. વરસાદ થતા ગરમીથી રાહત મળી છે. પાટણ અને હારીજનાં અસહ્ય ઉકળાટ બાદ વરસાદનું આગમન થયું છે. વરસાદથી ખેડૂતોના ઉભા પાકને જીવનદાન મળ્યું છે. દેવભૂમિ દ્વારકાના ભાણવડમાં ધોધમાર વરસાદ થયો છે. દ્વારકામાં ધોધમાર વરસાદ તૂટી પડ્યો છે. શહેરના નીચાણવાળા વિસ્તારમાં પાણી ભરાયા છે. જ્યારે જામરાવલ સહિતના વિસ્તારોમાં પણ ધોધમાર વરસાદ વરસ્યો હતો. આશરે 2 ઈંચ જેટલા વરસાદથી પાણી ભરાયા છે. જાહેર બજારના રોડ પાણીમાં ગરકાવ થયા છે.

જામકલ્યાણપુરમાં વાડીની દીવાલ તૂડી પડી

દ્વારકાના જામકલ્યાણપુરમાં ધોધમાર વરસાદ વરસ્યો હતો. ભોગાત ગામે એક કલાકમાં એક ઇંચથી વધુ વરસાદ થયો હતો. આ વરસાદને પગલે ખેતરની દિવાલ ધરાશાયી થઇ છે. ઉપર વાડી વિસ્તારમાં તીવ્ર પ્રવાહથી દીવાલ તૂટી પડી હતી.
 

જેતપુરમાં ગાજવીજ સાથે વરસાદ

જેતપુરમાં ફરી ગાજવીજ સાથે વરસાદનું આગમન થયું હતું. જેતપુરમાં ધોધમાર વરસાદ શરૂ થયો હતો. ભારે પવન અને વીજળી સાથે વરસાદનું આગમન થયું હતું. સવારથી અસહ્ય ગરમી બાદ વરસાદનું આગમન થયું હતું.

જેતપુર સિવિલ હોસ્પિટલમાં પાણી ઘુસ્યા

વરસાદથી જેતપુર સિવિલ હોસ્પિટલમાં પાણી ભરાયા હતા. સ્ટાફ દ્વારા સિવિલ હોસ્પિટલના ઇમરજન્સી વોર્ડ અને લોબીમાંથી પાણીને બહાર કાઢવામાં આવ્યું હતું. પાણી ભરાતાત લોબીમાં પડેલો દવાનો જથ્થો પણ ખરાબ થઇ ગયો હતો. હોસ્પિટલમાં પાણી ઘુસી જતા દર્દીઓને હાલાંકીનો સામનો કરવો પડી રહ્યો છે.

ગોંડલ પંથકમાં ધોધમાર વરસાદ શરૂ

રાજકોટના ગોંડલ પંથકમાં ધોધમાર વરસાદ વરસ્યો હતો. ગાજવીજ સાથે ભારે વરસાદથી પાણી ભરાયા હતા. ગોંડલથી અમરેલી-બગસરાનો માર્ગ બંધ થયો હતો. ગોંડલ નજીક કોઝ-વે પણ પાણીમાં જતો રહ્યો હતો. મેતા ખંભાળિયા, કેશવાળા, સાજડિયાળી, કમઢીયા, ખીલોરી સહિતના ગામોમાં વરસાદ વરસ્યો હતો. તો અમરેલીમા બાબરા સહિતના ગ્રામ્ય વિસ્તારોમાં વરસાદ વરસ્યો હતો. ચરખામાં 2 ઇંચ વરસાદ ખાબકતા રસ્તા પાણીમાં ગરકાવ થયા હતા. તો ચમાંરડી રોડના કોઝ વે પર નાળાના પાણી ફરી વળ્યાં હતા.

ગીર સોમનાથના વિસ્તારોમાં મેઘમહેર

ગીર સોમનાથના કોડીનારના કંટાળા ગામમાં ધોધમાર વરસાદ વરસ્યો હતો. કંટાળા ગામે 2.5થી 3 ઇંચ વરસાદ વરસ્યો હતો. પોણા 2 કલાક કડાકા સાથે વરસાદ વરસતા ખેતરોમાં પાણી ભરાયા હતા.

