ગુજરાતમાં 22 અને 23 ઓગસ્ટે ભારે વરસાદની આગાહી આપવામાં આવી છે. જેના પગલે રાજ્યભરમાં છેલ્લા ઘણા દિવસોથી સાર્વત્રિક વરસાદ વરસી રહ્યો છે. ત્યારે આજે અને આવતી કાલની ભારે વરસાદની આગાહી વચ્ચે રાજ્યભરમાં વહેલી સવારથી અનેક જિલ્લાઓમાં વરસાદી માહોલ જોવા મળ્યો છે. રાજ્યમાં પડી રહેલા અવિરત વરસાદના પગલે ખેડૂતોમાં ખુશીની લહેર જોવા મળી રહી છે.
સુરતમાં મેઘરાજાનું આગમન
સુરતમાં પણ મેઘરાજાનું આગમન થયું છે. શહેરના અલગ અલગ વિસ્તારમાં વરસાદ શરૂ થયો છે. અઠવાલાઇન્સ, કતારગામમાં વરસાદ વરસી રહ્યો છે. અમરોલી, રિંગરોડ સહિત વિસ્તારોમાં પણ વરસાદ પડી રહ્યો છે. કાળા ડિબાંગ વાદળો વચ્ચે વરસાદનું આગમન થયું છે.
ઉકાઇ ડેમમાં પાણી છોડાતા તાપી નદીનું જળસ્તર વધ્યું
સુરત જિલ્લાની વાત કરીએ તો તાપી નદીમાં હજુ પણ પુરની સ્થિતિ જોવા મળી રહી છે. તાપી નદી બંને કાંઠે વહી રહી છે. ઉકાઉ ડેમમાં પાણી છોડાતાં તાપી નદીનું જળસ્તર વધ્યું છે. નીચાણવાળા વિસ્તારોમાં ફરી પુરની શક્યતા જોવા મળી રહી છે.
મહેસાણા જિલ્લામાં વરસાદી માહોલ
રાજ્યમાં ભારે વરસાદની આગાહી વચ્ચે મહેસાણા જિલ્લામાં વહેલી સવારથી વરસાદી માહોલ જોવા મળ્યો છે. સતલાસણામાં 2 કલાકમાં 5 ઇંચ વરસાદ નોંધાયો છે. ખેરાલુમાં 1 ઇંચ અને મહેસાણામાં અડધો ઇંચ વરસાદ નોંધાયો છે.
અરવલ્લી જિલ્લામાં સાર્વત્રિક મેઘમહેર
રાજ્યમાં પડી રહેવા અવિરત વરસાદના પગલે અરવલ્લી જિલ્લામાં સાર્વત્રિક વરસાદ વરસ્યો છે. ભિલોડામાં 2 કલાકમાં 2 ઇંચ વરસાદ ખાબક્યો છે. ભિલોડા-ઇડર રોડ પર વરસાદી પાણી ભરાયાં છે. શામળાજી સહિત જિલ્લાના અન્ય વિસ્તારમાં પણ વરસાદ માહોલ જોવા મળ્યો છે.
કચ્છમાં સારા વરસાદથી નદીમાં નવા નીરની આવક
હાલમાં સૌરાષ્ટ્ર સહિત કચ્છમાં મેઘમહેર જોવા મળી છે. કચ્છમાં સારા વરસાદથી નદીમાં નવા નીરની આવક જોવા મળી છે. પવિત્ર તીર્થધામ માતાના મઢ પાસે આવેલી નદીમાં નીર આવ્યાં છે.