વરસાદ / રાજ્યમાં છેલ્લા 24 કલાકમાં 121 તાલુકાઓમાં મેઘમહેર યથાવત્

જ્યારે જુલાઈ માસની શરૂઆતમાં પોણો ઈંચ વરસાદ નોંધાયો. સીઝનનો અત્યાર સુધીનો 15.13 ટકા વરસાદ નોંધાયો છે. રાજ્યના 44 તાલુકામાં 0થી 2 ઈંચ વરસાદ, 132 તાલુકામાં 2થી 5 ઈંચ વરસાદ, 66 તાલુકામાં 5થી 10 ઈંચ વરસાદ, 16 તાલુકામાં 10થી 20 ઈંચ વરસાદ અને 6 તાલુકામાં 20થી 40 ઈંચ જેટલો વરસાદ નોંધાયો છે.


 

આગામી 3 દિવસ સુધી રાજ્યમાં વરસાદી માહોલ રહેશે યથાવત 
દક્ષિણ ગુજરાતમાં વરસાદ થંભવાનું નામ નથી લઈ રહ્યો. ત્યારે હવામાન વિભાગે હજુ પણ આગામી 3 દિવસ સુધી રાજ્યમાં વરસાદી માહોલ રહેશે તેવી આગાહી કરી છે. હવામાન વિભાગનું માનીએ તો દક્ષિણ ગુજરાતના જિલ્લાઓમાં ભારે વરસાદ થઈ શકે છે. સુરત, નવસારી અને વલસાડમાં વરસાદ થઈ શકે છે. જ્યારે મધ્યગુજરાત અને કચ્છમાં સામાન્ય વરસાદ પડી શકે છે..આ તરફ સૌરાષ્ટ્રના દરિયા કિનારાના જિલ્લાઓમાં વરસાદ થાય તેવી શક્યતા છે.

વલસાડમાં ભારે વરસાદના પગલે કેટલીક સોસાયટીમાં પાણી ભરાયા
વલસાડમાં સતત ધોધમાર વરસાદ વરસી રહ્યો છે. ભારે વરસાદને પગલે સોસાયટીઓમાં પાણી ભરાયા છે. સુધા નગર, ગરીબ નવાઝ સોસયટીમાં 3 ફૂટ જેટલો પાણી ભરાયા છે.જેના કારણે સ્થાનિકોને હાલાકી ભોગવવાનો વારો આવ્યો છે. 

વલસાડના ઉમરગામમાં ભારે વરસાદને લઇ અસર
વલસાડના ઉમરગામમાં ભારે વરસાદના કારણે સામાન્ય જનજીવનને અસર પડી છે. વરોલી ખાડી બે કાંઠે વહેતા નીચાણવાળા વિસ્તારોમાં પાણી ભરાયા છે. ટીંબી ગામમાં માછીવાડમાં લોકોના ઘરમાં નદીના પાણી ઘૂસી ગયા છે. તો રસ્તા પર પાણી ભરાઇ જતા ટેમ્પો પાણીમાં ફસાઇ ગયો છે
 

છોટા ઉદેપુરની ઓરસંગ નદીમાં આવ્યા નવા નીર
છોટાઉદેપુરના બોડેલીમાં આવેલી ઓરસંગ નદીમાં નવા નીર આવ્યા છે.. પાવી જેતપુર અને છોટાઉદેપુરમાં ભારે વરસાદને પગલે નદીમાં નવા નીર આવ્યા છે.  નદીમાં નવા નીર આવતા રેતીની લીઝો બંધ કરવામાં આવી છે.. નદીમાં નીર આવતા ખેડૂતોમાં ખુશીનો માહોલ જોવા મળ્યો છે.
 

ભારે વરસાદથી વલસાડમાં જળબંબાકાર, વાપીમાં વિયર કમ કોઝવે ઓવરફ્લો
ભારે વરસાદના કારણ વાપીમાં વિયર કમ કોઝવે ઓવરફ્લો થઇ ગયો છે. ઉપરવાસમાં વરસાદ પડતા વાપીમાં દમણગંગા નદીનો કોઝવે ઓવરફ્લો થયો છે. વાપીની જીવાદોરી સમાન ગણાતી દમણગંગા નદીમાં નવા નીરની આવક થઇ છે.
 

છોટાઉદેપુરના બોડેલી ખાતે જોજવા ડેમ થયો ઓવરફ્લો
છોટાઉદેપુરનો જોજવા ડેમ ઓવરફ્લો થયો છે. પ્રથમ વરસાદમાં જ બોડેલી ખાતે આવેલો જોજવા ડેમ ઓવરફ્લો થયો. ત્યારે ડેમ ઓવર ફ્લો થતા ખેડૂતોમાં ખુશીનો માહોલ જોવા મળી રહ્યો છે.