જૂનાગઢમાં ધીમી ધારે વરસાદ

વેરાવળમાં ધીમી ધારે વરસાદ શરૂ થયો હતો. ગરમીના ઉકળાટ બાદ વરસાદ શરૂ થયો હતો. તો આ કપઉ જૂનાગઢમાં પણ ધીમી ધારે વરસાદ શરૂ થયો હતો. વરસાદથી ખેડૂતોના ઉભા પાકને જીવનદાન મળ્યું હતું. તેમજ વાવણી લાયક વરસાદથી ખેડૂતોમાં આનંદની લાગણી છવાઇ હતી. 

સુરતમાં વરસાદ પડતા ખેડૂતોમાં આનંદ છવાયો

સુરત જીલ્લામાં ધોધમાર વરસાદ થયો હતો. લાંબા વિરામ બાદ વરસાદ પડતાં ખેડુતોમાં આનંદ છવાયો છે. જિલ્લાના ગ્રામ્ય વિસ્તારોમાં ભારે વરસાદ થયો હતો. ઓલપાડ, કીમ, કામરેજ, બારડોલી સહિત સમગ્ર જીલ્લામાં વરસાદ થયો હતો.

ભરૂચમાં 24 કલાકના વિરામ બાદ ફરી એન્ટ્રી 

ભરૂચમાં 24 કલાકના વિરામ બાદ ફરી વરસાદની એન્ટ્રી થઇ છે. વીજળી સાથે મુશળધાર વરસાદ શરૂ થયો હતો. વાદળછાયા વાતાવરણ વચ્ચે વરસાદની એન્ટ્રી થઇ હતી. અડધા કલાકના વરસાદમાં જ પાણી ભરાઇ ગયુ હતું. સેવાશ્રમ રોડ, કસક, પાંચબતી, ગાંધી બજાર વિસ્તારમાં પાણી ભરાઇ ગયું હતું.

છોટાઉદેપુરમાં વરસાદનું આગમન

છોટાઉદેપુરમાં લાંબા વિરામ બાદ બોડેલી પંથકમા વરસાદનું આગમન થયું છે. અસહ્ય ગરમી બાદ વરસાદ થતા વાતાવરણમાં ઠંડક પ્રસરી છે. વરસાદ પાછો ખેંચાતા ખેડુતો ચિંતામાં મુકાયા હતાં.

પોરબંદર જિલ્લાના ગ્રામ્ય વિસ્તારોમાં વરસાદ

પોરબંદર જિલ્લાના ગ્રામ્ય વિસ્તારોમાં વરસાદ થયો છે. બરડા પંથકમાં વરસાદની ધમાકેદાર એન્ટ્રી થઇ છે. બગવદર, શિશલી, શીંગડા, ફટાણા સહિતના ગામોમાં વરસાદ થયો છે. 2થી 3 ઈંચ વરસાદ પડતાં ખેડૂતોના ઉભા પાકને જીવંતદાન મળ્યુ છે.

લીંબડી સહીત આસપાસના અનેક ગામોમાં વરસાદ

સુરેન્દ્રનગરના લીંબડી સહીત આસપાસના અનેક ગામોમાં વરસાદ થયો હતો. ટોકરાળા, ગેડી, જાખણ ગામે વરસાદ થયો છે. કટારીયા, રળોલ સહિતના ગામોમાં વરસાદ થયો હતો. વાવણીલાયક વરસાદથી ખેડૂતોના પાકને જીવનદાન મળ્યું છે. જૂનાગઢ જિલ્લાના માંગરોળમાં વીજળીના કડાકા સાથે વરસાદ થયો હતો. વીજળીના કડાકા સાથે વરસાદ તૂટી પડ્યો હતો. આ વરસાદથી નિચાણવાળા વિસ્તારમાં પાણી ભરાયા છે.

વરસાદ માટે સાબર ડેરીમાં યજ્ઞ

પંચમહાલ જિલ્લામાં લાંબા વિરામ બાદ વરસાદની ધમાકેદાર એન્ટ્રી થઇ છે. શહેરા, મોરવાહડફ, ગોધરા તાલુકાના ગામોમાં વરસાદ થયો હતો. છેલ્લા 15 દિવસથી અસહ્ય ગરમી પડી રહી હતી. વરસાદથી ડાંગર અને મકાઇ જેવા પાકને જીવનદાન મળ્યું છે. વરસાદ શરૂ થતાં ખેડૂતોમાં પણ ખુશી જોવા મળી છે. અરવલ્લીના દુધ ઉત્પાદકોની જીવાદોરી સમાન સાબર ડેરીમાં યજ્ઞ કરવામાં આવ્યો છે. ડેરીના ચેરમેન, કર્મચારીઓ સહિત ડીરેક્ટર હાજર રહ્યાં હતાં.