રાજ્યભરમાં રાતભર ધમાકેદાર વરસાદ વરસ્યો છે. જેમાં દક્ષિણ ગુજરાત અને સૌરાષ્ટ્રમાં ભારે વરસાદ પડ્યો છે. જેમાં વાપીમાં 11 ઇંચ, પારડીમાં 10 ઇંચ વરસાદ નોંધાયો છે. જ્યારે ધરમપુરમાં 5 ઇંચ, ઉમરગામમાં 6 ઇંચ વરસાદ, અમદાવાદમાં બે ઇંચ, ગાંધીનગરમાં 1 ઇંચ વરસાદ નોંધાયો છે.
જ્યારે ખેડા જિલ્લામાં 3.5 ઇંચ વરસાદ, મહુધામાં 3 ઇંચ, વસોમાં 2 ઇંચ વરસાદ, મહેમદાબાદ 2 ઇંચ, મહેસાણામાં 1 ઇંચ વરસાદ નોંધાયો છે. આમ ગુજરાતમાં ભાદરવા મહિનામાં પણ ભારે વરસાદ યથાવત્ રહ્યો છે.
વલસાડમાં ધોધમાર વરસાદ, વાપીમાં 11 ઇંચ વરસાદ
વલસાડ જિલ્લામાં મોડી સાંજે ભારે વરસાદ ખાબકયો હતો. જેના કારણે અનેક વિસ્તારોમાં પાણી ભરાવાની સમસ્યા ઉભી થઇ હતી. સૌથી વધારે વરસાદ વાપીમાં પડ્યો. જેમાં વાપીમાં 11 ઈંચ વરસાદ પડ્યો છે, જ્યારે પારડીમાં 10 ઈંચ વરસાદ થયો છે. વાપીના ગુંજન ચણોદ ડુંગરી ફળિયા વિસ્તારમાં પાણી ભરાવાની સમસ્યા પણ ઉભી થઈ હતી. જો કે વાપીના પોશ વિસ્તાર એવા ગુંજનમાં આવેલ શોપિંગ સેન્ટરમાં દુકાનોમાં પાણી ભરાયા હતા. જેના કારણે વેપારીઓને ભારે નુકસાન વેઠવાનો વારો આવ્યો હતો.
કચ્છની જીવાદોરી સમાન ટપ્પર ડેમ ઓવરફલો થવાના આરે
કચ્છના ભૂજ વિસ્તારમાં સારા વરસાદથી તળાવો ઓવરફલો થયા છે. જેમાં ખત્રી તળાવ ઓવરફલો થઇ જતાં પાણી મુખ્ય રસ્તાઓ પર ફરી વળેલા જોવા મળ્યાં છે. કચ્છના જીવાદોરી સમાન ટપ્પર ડેમ ઓવરફલો થવાના આરે છે ત્યારે ડેમની આસપાસના 8 ગામોને એલર્ટ કરાયા છે.
સુરેન્દ્રનગર જિલ્લામાં સાર્વત્રિક વરસાદ
સુરેન્દ્રનગર જિલ્લામાં સાર્વત્રિક વરસાદના પગલે 4 ડેમ ઓવરફલો થયા છે. જેમાં ત્રિવેણી ઠાંગા, મોરસલ, થોરીયાળી અને નાયકા ડેમનો સમાવેશ થાય છે. જ્યારે જિલ્લાની જીવા દોરી સમાન ધોળી ધજા ડેમ ગમે ત્યારે ઓવરફલો થાય તેવી શક્યતા છે.
મહિસાગર જિલ્લામાં મેઘમહેર
મહિસાગર જિલ્લામાં સાર્વત્રિક વરસાદ નોંધાયો છે. જેમાં કડાણામાં સવા ઇંચ, લુણાવાડામાં 1 ઇંચ વરસાદ, વીરપુરમાં 1 ઇંચ, સંતરામપુરમાં પોણો ઇંચ વરસાદ નોંધાયો છે. ભારે વરસાદના પગલે કડાણા ડેમમાં પાણીની આવકમાં વધારો થયો છે.
પંચમહાલ જિલ્લામાં રાત દરમિયાન ધોધમાર વરસાદ
પંચમહાલ જિલ્લામાં રાત દરમિયાન ધોધમાર વરસાદ વરસ્યો છે. જેમાં કાલોલ, હાલોલ, ગોધરા, ઘોઘંબામાં ભારે વરસાદ પડ્યો છે. વરસાદ થતા ખેડૂત પુત્રોમાં આનંદનો માહોલ જોવા મળ્યો છે. બુધવાર સાંજથી શરૂ થયેલા વરસાદે હાલ વિરામ લીધો છે.
નવસારી જિલ્લાના તમામ તાલુકાઓમાં વરસાદ પડ્યો છે. જેમાં ગણદેવીમાં સૌથી વધુ 6 ઇંચ વરસાદ, ખરેગામમાં 3 અને નવસારીમાં 2 ઇંચ વરસાદ નોંધાયો છે. જલાલપોર અને ચીખલીમાં સવા ઇંચ વરસાદ નોંધાયો છે.
ભાવનગરના તમામ તાલુકામાં વરસાદી વાતાવરણ
ભાવનગરના તમામ તાલુકામાં મેઘમહેર જોવા મળી છે. જેમાં શહેરમાં અડધો ઇંચ, મહુવામાં 2 ઇંચ, ગારીયાધાર 1.5 ઇંચ, વલ્લભીપુરમાં સવા ઇંચ વરસાદ, ઉમરાળામાં 1 ઇંચ અને તળાજામાં અડધો ઇંચ વરસાદ પડ્યો છે.
રાજયમાં આગામી ત્રણ દિવસ ભારે વરસાદની આગાહી
રાજ્યમાં આગામી ત્રણ દિવસ વરસાદની આગાહી આપવામાં આવી છે. જેમાં અમદાવાદ, ગાંધીનગર, ખેડા, આણંદ, વડોદરામાં વરસાદની આગાહી આપવામાં આવી છે. સર્ક્યુલેશન સિસ્ટમના કારણે ભારે વરસાદની આગાહી આપવામાં આવી છે. આજે સૌરાષ્ટ્ર, દક્ષિણ ગુજરાતમાં વરસાદની આગાહી અપાઇ છે.